THUPHUANDOH 12
12
Ni a kithuam numei leh Dragon muhna
1Huleh vaan ah sillimdang loupitah ahung kilang a; numei khat, ni a kithuam, a keeng nuaia hapi um, huleh a lutung a aahsi sawmlenih tuang lallukhuh khuh ahung um a. 2Amahnu chu naupaai ahi a, nausuaah diing a natna thuaah in a kap a. 3Huin sillimdang vaan ah ahung kilang kiit a; ngai in, dragon san lianpi, lutang sagih leh ki sawm nei, a lutung a lallukhuh sagih khuh ahung um a. 4A mei in vaan a aahsi mun thum a khen mun khat a kai a, lei ah a paaikheta a; huleh a nau a suaah phaatphaat ana valhzoupah diingin dragon chu numei nausuaah diing nu ma ah a ding hi. 5Huleh amahnu in chu ta pasal, nam zousiah tunga siihchiang a vaihawmtu diing khat ahung neikheta a; huleh a ta chu Pathian leh a laltouphah kawmah laahtouh in a umta hi. 6Huleh numeinu chu ni saang khat leh ni za nih leh ni sawmguup a khoi theihna diingun, gamdai ah, Pathian in a bawlsah munah a taimangta hi. 7Huin vaan ah kidouna a um a; Mikael leh a angelte’n dragon a dou va; huleh dragon leh a angelte’n zong a dou uh. 8Huleh a zou sih va, a mun u’zong vaan a muh in a um nawmta sih hi. 9Huleh dragon lian chu paihdoh in a umta a, hu guulpi teeh, Diabol leh Setan kichi, khovel pumpi heemtu chu; amah chu leitung ah paihkhiah in a umta a, a angelte zong amah toh paihkhiah in a um uhi. 10Huleh vaan ah aw ngaihtahin, Tuin chu i Pathian uh hutdamna leh, thahaatna leh, lalgam leh, a Khrist thuneihna ahung tungta hi; ajiahchu i unaute uh heehtu chu paihkhiah in a umta hi, ama’n a suun a jan in i Pathian ma ah amahuh a heeh hi. 11Huleh amahun Belaamnou sisan jiah leh, a heetpihna thu uh jiahin amah chu a zouta va; huleh sih tanphain a hinna uh a it sih uhi. 12Hujiahin nanguh vaan leh a sunga teengte kipaah un. Leitung leh tui khang liana teengte tung a gih hi; ajiahchu hun tomtakhat a neita chih a heet jiahin Diabol chu lungthah mahmahin na kawmvah ahung suhta ahi. 13Huleh dragon in leitung a paihkhiah ahi chih a kiheet tahin hu numei ta pasal neinu chu a gawtta a. 14Hu numei chu gamdai ah, hu guul muhphaahlouh a hun khat leh, hunte leh, hun kimkhat chawm a, a umna diing muna a leenluut theihna diingin mupi liantah haa nih piah ahi. 15Huleh guul inchu numeinu tui a tohmangsah theihna diingin a nungah lui lianpi bangmai in a kam apat tui a phihdoh a. 16Huleh leiin numeinu a panpih a, leiin a kam a kaah a, hu guul in a kam apat a phihdoh tuilian chu a valh beita hi. 17Huleh dragon chu numeinu tungah a lungthah a, a chihaah umsun Pathian thupiah juite leh, Jesu Khrist heetpihna thu pomtute dou diingin a kuanta hi.
Currently Selected:
THUPHUANDOH 12: SIMTBSI
Highlight
Copy
Compare
Share
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
