MATTHAI 24
24
Jesu’n Pathian biahinn suhsiata a um diing leh hun tawpna diing a soilawh
1Huleh Jesu chu Pathian biahinn apat pawt in a chiahta a; huleh Pathian biahinn kibawl daante ensah diingin a nungjuite a kawmah a hung va. 2Huleh Jesu’n a kawmvah, Hi sil zousiah na mu sih uh maw? Chihtahzetin ka hung hilh ahi, Suang suhchip louha kithuap mawngmawng hitah ah a um sih diing, a chi a. 3Huleh Olive taang tunga a tou laiin, nungjuite a kawmah aguuhin a hung va, hi silte bangchihchiangin ahung um diai? huleh na hung kiitna diing leh khovel tawpna diing chiamchihna bang adiai? hung hilh in, a chi va. 4Huin Jesu’n a dawng a, a kawmvah, Mi koimah in ahung heem louhna diingin pilvaang un. 5Ajiahchu mi tampi in, Khrist ka hi, Huchi'n ka min in ahung diing va; mi tampi a heem zou diing uhi. 6Huleh kidou leh kidou thuthangte na ja diing va; na lungdon louhna diingun pilvaang un; ajiahchu hi silte zousiah hung um diing mawng ahi a, hizongleh a tawpna ahi nai sih diing. 7Nam tuam leh nam tuam, gam tuam leh gam tuam a kidou diing va; huleh mun tuamtuam ah kial bang a tung diing, hii bang a leeng diing a, ziil bang a liing diing hi. 8Hite zousiah chu gentheihna kipatna ahi. 9Hu hun chiangin nanguh chu suhgim diingin ahung mansah diing va, ahung that diing uh; huleh ka min jiahin nam zousiah huat na hi diing uh. 10Huleh mi tampi a puuh diing va, khat leh khat a kimansah diing va, khat leh khat a kimudah diing uh. 11Huleh zawlnei tahlou tampi ahung pawt diing va, mi tampi a heem zou diing uh. 12Huleh sualna a pun diing jiahin mi tampite lungsiatna chu ahung daai diing. 13Hizongleh a tawp donga thuaah zou, hu mi chu hutdamin a um diing. 14Huleh hi lalgam Tanchinpha chu nam zousiah heetsahna diingin khovel pumpi ah soi in a um diing; huzohchiangin a tawpna chu ahung tung diing hi.
Gimthuaahna thupi hungum diing
15Hujiahin sumangbangtu kihdahhuai, zawlnei Daniel in ana soi chu mun siangthou a ding na muh chiangun (a sim phot in hesiam uheh). 16Huchih hun chiangin Judia gam a umte taang ah tai uh heh; 17Inn tunga um chu a inn sungah bang aha ladoh diingin hung kumsuh sih heh; 18Lou a um zong a puante la diingin hung kiih sih heh. 19Huleh, hu ni chiangin gaaite leh naungeeh neite tung a gih hi! 20Hizongleh na tai hun uh phalbi lai ahih louh a, khawlni zong ahihlouhna diingin haamtei un. 21Ajiahchu hu hun chiangleh gimthuaahna nasatah um diing ahi, hutobanga gimthuaahna loupi chu khovel siam chiil apat tutanin a um ngei sih a, um zong a um nawn sih diing hi. 22Huleh hu nite chu suhtom hilou hileh mihing mawngmawng hing in a suaahta sih diing; hizongleh teelte jiahin hu nite chu suhtom ahi diing hi. 23Hu hun chiangleh koipouh in na kawmvah, En in, hi-ah Khrist a um, ahihlouhleh, huah a um chi zongleh tahsang sih un. 24Ajiahchu Khrist tahlou leh zawlnei tahlou ahung pawt diing a, chiamchihna leh silmah loupitahtah ahung ensah diing uhi; huah chu ahihtheihleh teelte ngei zong ahung heem diing uhi. 25Ngai un, a ma in ka hung hilh lawhta ahi. 26Hujiahin, na kawmva, Ngai un, gamdai ah a um, ahung chih uleh chiahdoh sih un; ngai un, pindan sunggil ah a um, ahung chih uleh tahsang sih un.
