BOTHUBO 6
6
Timiqo Lhoksakugha
1Tipau ghulokilo ayeghi shou timino ikosu wove eno totimi kutomo punu qhiwuve. 2Alhou nu noqono totimi hipaqo ithulu eno juvi aghi kelauye, panonguno lunishikeu kishe sawo anipu shie. 3Tileno AMPEU no pi, “Inguaghaye timi lolo pulhapuju apemo nani, kughengu paye puhave kepu lhoxuke. Hinguno hilau panonguye ampe 120 nguno alau xupemoe.” 4Tipau ghulokilo ghi tipathiu ghi ayeghi shou timi kuloghiqo acheke, panonguye Alhou nunoqono timiqo nga sasu zuke lono punuke nuliqoke, kha-ghilo panonguye aghutomi eno aje kipimi ke. 5Timiqo lhoksano ayeghi shou alaushi kighishe akeu eno timiqo mulolo alhoksa likhi pulhapuju kumsu hawo akeu AMPEU Alhou no ithuluve. 6Kushiniye ayeghilo timi lhosu kela ipi AMPEU ye pa mlo kighishi shiauve eno tino pamlo putakihi auve. 7Ikehu pano pi, “Ayeghi shou timi lhoxu lhosu puakeu ino puhavenie. Timi na, tughashi na, itikiche na aghauqo pinamu ino kumtsu pughavenie, kughengu ino panongu lhokeulo imlo kighishipu auvae.” 8Ikemu AMPEU no Noha ye kupuqhiyi ithulue.
9-10Hipaqono Noha laghaqo: Pano anu kuthu shie, Shem ngo Ham eno Jafet. Noha ye pano tiqhelimi gholo pa likhino amikuchou eno kikhikighiue, paye Alhou sasu kuposhughi xu ache. 11Alhou zulo ayeghiqha kumtsu shikupsapu shiauve eno hekiqhi bukiqhino chhitoive. 12Alhou no ayeghiqha jukelo ti shikupsapu shive, kughengu ayeghilo timi kumtsu pututa shelo shikupsapu shiwoveke.
Noha Shukaki
13Ike Alhou no ishi Noha vilo pi, “Timi lhoxu kumtsu ghavenikeu izulo auvae kughengu panongu vechewo ayeghilo hekiqhi bukiqhi chhitoivae, Julo, ino panongu ayeghi lono kutsaveniae. 14Osala suchosu suwo ashukaki lakhi shilo, tile kokuthabo shilo, eno ata pesu alou eno ashou mekhalo. 15Ashukakiye hipahi shilo: akushu launo miter 133, akije launo miter muku kini eno akiqhe launo miter chighikuthu. 16Ashuka nhaqhi kepu shilo eno nhaqhi kepu ngo ashukaki kichi dolo miter tuxa akighipe shewolo. Akijolha kuthu shilo eno ajibolono ahukikha shelo. 17Julo, ino ayeghi shou azu kuqo sughini cheni. Atsutsu qholo eno ayeghi shou atuthu sheakeu lhoxu thaqhu kumtsu puhaveni eno thive nani. 18Ikemu osasu ino puloshoqhi lakhi shini, no ngo onuliqo, onipu eno anunoqo nipu ngo ishi ogholono ashukakilo iloluve ni. 19Akuxu akeu lhoxu jeli kumtsu lono kinini sawo ashukalo sulo. Panongu ogholo puxupe puanike ghenguno tuna lakhi khi shilo. 20Aghauqo jeli, tughashi qo jeli, eno ayeghilo itikiche qo jeli kumtsu lono kinini ogholo saghilo ti puxupe puanike. 21Achuqupu aghikeu jeli kumtsu pekutsu sawo ogholo qhilulo, tino osala eno panongu sala achuqupu shilu nani.” 22Alhou no pavilo shilo pikeu toi Noha no ti kumtsu shie.
Currently Selected:
BOTHUBO 6: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
