ROMETE 9
9
Israelte gin louhna jiaha Paul lungkhamna
1Khrist ah thutah ka soi ahi, ka zuau sih, Hagau Siangthou jiahin ka sialepha heetna in zong ahung heetpih hi. 2Ka lungtangah hahsatna nasatah leh lungngaihna daai thei lou ka nei hi. 3Bang jiahin ahiai i chih leh ka unaute, tahsalama ka chipihte luang in keimah Khrist kawm apat bawltuam khopa haamse thuaahin um leng ka chi hi. 4Israelmi ahi ngal va; ta hihnate, loupinate, thuhunte, daanthu piahnate, Pathian natohnate leh thuchiamte bang amahuh neih ahi a; 5Pulepate amahuh a ahi a, huleh tahsalam thu ah Khrist zong amahuh laha kipana hung pawt ahi; amah chu sil zousiah tunga um, kumtuanga paahtawi taah Pathian ahi. Amen.
Israelte kawma Pathian thuchiam a thawn sih
6Hizongleh Pathian thu bangmahlou banga umta ahi sih hi. Ajiahchu Israel haahte a bawnun Israel mi ahi veh sih uhi. 7Abraham haahte ahih jiahun zong a bawnun tate ahi veh tuan sih uh; Isaak ah na haah a kichi diing, chih ahi zaw hi. 8Huchu, tahsa tate chu Pathian tate ahi sih va; hizongleh thuchiam tate chu Abraham haah a ngaih ahi zaw uh chihna ahi. 9Ajiahchu thuchiam hikhu ahi, Tubang hunin ka hung diing a, Sarah in tapa a nei diing, chih. 10Huleh hu chauh ahi sih; hizongleh Rebekah in zong, mi khat, i pu uh Isaak laha nau a paai laiin; 11Naupangte chu piang nailou in, silhoih leh silsia zong bawl nailou in, teel lam thu a Pathian thuguat a det theihna diingin, silbawl jiah hi lou a, a koutu deih jiah hizaw in; 12A kawmah, A upazaw in a naupangzaw nna a tohsah diing, Pathian in a chi hi. 13Jakob ka lungsiat a, himahleh Esau chu ka mudah hi, chih gelh bangin.
Pathian ah dihtatlouhna a um sih
14Ahihleh bang i soita diai? Pathian ah dihtatlouhna a um a adiai? Um lou hial. 15Ajiahchu ama’n Mosi kawmah, Ka khotuah ut photmah ka khotuah diing a, huleh ka lungsiat ut photmah ka lungsiat diing, chi'n ana soita hi. 16Huchi'n a deihpa jiahin ahi sih a, a taipa jiahin zong ahi diah sih, hizongleh a khotuahtu Pathian jiahin ahi zaw hi. 17Ajiahchu Pathian lehkhathu in Pharaoh kawmah, Hi jiahtahin ka hung tungding a, nangmaha ka silbawltheihna ka etsah theihna diing leh, leitung pumpia ka min a than theihna diingin, a chi hi. 18Hujiahin Pathian in a ut photmah a khotuah a, a ut photmah zong a soihahsah veu hi.
Pathian bangkim tung a thunei a hihna
19Nang in ka kawmah, Bang diinga ama’n i dih louhna hung kawh ahiai? A deihzawng kua’n a kalh ei? na chi ahi diing. 20Hilou, hizongleh Aw mihing, nang Pathian dawng vialtu koi na hiai? Silsia min a siamtu kawmah, Bang diinga hitobanga hung siam na hiai, a chi diai mah? 21Beel kheengtu in beelleitang khat apat beel khat deihum tah a kheeng diing leh, beel khat thulimlou tah a kheeng diing in, beelleitang tungah thu a nei sih eimah? 22Huleh lungthahna beel, mangthai taahte tungah Pathian in a lungthahna leh a silbawltheihna latsah ut a a thuaahzoh haamhaam leh bang a khawh diai? 23Huleh khotuahna beel, loupina tang diing a malai apat ana guatlawhte tunga a loupina hauhdan a suhlat theihna diingin. 24Hu khotuahna beelte chu, Judate lah chauh a kipan hilouin, Jentelte laha kipana zong kouhte, eihaw na chiang i hi uhi. 25Hosea lehkhabu a, Ka mi hi ngeiloute chu ka mite ka chi diing a, lungsiat ngei louhnu zong lungsiat nu ka chi diing. 26Huleh hichi ahung hi diing a, a kawmvah, Ka mite na hi sih uh, chih a umna ngei ah, Pathian hing tate vuahin a um diing uh, ana chih bangin. 27Huleh Isaiah in zong Israelte tungtaang thu ana taangkoupih a, Israelte zaw tui khang lian sehneel bangin tam zongleh uh, a gawt mawh chauh hutdam in a um diing uh; 28Ajiahchu Lalpa’n leitung a natoh tomkhat a bawl diing jiahin ama’n hu natoh chu a zou diing a, huleh dihtatna in a sutom diing hi. 29Huleh Isaiah mahin, Mipite Lalpa’n chi haahtu diing hung na hawisahlou hileh Sodom khua bangin i umta diing a, huleh Gommorrah banga bawl in i umta diing uhi, chia ana soilawh bangin.
Israelte chinlouhna san
30Ahihleh bang i soita diai? Dihtatna delhlou Jentelte’n dihtatna a phata uh ahi, ginna jiaha dihtatna chu. 31Hizongleh dihtatna daan delh Israelte’n hu dihtatna chu a phazouta sih uhi. 32Bang achih jiahin ahiai? Ginna in a delh sih va, daan silbawl a muhtheih banga a delh jiahun ahi. Ajiahchu puuhna suang ah a puuhta uhi. 33Ngai in, Zion ah puuhna suang leh daalna suangpi ka koih hi; koipouh amah gingta chu a zahtasah sih diing hi, chia gelh bangin.
Currently Selected:
ROMETE 9: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
