KOLOSSITE 2
2
1Ajiahchu nang uleh Laodisia khua a umte leh tahsa a ka meel mu nailou photmahte diing a ka kihahbawl dan he leh u’chin ka ut hi; 2Pathian leh, Pa leh, Khrist thuguuh hedoh diing a heetsiamna kichiantah hauhsatna zousiah lama lungsiatna a khuikhawma a um va, a lungtangte uh hamuangtah a, a um theihna diingin. 3Hu Khrist ah pilna leh heetna gou zousiah phual in a um hi.
Khrist toh kizopna thu leh khovel pilna apat kiveen diing thu
4Huleh hichu, koimah in kamsiam thu a ahung heem louhna diingun, ka soi ahi. 5Ajiahchu tahsain na kawmvah um sih zongleng, kipaahtahin, na kizendan uleh, Khrist a na ginna kipdan uh en in, hagau in na kawmvah ka um hi. 6Hujiahin Khrist Jesu, Lalpa chu na pomtaah mahbangun, amah ah um un; 7Amah ah zungha leh lamtouh a um in, ahung kihilhta mahbanga ginna a kipaahtaha um in, huah chu kipaahthu soina a dimin um un. 8Pilvaang un, huchilou inchu mi koiaha in Khrist thu bang hilou in, mihing thugousiah leh, khovel thubulte bang zaw in, khovel pilna leh heemna mai in gaallaah in ahung lakha diing uh. 9Ajiahchu amah ah Pathian taangchinna zousiah sapum nei in a teeng hi. 10Huleh nanguh amah ah na bukimta uhi, amah chu lalna leh thuneihna zousiah lutang ahi; 11Amah ah nanguh chu khut a tan hilou a, tahsa sualna sapum paikhia a Khrist zehtanna a zehtan na hi uhi. 12Baptisma ah amah toh vui na hita va, humah ah misi laha kipana amah kaithoutu Pathian natoh gintaat jalin amah toh kaihthoh na hita uhi. 13Huleh nanguh, na sualnate uleh na tahsa va zehtanlouhna jiah a si chu, na bohsiatna zousiah uh hung ngaidam in, ama’n amah toh ahung suhingkhawmta hi; 14Daanthu, ei uh hung lang zawng leh ei toh kikalh lam a gelh chu nawtmang in, a kros dawn a kilhbeh in a lamangta hi; 15Huleh lalnate leh thuneihnate susia in, kros a hute chu zou in, a langtang in etsahna’n a bawlta hi. 16Hujiahin mi koimah in, neeh thu aha, dawn thu aha, ni siangthou thu aha, ha thah thu aha, ahihlouhleh khawlni thu aha in nanguh hung dem sih u’hen. 17Hute chu sil hung tung diingte liim ahi a; hizongleh a tahsa chu Khrist ahi. 18Mi koimah in, a sil muh ngeilouhte a um zingin, a tahsa lungsima kimawhsahtheih in, mahni siamthuh kingaihtawm na leh angelte biahna zangin na kipaahman muh diing uh hung laahsah sih heh. 19Huleh tahsa zousiah in kivaah khang na nei a, kizopkhawm leh kikaankhawm a nna tong a, huleh kihuuikhawm a Pathian khanna a, a khanletna lutang chu a tudet sih hi. 20Huchih jiahin khovel thubulte apat Khrist toh si na hih taah uleh bang diinga khovel a hing banga daan thupiahte nuaia kituluut na hi viai? 21(Sukha sin; chiam sin; khoih sin; chihte 22Hite chu zatpum a mangthai veh diing ahi;) hite bawl chu mihing thupiah leh thuhilhna juih ahi. 23Hi silte chu utthu a biah leh, kingaihtawm leh, tahsa khawhsa lou a silbawl ah pilhuai a bangna a; hizongleh sa deihzawng suhpichingna lamah bangmah a phatuam sih hi.
Currently Selected:
KOLOSSITE 2: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.