JOHAN 4
4
Jisu ngo Samarialimi
1Johan nguno Jisu no alau shi kutsuno baptiz shitsuno akhopemi shiluve anipikeu sutsa Farisimino chilukeu Jisu no ithive. 2(Mtsuqheyi keuloye Jisu pa ampino kumo puzu pa khopemino timi baptiz shitsu ake.) 3Jisu ye Judia qhive puzu Galil lo idewo, 4ike paye Samaria yeghi kathasu wukepushive.
5Ikehu paye Samaria lo Sukhar ipichekeu taun lo ighi, tiye Jakob no alu lakhi panu Josef tsukeu kupunu loke. #Bothu 33.19; Joshu 24.32 6Jakob no chhusukeu zukikhe tile ae, ike Jisu ye alache chekehu akulhoshive puzu azukikhe phivilo iqa ae. Tiye pucho-mughu shiae.
7Samaria lono totimi lakhi azu puniye ighi, tile Jisu no li vilo pi, “Azu ipiyelo.” 8Kughengu pa khopemiqoye achuqupu qhunike ghenguno taun lo wuve. 9Samaria limi huno Jisu vilo pi, “Noye Judami lakhi puzu ni Samaria limi vilo kishieno azu piyelopi khuani kya?” (kughengu Judamiye Samariami sasu kuhali chemoe.) #Ezra 4.1-15; Nehe 4.1-2 10Jisu no khochile, “Alhou no agho tsukeu nono ithi aghike aye eno ovilo azu piyelopi khuakeu ithiaghike aye, noye pa vilo akuxupu zu khunicheke eno pano tipau otsunicheke.” 11Totimi huno pa vilo pi, “Akijeu, noye shophelukepu kiumu kuha eno azukikheye thonheyi ishike, noye kishi shino akuxupu zu aghini kya? 12Nisu Jakob no azukikhe hipau nitsuke, pa ghi, pa tianuli eno pa tsuaqu kumtsu hipa zukikhe zu shocheke. Noye nisu Jakob nguno akijeu kesha?” 13Jisu no li khochile, “Hipa zu shokemi kumtsu tughuthi kitheve nani, 14ikemu khunono ino tsukeu zu shoni keno paye khilemu tughuthi kithemo nani. Ino azu pa tsukeu huno pa lolo lhokta kuxu zupuki lakhi shi qoipeghi ache nani.” 15Tileno totimi huno pi, “Akijeu, azu tipau itsuvelo, tishiaye niye tughuthi kithemoe, momu azu puniye hile ighi moake.” 16Jisu no pi, “Wolo, eno okimi kusasu ighilo.” 17Ikemu atotiu huno pi, “Niye akimi kuhae.” Jisu no li vilo pi, “Noye akimi kuhake pikeu tiye achipishivae. 18Kughengu noye akimi pungu acheke, eno nono itehi sasu akeu timi huye okimi kumoe. Noye kuchou tsa pivae.” 19Tileno totimi huno pi, “Akijeu, ino juakelo noye tungkupmi lakhie. 20Ni puasuqoye naghuto hipau lono Alhou mllacheke, ikemu no Judami no timiye Jerusalem a-lono Alhou mllakepue pi pichenie.” 21Jisu no li vilo pi, “O totimi, ipululo, naghuto hipaulo na Jerusalem lonamu Apuh mllamo kepu ghuloki ighi nani. 22No Samariamiye nonguno khuu mlla cheni keno tipau mthae, ikemu ni Judamiye ninguno khuu mlla cheni keno tipau ithi anie, kughengu xakulupuye Judami launo ighike. 23Ikemu kucho kuchoshi mlla kemino Alhou Ghungu eno kuchou lono Apu mlla nikepu ghuloki wochea eno tiye itehike. Kughengu Apuye hitoi kemiqono pa mlla penike phu cheni. 24Alhou ye Aghunguke eno pa mlla nikemiqoye Aghungu kuka eno kuchou lono pa mlla masae.”
25Totimi huno Jisu vilopi, “Mesiya khuu Khristo ipi cheni keno tipau ighi nani kepi ino ithi ani. Kughou tipauno ighini keno pano thwokha nivilo lhe nanike.” 26Jisu no li vilo pi, “Ni oputsa akeu huno pake.”
27Tishi ake lono akhopemi ighi eno Jisu no totimi lakhi sasu kuptsa aghikeu ithulu puzu panonguye shishe akichiqhive. Ikemu panongu gholo milakhi nomu li vilo, “Noye kiu phu cheni kya?” momu Jisu vilo, “Noye kushiye li putsa ani kya?” ipi inijumoe.