Kumpipa hungkiitna diing
27Ajiahchu chu nisuaahna lama kawl ahung phet a ni tumnalam tana a salhvaah bangin, mihing Tapa hung kiitna zong huchimah bang diing ahi. 28Saluang umna photah musanete zong a umkhawm diing hi. 29Hu gimthuaahna nite zohtahleh ni chu suhmial in a um diing a, ha chu a vaah nawn sih diing a, vaan apatin aahsite ahung ke diing, huleh vaan silbawltheihna chu suhliing ahi diing hi. 30Hu hun chiangin vaan ah mihing Tapa chiamchihna chu ahung kilang diing a; hutahchiangleh lei tunga jat zousiah in a suun diing uh, huleh mihing Tapa chu silbawltheihna leh gualzohna loupi toh vaan mei tunga hung a mu diing uhi. 31Huleh ama’n a angelte chu pengkuul ging nasatah toh a sawlkhe diing a, huleh amahun a teelte chu lei ning li akipan, vaan tawp akipan a lehlam tawp tanphain a khawm diing uhi.
Kiven zing a kuuldan
32Huchi'n theipi kungah tehkhinthu zil un; a ka ahung meen a, a nah ahung sel chiangin nipi a naita chih na he uhi; 33Huchimahbangin nangun zong hi silte na muh chiangun, a naita a, kotbul mahmah ah a umta chih he un. 34Chihtahzetin ka hung hilh ahi, Hi silte a tunkim masiah tulai khang thahte a mang sih diing uhi. 35Vaan leh lei a mang diing a, hizongleh ka thu a mang sih diing hi. 36Hizongleh hu ni diing leh a hun diing chu Pa chauh loungal koimah in, vaan a angelte’n zong a he sih uhi. 37Hizongleh Noah damlai bangin, mihing Tapa hung kiitna zong ahi diing hi. 38Ajiahchu tuijiin tun matengin, Noah kuang a, a luut ni tanin, a ne un a dawn va, ji leh pasal in a kinei uh. 39Huleh tuijiin a tun a, a bawnva a laahmang masiah bangmah a he sih uhi; mihing Tapa hung kiitna zong huchibangmah ahi diing hi. 40Hu hunchiangin lou ah mi nih a um diing va; khat chu laahmangin a um diing a, khat chu nuutsiatin a um diing. 41Numei nih buhgawina ah buh gawtin a um diing va; khat chu laahmang in a um diing a, khat chu nuutsiatin a um diing hi. 42Hujiahin kiging un, na Lalpa uh bangchih huna ahung diing chih na heet louh jiahun.
Suaah hoih leh hoihlou tehkhinthu
43Hizongleh hichu he un, inn neitu in guta hung diing hun he leh, a veeng diing a, a inn a luhsah sih diing hi. 44Hujiahin kiging zingin um un; ajiahchu na ngaihtuah louh laitah va mihing Tapa chu hung diing ahi. 45Ahihleh a pu in a hunchin a, a tan diing uh hawmsah diing a a innkuanpihte tunga houtu a, a koih suaah muanhuai chu koi ahiai? 46A pu hung chiangin huchibanga bawl ahung muh, hu suaah chu a hampha hi. 47Chihtahzetin ka hung hilh ahi, Ama’n amah chu a neih zousiah tungah houtu in a siam diing hi. 48Hizongleh suaah gilou in a lungsim in, Ka pu chu hung baih lou diing ahi, chi'n, 49A suaah hihpihte na vua in, zukham ankhamte kawmah ne in na dawnta leh, 50Hu suaahpa pu chu, a gintaat louh ni, a kiveen louh laitahin a hung diing a, 51Huleh amah chu tum nih suah in, milepchiahte tan bang a tangsah diing a; huah chu kah leh hagawi a um diing hi.
Currently Selected:
MATTHAI 24: SIMTBSI
Highlight
Share
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
