KOLOSSITE 4
4
1Houtute, nangun zong vaan ah houtu na nei uh chih he in, na suaahte uh tunga a dih leh a kilawm hun chu bawl un. 2Haamtei zing unla, huah chu kipaahthu soi kawmin kiveeng zing un. 3Ka an a ka umna pen, Khrist thuguuh soi diing a Pathian in keiuh diing a thusoina kot ahung honsah theihna diingin kei uh diingin zong hung haamteisah un. 4Ka soi diing bangtah a, huchu ka soi thei na diingin. 5Hun lemtaang lei in, polam mite laha pilvaangtahin um un. 6Mi chin bangchibang a dawn but diing ahiai chih na heet theihna diingun na haam kamsuaah uh chu hehpihna tel, chi kisoh hi zing hen.
Mimal mangpha haahna leh thutawpna
7Ka tanchin zousiah chu unau deihtah Tikika, natongtu ginum leh Lalpa a ka suaah hihpihin nanguh ahung hesah veh diing hi. 8Hu diing mahin amah chu na kawmvah ka hung sawl ahi, na tanchin uh a heet a, huleh na lungtang uh a suhhamuan theihna diingin; 9Onesima, unau ginum leh ngaihumtah, nanguh laha mi mah toh. Amahun hilam sil umtan zousiah ahung hesah diing uhi. 10Aristarkha, ka suangkultaanpih in chibai ahung buuh hi, huleh Mark, Barnaba sanggamnu tapa in zong chibai ahung buuh hi, (amah tungtaang ah thupiah na mu uh; na kawmva ahung leh kipaahtahin ana pom un). 11Huleh Jesu, Justa a chih uh, zehtan mi in nanguh chibai ahung buuh hi. Hite chauh Pathian gam thu lam a ka natohpih, ahung hamuantute ahi uhi. 12Epaphra, na lahva mi, Khrist suaah in nanguh chibai ahung buuh hi; Pathian deihlam zousiah a hoihkim leh bukim a na dindet theihna diingun amah chu haamteinate ah theihtawp suah in a pang hi. 13Ajiahchu ama’n nanguh diing leh, Laodisia leh Hierapoli khua a umte diingin phatuam a ngai mahmah chih ka heetpih hi. 14Luke, doctor deihtah leh Dema in nanguh chibai ahung buuh uhi. 15Laodisia khua a unau umte leh, Nimpha leh a inn a kouhtuamte chibai hung na buuhsah in. 16Huleh hi lehkhathot na lahva na sim zoh chiangun Laodisia kouhtuamte lahah zong na simsah un; huleh nangun zong huchibangmah in Laodisia khua a lehkhathot na sim ve un. 17Huleh Arkippa kawmah, Lalpa a natohna na muh chu subuching diingin pilvaang in, na chi un. 18Kei Paul in, keimah khut a chibai ka hung buuh na ahi. Ka kolbuhte he zing un. Hehpihna na kawmvah um hen. Amen.
Currently Selected:
KOLOSSITE 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.