BOTHUBO 32
32
Jakob no Esao Kushonike Kuto
1Jakob ghi pashelo chesu izuche ike Alhou wu kungumiqono pa sasu kushoe. 2Kughou panongu ithulu keno Jakob no pi, “Hiye Alhou wu ghushi mie!” Ikehu pano tipa-a pesu Mahanaim kutsue, pa kiqi Alhou kua-a.
3Jakob no aghinimi hapuwu puzu Seir yeghi kudau Edom ghakhulo pamu Esao lau puwuve. 4Eno panongu vilo hitoi Esao putsalo pi ahza tsue, “oqeu Jakob no ishi pie, niye Laban gholo inami shi ghi hi kutolo acheke. 5Niye amshi, gadaha, bheri, ane eno aqepumi ngo aqelimi pighi acheni. Nono ikimiyeno ni ikhikulupu shini malaye hi aghini kishimi olau puwuani.”
6Aghinimiqono wupuzu ideghino ishi pi, “Ninguno omu Esao lau wuke paye osasu kushoniye chenie. Pa gholo timi 400 anie.” 7Ike Jakob ye ighono musa ichive. Pano pa gholo chekemi timi, bheri, ane, kemel, ishi aqo kinini shi kijeve. 8Pano ishi kumsu, “Tsala Esao no ighi puzu aqo atughiu ghiqhi ve namu aqo lakhiu likhimu poluve nani.”
9Tile Jakob no inikhue, “O ipu Abraham Lhou eno ipu Isak Lhou. AMPEU nono ivilo pikeuno, ‘No yeghilo eno nobolomi lau idewovelo eno ino akivishi opeitha nani’ ipi. 10Ni oqeu ye owu kupukini eno opukhubekulu puwutsukeu akimkheu mu ithulu kuzupu kumoe. Niye kiumu pemono ikusu likhi pesu Jordan kathae, eno itehi niye aqo kini shipesu chenie. 11Imu Esao ulono ixaphelu tsulopi oqhuiniju ani. Kughengu pano ighino ighiqhi eno aza noqo ngo anuliqo ghiqhi ishi venikeu musa anie. 12Nono piqhi puakeuno, ‘Kuchouno ino okivipu shitsuni eno azughilo asaye kihi kumla toi ino oti kughuko tsunie,’ ipie.”
13Tipaji paye tile zuve. Eno pa gholo lhoxu akeqo dolono pamu Esao agho tsukepu hipaqo kishe pesu qhie: 14Anequ 200, ane-tsu muku, bheriqu 200, bheritsu muku; 15akichhizu kusu kemel ati supuzu shighi, amshiqu lhobidi, amshitsu chighi, gadaha-qu muku eno gadahatsu chighi ishi. 16Pano pututa loji kututa shi qhino aqemi lakhi khi pelo ti jukuto penikeu shilu eno pa qemiqo vilo pi, “Izu-uno cheghilo eno aqo aqo dolo ado she-ghi wulo.” 17Pano aqeu atughu shichekeu vilo ishi pi, “Imu Esao no osasu kushono ovilo, ‘Noye khu-u timi kya? Nono hasachekeu lhoxu qoye khuu wu kya?’ ipi aye, 18noye ishi pilo, ‘Hipaqoye oqeu Jakob no wu ke. Pano hipaqo pesu impeu Esao agho chhe ani, eno pa ghi ni thiu chenie!’ ” 19Pano aqeu akiniu, akuthuu eno aqo kututa shi hasachekemi aqemi kumtsu vilo hi paphi shi ahza tsughi pi, “Esao no nongu sasu kusholu kelo nonguye hipa ghola lono pa putsa masae. 20Tinguno alauno nonguye ishi pilo, ‘Oqeu Jakob ye nithiu chenie!’ ” Kughengu Jakob no ishi kumsu, “Ino izuwuno agho chhe puwu akeuno pazulo igi kusho shinie, eno tipathiuno pa sasu kushonie, pano ikipimi qhive tsunimala.” 21Ikehu pano agho chhe keu pa zuu puwuve, eno paye tipaji aqo lakhi gholo ngove.
Jakob no Peniel lo Kukhakeu
22Tipaji Jakob no ithu puzu pa nipu pama eno pa qeliu kini eno panu chighi qhaqhi sasu Jabok ghoki katha chekeu-a lono kathaikuvepe. 23Pano panongu sawo aghoki katha ikuvepe eno pano kiu pechekeno kumtsu tsupukuve. 24Jakob ye palikhi ngove. Ike timi lakhino tsutho moke kuto pasasu kukhae. 25Timi huno Jakob khaqhimla kepushive kehu pano Jakob yikulo butsu, ike Jakob yiku sukijivetsu. 26Timi huno pi, “Tsuthove ake ipelo wuve pelo.” Ikemu Jakob no khochile pi, “Nono ikumghatsu mokekutolo niye opelo wupe moe.” 27Timi huno ishi iniju, “Oje khuu kya?” Pano pi, “Jakob ke.” 28Timi huno pi, “Hinguno hilauye oje Jakob ipi moni, ikemu Israil ipini. Kughengu nono Alhou sasu eno timi sasu kukhakulue eno okhaqhilu pemoe.” 29Jakob no pi, “Oje ivilo pitsulopi oqhuiniju anie.” Ikemu pano khochile pi, “Kushiniye noye ije iniju ani kya?” Eno pano Jakob kumghatsue.
30Jakob no pi, “Ino Alhou sasu kinheqhi kusholue tishimu niye xuaghipeke.” Ikehu tipa-a pesu Peniel ku-tsue, pa kiqi “Alhou gi.” 31Pano Peniel qhiveno wuche kelo tsukinhe ipeghive eno pa yiku ghenguno khulu khuluve. 32Tighenguno ishi kutolo Israil miqoye ayiku kikimelo ashi akeu chuchemoe. Kughengu timi huno Jakob yiku bokhulo anhu akeu buve tsuke.
Currently Selected:
BOTHUBO 32: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
