ROMETE 5
5
Ginna gahsuahte chu
1Hujiahin ginna jiaha siamtansah a um in, i Lalpa uh Jesu Khrist jalin Pathian toh kilemin i um uhi. 2Amah jal mahin hi i dinkipna hehpihna huang ah ginna a luut theihna i neita uhi; huleh Pathian loupina a kinemin kipaahin zong i um uhi. 3Huleh hu chauh zong hilouin, gimthuaahna in kuhkalna a siam chih he in gimthuaahna ah zong i kipaah uhi. 4Huleh kuhkalna in heetchi ana a siama, heetchi ana in kinepna a siam a; 5Huleh kinepna in chu a zahtasah sih; ajiahchu hu Hagau Siangthou i kawma ahung piahin Pathian lungsiatna i lungtang vah a leihleetta hi.
Khrist sihna ah Pathian lungsiatna latsah in a um
6Ajiahchu i haat louh laiin, a hun tahin Khrist chu Pathian ngaihsahloute diingin ahung sita hi. 7Bang jiahin ahiai i chih leh midihtat luang a sih mi a ut khol sih diing a, ahiinlah mi hoih luang a sih chu mi khenkhat in a ngap meithei hi. 8Hizongleh misualte i hihlaia Khrist i luang a ahung sihna ah Pathian in ahung lungsiatna chu phattuaahin a langsahta hi. 9Hubanah, a sisana siamtansaha i um nungin amah jalin lungthahna apatin hutdam in i um diing uhi. 10Ajiahchu meelma i hih laia bawn a Tapa sihna jiaha Pathian toh kilemta i hih unchu, kilema i um zohnung un a hinna jiahin hutdam in i um ngei diing uhi. 11Huchi chauh zong ahi sih a, tu a tatna i muhna i Lalpa uh Jesu Khrist jalin Pathian ah zong i kipaah uhi.
Adam jala sihna leh Khrist jala hinna
12Huchihjiahin, mi khat jiaha sual khovel a ahung luut a, sual jiaha sihna ahung luut mahbangin mi zousiah ana sualtaah jiahin sihna in mi zousiah a jelsuahta hi. 13Ajiahchu daan umma tanin sual khovel ah a um a; hizongleh daan um louh laiin sual chu sual a ngaih ahi sih hi. 14Hizongleh Adam a kipana Mosi tanphain Adam sualna banga sil bawlsual loute tungah zong sihna in vai a hawm hi; Adam chu a hung diingpa etsahna ahi. 15Hizongleh silthawnpiah chu giitlouhna toh kibang ahi sih hi. Ajiahchu mi khat giitlouh jala bawn mi tampi a sih va ahihleh, Pathian hehpihna leh, mi khat Jesu Khrist hehpihna jiaha silthawnpiah chu mi tampite tungah vuhin a um ngei diing hi. 16Huleh silthawnpiah chu mi khat sual jiaha sil hung um toh a kibang sih hi; bang jiahin ahiai i chih leh siamlouh tansahna vaihawmna chu mi khat jiahin ahung um a, hizongleh silthawnpiah chu gilou tampite jiahin siamtansahna diingin ahung um zaw hi. 17Ajiahchu mi khat giitlouh jiaha sihna in hu mi khat jiah mah a thuneitah a a um ngal inchu, hehpihna nasatah leh, dihtatna silthawnpiah mute’n mi khat, Jesu Khrist jiahin hinna ah vai a hawm ngei diing uhi. 18Hujiahin mi khat giitlouh jiah a siamlouh tansah na vaihawmna chu mi zousiah tungah ahung um a; huchimahbangin mi khat dihtatna silbawl jiahin hinna muhna diingin siamtansah na silthawnpiah chu mi zousiah tungah ahung um hi. 19Ajiahchu mi khat thuman louh jiaha mi tampite misual a kihihsah mahbangin, mi khat thuman jiahin mi tampite midihtat hihsah ahi diing uhi. 20Huleh giitlouhna a tamsemna diingin daan ahung um behlap nalai a. Hizongleh sual a punna phot ah hehpihna zong a pung zosem hi. 21Sualin sihna a vai a hawm mahbang a, hehpihna in dihtatna jala kumtuang hinna tanna diing khop a i Lalpa uh Jesu Khrist jiaha vai a hawm theihna diingin.
Currently Selected:
ROMETE 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
