LUKE 17
17
Kingaihdamna tungtaanga thuhilhna
1Huin ama’n a nungjuite kawmah, Puuhnate um lou thei ahi sih; hizongleh puuhna umsahtu tung a gih hi! 2Hi mineute laha khat zong a suhpuuh sangin a ngawng ah buh gawi zanna suang ohsah in tuilianpi ah kipaailuut leh amah diingin a hoihzaw diing hi. 3Pilvaang un; na unaupa’n na tunga sil a bawlsual leh tai in; huleh a kisiih leh ngaidam in. 4Ni khat sunga na tunga sagih vei sil a bawlsuala sagih vei na kawma ka kisiih hi chi-a nang lama ahung kiheikiitleh na ngaihdam diing ahi, a chi a. 5Huin sawllehte’n Lalpa kawmah, Ka ginna uh khang sah in, a chi va. 6Lalpa’n, Ankam tang khat bang ginna na neih uleh hi singtheimin kung kawmah, Na kibotdoh inla tuilianpi ah na kisuanin, na chi diing va, na thu uh a mang diing hi; 7Nang u laha koi na hi viai loukai aha, belaam ching aha suaah khat neia, lou apat ahung hun chianga, An va uumpah aw, ana chi diing? 8Ka neeh diing hung bawlsah inla, na tai gaah inla, ka neeh a ka dawn zoh masiah hung jenin; huzohchiang in nang nein na dawn diing, chizaw lou diing ahiai mah? 9Ama’n hu suaahpa chu a kawma thu kipia banga a bawl jiahin a paahta eimah? Ka gingta sih. 10Huchimah bangin nangun zong na kawmva thupiah zousiah na bawlzoh chiangun, Suaah phatuam lou ka hi uh; ka bawl diing mawnguh ahi ka bawl uh, chi un, a chi a.
Jesu’n phaah sawm a suhdamna
11Huleh hichi ahung hi a, Jerusalem zuana a chiahin Samaria, leh Galili gamgi jul a tawn peh a; 12Huleh khua khata a luut leh phaah sawm in ana lamtuah va, amahuh chu gamlapi ah a ding va; 13Huleh aw ngaihtahin a kikou va, Jesu, Houtupa, Hung khotuah in, a chi va. 14Huleh amahuh a muh tahin ama’n a kawmvah, Chiah unla, siampute va kiensah un, a chi a. Huleh hichi ahung hi a, a chiah laiun ahung siangthouta uhi. 15Huleh a lahva khat in a damta chih ahung kiheet tahin a kihkiita, aw ngaihtahin Pathian a paahtawi a, 16Jesu keeng bulah a bohkhup a, kipaahthu a soi hi; huleh amah chu Samarimi ahi. 17Huin Jesu’n a dawng a, Sawm hilou maw suhsiangthoua um? Himahleh kuaahte khoia umta? 18Hi meelheet louhpa chih louh Pathian paahtawi diing a hung kihkiit kuamah a kimu sih a, a chi a. 19Huin ama’n a kawmah, Thou inla, chiahta in; na ginna in ahung damsahta hi, a chi a. 20Huleh Pharisaite’n Pathian gam hung tun hun diing a dot uleh ama’n a dawng a, a kawmvah, Pathian gam chu muhtheih in ahung tung sih; 21Huleh, En un, hitah ah, ahihlouhleh en un hutah ah, zong a chi sih diing uh: bang jiahin i chih leh ngai un, Pathian gam chu na lahvah a um hi, a chi a. 22Huin ama’n a nungjuite kawmah, Mihing Tapa damlai nite ni khat beeh mu nuam mahmah ngal a, na muh theih louh hun uh ahung tung diing.
Jesu’n a hung kiitna diing a soina
23Huchian na kawmvah, En un hitah ah; ahihlouhleh en un hutah ah, ahung chi diing va; chiah sih unla, a nung uh zong jui sih un. 24Ajiahchu kawlphe vaan nuai langkhata a pheta, vaan nuai lehlam tanpha a salhvaah mahbangin mihing Tapa zong ahung niin ahi diing. 25Hizongleh hu ma in sil tampi a thuaah diing a, tulai khang thahte deih louh in a um diing hi. 26Noah damlaia sil umdan bangin mihing Tapa hungkiit ni chiangin zong ahi diing hi. 27Noah kuang a a luut a, tuijiin ahung tunga, a bawnva a suhlup ni a tun masiah a neun, a dawn va, ji a nei va, huleh ji leh ta in a kipetuah uh. 28Huchimah bangin Lot damlaiin zong a um a; a ne un a dawn va, a lei un a zuah va; huleh a suan va, a lam uh; 29Hizongleh Sodom khua apat Lot a pawt niin vaan apatin mei leh kaat a zu a, a bawnun a sulumta hi. 30Huchimah bangin mihing Tapa hung kilaah ni chiangin ahi diing hi. 31Hu ni chian koipouh inn tunga um chu inn sunga a thuampua la diingin kum sih heh; huleh huchimahbangin koipouh loua um zong hung kihkiit sih heh. 32Lot ji he zing un. 33Mi koipouh a hinna humbitna hawlin a taan diing a; huleh koipouh a hinna taanin a humbit diing uhi. 34Ka hung hilh ahi, hu janin lupna khatah mi nih a lum diing a, khat laahmang in a um diing a, khat nuutsiat in a um diing. 35Numei nih buh gawijan in a um diing a; khat laahmang in a um diing a, khat nuutsiat in a um diing. 36Lou ah mi nih a um diing va; khat chu laahmang in a um diing a, khat chu nuutsiat in a um diing, a chi a. 37Huin amahun a dawng va, a kawmah, Khoiah e, Lalpa? a chi va. Ama’n a kawmvah, Saluang umna photah musa nete zong a umkhawm diing uh, a chi a.
Currently Selected:
LUKE 17: SIMTBSI
Highlight
Share
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