28Tileno totimi huye li zuhughi qhiveno taun lo idewove eno tilauno timiqo vilo pi, 29“Timi lakhino ino kiu mla puani keno thwokha lhepesu ivilo piveake ighino timi tipau julo.” 30Ike timiqono taun lono chesu ipeveno Jisu lau ighi.
31Tishi akelo, akhopemiye Jisu vilo ishi qhuiniju pi ae, “Akukutsuu, kiuala ta chujulo!” 32Ikemu Jisu no khochile, “Ino achuqupu chukepu akeu nonguye mthae.” 33Akhopemi lakhino lakhi vilo ishipi, “Khualano achuqupu suwo pa tsuvea keshela?” 34Jisu no panongu vilo pi, “Ichuqupuye khuno ipuwukeno tipau gho apulou shinikeuke eno pa kumla shiqhivetsu nikeu ke. 35Nonguye ishi pichekeu anike kumo kesha? ‘Aqhi bidi aghieno ghile huchenie.’ Ino nongu vilo piani, pishipuwo aluqa julo, ayegha ipeghiva eno ghile hukepu shivae. 36Ghilelo huakeu timi huye ajume ithuluvae eno lhokta kuxu ghenguno athi pekutsu ani; tishianguno xusukeu ngo ghile huakeu pama kumtsa alovi kuqhanike. 37Kughengu ishi pichekeu huye kuchouke: ‘Milakhino xusu cheni eno milakhino ghile hucheni.’ 38Nonguno imesupuamokeu lulo ghile hupeniye ino nongu puwuke; kutamino imesupuake eno nonguye kutamino imesupuakeulo alla sulu anie.”
39Totimi huno, “Ino mlapuakeu kumtsu pano ivilo lhevetsue” ipi pikeu lono taun tipaulo Samariami kutomono Jisu pululuve. 40Ikehu kughou Samariamino pa lau ighi keno, panoqo gholo ngotsulopi panonguno Jisu qhuiniju. Ike Jisu ye tilau atsala kini ngove.
41Jisu no pikeu tsa chilukeu lono timi puzuu nguno alauno pululuve, 42tipaqono atotiu vilo pi, “Nono pikeu ghengu likhino puluke kumo puzu ningu ampino pano pikeu chiluvae, eno kuchouno paye ayeghilomi xakuluu kepi ninguno ithivae.”
Ayehkipemi nu Shipivi
43Ghulo kini ngove kethiu Jisu ye tileno cheve eno Galil lo wuve. 44Jisu ampino pi, “Tungkupmi lakhiye pano likhi pano yeghi loye agigihu tsuchemoe.” #Mt 13.57; Mk 6; Lk 4.24 45Kughou pano Galil lo ighikeno Galilmino akivishi pa ikhilu, kughengu panongu ghi Jerusalem lo Hechekulu Ghulhu lo wuke eno Jisu no aghulhu ghulokilo kiu shikeno thwokha ithulupuae. #Jn 2.23
46Ike Jisu ye Galil Kana phulo pano azuno atsayiji kughulhotsu keulo itaghi ighi. Tilehi ayehkipemi lakhi-a eno panuye Kapernaum lo suae. #Jn 2.1-11 47Jisu ye Judia kudauno Galil lo ighivae pikeu timi huno chilu kelo pano Jisu lau wu eno pa vilo Kapernaum lo ighino panu shipivi tsulopi qhuiniju, kughengu panu akithi kumlhoshi sua. 48Jisu no pa vilo ishipi, “Nonguno amchipu eno akumzapu ithumlake kutolo nonguye pulumoe.” 49Ayehkipemi huno pa khochile, “Akijeu, inu thimphi lono ighitsulo.” 50Jisu no pa vilo pi “Wolo, onuye xu nani!” Timi huye Jisu no pa vilo pikeu tsa puluve eno paye wuve. 51Pano alalo wuchephi lono pa qemino pa nuye xunichenie pi pa vilo pi ighi! 52Panuye kiu ghuloki lono akusukuta shilu kela pano panoqo vilo iniju. Tile panonguno, “Ighina ayi lakhi kihe lono pa ghakimki kutaveke” ipi khochile. 53Tileno apuhno kumsuluvekeuno tiye Jisu no pa vilo, “Onuye xu nanie” ipikeu ghuloki lono kena pi ithive. Ikehu pa eno pa kibolomi kumtsuno pululuve.
54Jisu no Judia lono Galil lo ighi kethiu amchipu kumla shikeu hino akiniuke.
Currently Selected:
JOHAN 4: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
