LUKE 3

Baptistu John leh a thupuaah

1Tiberia Kaisar vaihawm kum sawmlengaa kum in Pontia Pilat chu Judia gamoptu ahi a, huleh Herod chu Galili gam kumpipa ahi a, a unaupa Philip chu Ituria leh Trakoniti gam kumpipa ahi a, huleh Lusania chu Abilene gam kumpipa ahi a, 2Ana leh Kaiapha chu siampu lalpente ahi va, hulaiin gamdai ah Zakaria tapa John kawmah Pathian thu ahung tung a. 3Huleh amah chu Jordan lui kiim gam zousiah ah a hung a, sualte ngaihdamna diing a kisiihna baptisma thu a soi a; 4Zawlnei Isaiah thu lehkhabua, Gamdaaia mi kikou awging in, Lalpa lamlian sial unla, a lampite sutang un, 5Guam chin dipdim ahi diing a, huleh taang leh mual chin suhngiam ahi diing; huleh a kawite chu suhtang ahi diing a, lampi phonte suhnal ahi diing; 6Huleh mi zousiah in Pathian hutdamna a mu diing uh chia kigelh bangin. 7Huin ama’n a khut a baptisma tang diing a hung mipite kawmah, Guul haahte aw, lungthahna hung tung diing taisan diingin kua’n ahiai hung vauhilh? 8Hujiahin kisiih min potaahin gah un, huleh Abraham ka pu uh ahi chi'n na lungsim un ngaihtuah sih un; Ajiahchu Pathian in hi suang te Abraham haahtein a dingsah thei hi chih ka hung hilh ahi. 9Huleh tuin zong sing bul ah heita koih ahita; sing chin gah hoih a gah lou phot chu a phuuh va, meiah a paailuut veu uh, a chi a. 10Huin mipite’n a kawmah, Ahihleh kei un bang ka bawlta diing viai? chih a dong va. 11Ama’n a dawng a, a kawmvah, Koipouh puannaah nih nei in a nei lou hawm heh; huleh neeh diing nei in zong huchibang mahin bawl heh, a chi a. 12Huin siahdongtute zong baptisma tang diingin a hung va, a kawmah, Houtupa, kei un bang ka bawl diing viai? a chi va. 13Huleh ama’n a kawmvah, Ahung chiamsah val uh phuut sih un, a chi a. 14Huleh sepaihte’n zong huchimahbangin a kawmah, Kei un bang ka bawl diing viai? Huchi'n a dong va Ama’n a kawmvah, Koima pawngbawl sih unla, dihloutahin zong heeh sih un; huleh na loh vah lungkim un, a chi a. 15Huleh mipite a kinep va, mi zousiah in John chu Khrist houh ahi de aw chia a lungtang va a ngaihtuah laiun; 16John in a dawng a, a kawmvah, Ke'n chu tui in ka hung baptis ngei a; hizongleh kei sanga loupizaw, a keengtophah khau zong suut taah ka hih louh mi khat ahung diing; ama’n chu Hagau Siangthou leh mei in nanguh ahung baptis diing; 17A khut in a pasiseep a tawi a, a phual a jap siang tinten diing a, a buhte a buhpangah a sungkhawm diing hi; hizongleh a si chu mei mit thei louin a haaltum diing hi, chih. 18Huleh mite kawmah hasotna thu dang tampi in tanchinpha a soi jel hi. 19Hizongleh kumpipa Herod chu, a unaupa Philip ji Herodia jiah leh a silgilou bawl zousiah a John in a taihilh jiahin, 20A silsual bawl zousiah behlapna in John chu suangkul ah a khumta hi.

Jesu baptisma tanna

21Huleh mipi zousiah in baptisma a tan zohin hichi ahung hia, Jesu’n zong baptisma a tang a, huleh a haamtei laiin vaan ahung kihong a, 22Huleh Hagau Siangthou chu tahsa nei in vakhu bangin ahung kumsuh a, a tungah a tuta a; huleh vaan apatin aw ahung suaah a, Nang ka Tapa deihtah na hi; na tungah ka kipaah mahmah hi, a chi hi.

Jesu khanggui thu

23Huleh Jesu’n thuhilh apat chiil laiin amah chu kum sawmthum vel ahita a, mi ngaihdanin chu Joseph tapa ahi a, huchu Heli tapa ahi a, 24Huchu Matthat tapa ahi a, huchu Levi tapa ahi a, huchu Melki tapa ahi a, huchu Janna tapa ahi a, huchu Joseph tapa ahi a, 25Huchu Mattathia tapa ahi a, huchu Amos tapa ahi a, Huchu Naum tapa ahi a, huchu Esli tapa ahi a, huchu Nagge tapa ahi a, 26Huchu Maath tapa ahi a, huchu Mattathia tapa ahi a, huchu Semei tapa ahi a, huchu Joseph tapa ahi a, huchu Juda tapa ahi a, 27Huchu Joanna tapa ahi a, huchu Rhesa tapa ahi a, huchu Zerubbabel tapa ahi a, huchu Salathiel tapa ahi a, huchu Neri tapa ahi a, 28Huchu Melki tapa ahi a, huchu Addi tapa ahi a, huchu Kosam tapa ahi a, huchu Elmodam tapa ahi a, huchu Er tapa ahi a, 29Huchu Jose tapa ahi a, huchu Eliezer tapa ahi a, huchu Jorim tapa ahi a, huchu Matthat tapa ahi a, huchu Levi tapa ahi a, 30Huchu Simeon tapa ahi a, huchu Juda tapa ahi a, huchu Joseph tapa ahi a, huchu Jonan tapa ahi a, huchu Eliakim tapa ahi a, 31Huchu Melia tapa ahi a, huchu Menan tapa ahi a, huchu Mattatha tapa ahi a, huchu Nathan tapa ahi a, huchu David tapa ahi a, 32Huchu Jesse tapa ahi a, huchu Obed tapa ahi a, huchu Boaz tapa ahi a, huchu Salmon tapa ahi a, huchu Naasson tapa ahi a, 33Huchu Aminadab tapa ahi a, huchu Aram tapa ahi a, huchu Esrom tapa ahi a, huchu Phares tapa ahi a, huchu Juda tapa ahi a, 34Huchu Jakob tapa ahi a, huchu Isaak tapa ahi a, huchu Abraham tapa ahi a, huchu Terah tapa ahi a, huchu Nahor tapa ahi a, 35Huchu Saruk tapa ahi a, huchu Ragau tapa ahi a, huchu Phalek tapa ahi a, huchu Heber tapa ahi a, huchu Sala tapa ahi a, 36Huchu Kainan tapa ahi a, huchu Arpachsad tapa ahi a, huchu Sem tapa ahi a, huchu Noah tapa ahi a, huchu Lamek tapa ahi a, 37Huchu Mathusela tapa ahi a, huchu Enok tapa ahi a, huchu Jared tapa ahi a, huchu Mahalelil tapa ahi a, huchu Kainan tapa ahi a, 38Huchu Enos tapa ahi a, huchu Seth tapa ahi a, huchu Adam tapa ahi a, huchu Pathian tapa ahi.

Currently Selected:

LUKE 3: SIMTBSI

Highlight

Copy