BOTHUBO 28
28
Jakob no Laban lau Pove
1Isak no Jakob ku puzu pa kumghatsu eno pa lakha ghi pi, “Noye Kanan limi lusawo onipu shiniepi kevilo. 2Mtazu Mesopotamia ghakhu lo oza papu Bethuel no kilo wuvelo, eno tilauno oza peu Laban no nga gholo lakhipe onipu shi lulo. 3Akughushu Lhou pelo okumghatsu peniu eno opiti kughukoluno opelo lighimi shilu peniu. 4Pano Abraham kukumgha otsu eno opiti tsu peni, tishi keu lono nono khipa yeghilo inami shi achekeno, Alhou no Abraham tsu keu yeghihu, omheghi shilu nani.” 5Tishieno Isak no Jakob puwuve. Pano Mesopotamia ghakhulo Aramiami Bethuel no nu Laban lau wuve. Laban ye Jakob ngo Esao pama paza Rebeka peu ke.
6Isak no Jakob kumghatsuno Mesopotamia lo puwuvekeu eno tilauno anipu lupeniye shikeu Esao no ithive. Isak no kumghatsu akelo “Noye Kanan limi onipu shinike lukevilo” pi kehu, 7Jakob no papu ngo paza pama gho lupuzu Mesopotamia lo wuve. 8Isak no Kananlimi ye pa lomokeu Esao no ithive puzu, Abraham nu Ismael lau wue. 9Eno paye anipu kutau akeqo nguno alau Ismael no nga Mahalat luve, liye Nebayot chepuke.
10Jakob ye Bersheba lono chesusu Haran kudau wuche. 11Pano a-a lakhi to kelo tsukinhe ilove kehu puthoye tile ngove. Pano tipa alo atu ikhisuwo pa kutsu kumkhu shipuzu ihozuve. 12Pano asamo pumokeuno akala lakhi ayeghi lono iku atsutsu toa. Alhou wu kungumino tipaulo ikuju iqiju akeu ithulue. 13Tile AMPEU no pa phivilo puthugho aghi keu ithuluno pano pi, “Niye AMPEU ke, opu Abraham Lhou eno Isak Lhou ke. Nono khipa shou ihozu anikeno ino no eno otikughukoqo tsunie. 14Otikughukono ayeghi mukhu jehi nani, eno otikughukono kipelau ngo kulolau, ahuu ngo apeu qhanhawo nani. Ino no eno otikughuko kumghatsu kehu toi ashiayeh kumtsuno pano kumghatsu peniye ivilo iniju nani. 15Hi ithilo, nono khile khile wunamu ino ogholo chenani eno oputukha sasu anani, ino hipa yeghilo osachile saghi nani. Kughengu ino ovilo pivekeu shikupumoke kuto niye khilemu oqhivemo nani.” 16Jakob no zuida thughi no pi, “Kuchouno AMPEU ye hipa-alo ani mu niye ti mthano ae!” 17Paye msaveno pi, “Hipa-aye kiutoi akumsapu kya? Hiye kutau ke kumo puzu Alhou ki eno kungugha kikhaghoe.”
18Jakob no inaqhe itheno ithu puzu pa kutsu mukhupesu zukeu tu ikhi pesu Alhou lau atushope qhieno tipa shou teli lepukuve. 19Tipa-a pesu pano Bethel#“Alhou ki” Tipau kiqiye kutsu. Azuuye tipa phu pesu Luz ipi cheke. 20Jakob no ashoqhi lakhi shi ghi ishi pie, “Tsala Alhou no isasu che aye eno ino izuwukeu lalo ikhe sasu wu eno chusho kepu itsu, aphimini ukepu itsu puzu 21alokughuno shi ipelo ipuno kilo deghilu peaye, tileno AMPEU pesu iLhou shinie. 22Atu hipau ino Alhou lau atushope qhikeu pesu Alhou ki shinie. Nono kiu itsuni keno tipau lono kuchouno ino chighi sajelo lakhi otsunie.”
Currently Selected:
BOTHUBO 28: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
