ROMETE 13
13
Khovel vaihawmtute thu man diing
1Mi chin a tunga vaihawmtute thuthu in um heh. Ajiahchu Pathian thu louin koimah vaihawm a um sih hi; vaihawmtu a umte chu Pathian guat ahi uhi. 2Hujiahin koipouh vaihawmtu nial chu Pathian silguat doudaal ahi uhi; huleh a doudaaltute’n amahuh tungah siamlouhtansahna a mu diing uhi. 3Vaaihawmtute chu silhoih bawlte diingin lauhuai ahi sih va, hizongleh migiloute diingin lauhuai ahi uhi. Ahihleh vaihawmtu lau lou a um na ut ei? Sil hoih bawl in, huchi’n a paahtaat na loh diing hi. 4Ajiahchu amah hi na hoihna diing a Pathian natongtu ahi. Hizongleh sil gilou na bawl inchu lau in; ajiahchu ama’n a namsaau a mawh tawi sih hi; amah chu Pathian natongtu, sil gilou bawlte tunga lungthahna phubalatu ahi. 5Hujiahin lungthahna lau jiah chauh hilouin, na sialepha heetna jiahin zong vaihawmtu thuthu a na um diing mawng ahi. 6Bang jiahin ahiai i chih leh hikhu jiahin leiman zong na pia uh ahi; amahuh chu hi sil ngei bawl diing a Pathian natongtu ahi uhi. 7Hujiahin mi zousiah kawmah a tan diing lawm uh pia un; leiman piahna diingpa kawmah leiman pia unla; siah tawina diingpa kawmah siah tawi un; lau diingpa chu lau unla; zahbawl diing a umpa chu zahbawl un.
Unau kilungsiatna
8Kilungsiattuahna loungal chu koimah bangmah ba sih un; ajiahchu amah midang lungsiatpa in daan a juikim veh ahi. 9Bang jiahin ahiai i chih leh hi thute, aang na kawm louh diing ahi, Tual na thah louh diing ahi, Na guuh louh diing ahi; Heetpihtu dihloua na pan louh diing ahi, Na een louh diing ahi; chin leh, hulou thupiah dang mawngmawng a um leh, hute chu, Nangmah na kilungsiat banga na innveengte na lungsiat diing ahi, chihin a khaikhawm veh hi. 10Lungsiatna in a innveengte a bawlse sih a; hujiahin lungsiatna chu daan juihkimna ahi.
Khrist hung kiitna ni diing a naizia leh hinkhua siangthou
11Huchiangleh zong i gintaat chiil lai sanga tu a i hutdamna a naizawh taah jiahin, tuin chu ihmu khanloh a hun mahmahta chin hun umdan na he uhi. 12Jan a bei dehdehta a, khua vaah diing ahita hi; hujiahin mial a silbawlte paai in vaah thuam in i kithuam diing uhi, 13Suuna um bangin dihtahin i um diingun; huhel leh zukham buai a um louin, huuh leh kingaihhaat a um louin, huleh kihau leh kithangsiat a um louin. 14Lalpa Jesu Khrist in kithuam unla, na tahsa uh utna supiching diingin bangmah kibawl sih un.
Currently Selected:
ROMETE 13: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.