LUK 18

Chimemi eno Kughakuthami

1Tileno Jisu no hipau holetsa panongu vilo pi, tiye panongu pelo pulhapuju akighini shi eno khilemu aghuthisu pemonikepu panongu shikani kehue. 2“Aphughi lakhilo kughakuthami lakhi acheke paye Alhou msakeu momu timi gihukilekeu kuhakemi. 3Aphughi tipaulo topuchimemi lakhi ache, lino pa lau ighieno ishi piche; ‘Ighumi launo isaphulo.’ 4Ado kushuwa dolo kughakuthamiye pulomoqhiyi ake, ikemu ashekha lauye li vilo ishipi, ‘Niye Alhou sukumsa kuha momu timi gihukile keu kuha kemu, 5chimemi hipauno hijejehi ipunaqhi akeu ghenguno niye li saphuvenia kena: ti kumoaye lino ighi auvenia eno izupuzu auveni cheni!’ ” 6Tileno Ampeu no pi: “Ti chighichilai keu kughakuthauno kiu piakela inilo. 7Tishiaye Alhou ye paw timi kishekiphemi khunoqono putho pucho pa lau ighamuku akeu saphumoni kesha? Paye panongu kuphunikeu munu auve nani kesha? 8Ino nongu vilo pini, paye panongu saphu-ghi kei kughathavetsu nani. Ikemu Timi Nu huno ighi kelo ayeghilo pa pulukemi phulu nani mala?”

Farisimi eno Zahme Kuqhami

9Itaghi Jisu no pikeu holetsa lakhi hi ani. Hiye timi khunoqono pano mlolo panoye mzuchoi xuchekemi pi kumsu puzu kutami thaigha cheni keno tipaqo lau pike. 10“Ghuthu lakhi timi kini achinekilo inikhuniye iloe, lakhino Farisimi, kutami lakhiu huye zahme kuqhami. 11Farisimi huno pa kutashi puthughono ishi inikhu: ‘Alhou, ino oshikimthi akeuye kutami hutoi niye suxakulumi, kusakughami, salhashupumi kumoe. Momu zahme kuqhami hupau toi moe. 12Niye apinye dolo ghulo kini kumvu cheni, eno ino ala shikulu kumtsulo chighi saje lakhi pe otsu cheni.’ 13Ikemu zahme kuqhauye putou puthugho puzu pa gi ghi atsutsu kudau mu peqhemo, ikemu amlo ghimeshi pa mla khukhu ghi pi. ‘O Alhou, ikimiye tsulo niye axinemi lakhi!’ ” 14Jisu no pi, “Ino nongu vilo pini, timi hi ashekhauno Alhou lau amikucho shilu puzu pa kilo wovae, eno Farisimi huno kumoe. Kughengu khuno alikhi akughape qhemghai nikeno pa kughape kuchunive nani ikemu khuno alikhi akughape kuchuni nikeno pa kughape qhemghai tsu nani.” #Mt 23.12; Lk 14.11

Jisu no Itimiqo Kumghatsu

(Mt 19.13-15; Mk 10.13-16)

15Timi khami ghi Jisu lau panongaqo saghi, pa pelo angaqo kumghatsu penike. Kughou akhopemino ti ithulu keno panongu sakiyi. 16Ikemu Jisu no itimiqo pa lau saghi penikeu pi: “Itimiqo pelo ilau ighi pelo! Panongu lakha kevilo, kughengu Alhou yehkipe ye itimi hitoi keqo salae. 17Kuchouno ino nongu vilo pini, khunono itimi lakhi toi Alhou yehkipe salumo nikeno tile ilomla nani.”

Kinimi

(Mt 19.16-30; Mk 10.17-31)

18Judami sakiphemi lakhino pa vilo iniju: “Kutsuchekeu akiviu, lhokta kuxu ithulu kepushi niye kiu shi masa kya?” 19Jisu no pa vilo pi, “Kushiye noye ivilo akivi ipi ku kya? Alhou likhino thono khumu akivi kumoe. 20Ahzakutsuqo hu nono ithi ani: ‘Salha kevilo, timi ghiqhi kevilo; puka kevilo; akimiki shepe shikevilo; opuaza gihulo’ ” #Ipe 20.12-16; Zaki 5.16-20 21Timi huno khochile pi, “Ino apumi shiaphi lono hipaqo zahkutsu kumtsu pelu ighivae.” 22Jisu no kughou hi chilu keno, pa vilo pi: “Noye itaghi avehu lakhi shikepushi aphie. Okua kumtsu jevelo eno jelukeu pe kumlhomi kijeve tsulo eno noye kungughalo akini khuki aniake; tishieno noye ighi puzu ipapelo.” 23Ikemu kughou timi huno hipau chilu keno paye ighono amlo save, kughengu paye ighono kinimi lakhi kehu.

24Jisu no paye amlo sa akeu jupuzu pi, “Kinimi no Alhou yehkipe lo ilolu nike kiutoi kushokutsupu kela! 25Kinimino Alhou yehkipelo ilolu nikeuye kemel no ayipuki lono pili susu wuve keuno akumlaue.” 26Tileno hi chilukemino pa iniju, “Tishiaye, khuu xakulupu kya?” 27Jisu no khochile pi, “Timi ghenguno kiu kushokutsu keno Alhou ye shikulupue.”

28Tileno Pitor no pi: “Julo! Ninguye opapeniye ningu kibo qhikhave ake.” 29Jisu no panongu vilo pi, “khunono Alhou yehkipe ghenguno akibo momu atianuli qhiveni keno, 30hipau ghulokilo pano qhivekeu nguno alau ithuluchile nani, eno ighinikeu ghulokilo lhokta kuxu ithulu nani.”

Akuthuu Jisu no pa Kithi Vehu pi

(Mt 20.17-19; Mk 10.32-34)

31Jisu no akhopemi chighi kini kutashi sawu puzu panongu vilo pi, “Inilo! Ninguye Jerusalem lo wuni cheni, khilehino tungkupmino Timi Nu vehu yepe puakeu thwokha kupuni chenikeno. 32Paye Judakumomi ulo phesuve puzu thaigha, shikukujo eno musute pukupe nani. 33Panonguno pa he pa ghiqhi nani, ikemu atsala akuthunilo pa xuputhuve nani.” 34Akhopemiye hipaqo vehu lakhimu ithi kuthumo, hipaqo tsa kiqi panongu launo kusuve eno panonguye pano pikeqo mthae.

Anhethi Kighicheu Shipivi

(Mt 20.29-34; Mk 10.46-52)

35Jisu ye Jerikho kupunu ghi chechea, ike anhethi kighichemi lakhi ala phelo iqaghi khuchua. 36Kughou aqokitikhino pa hechewu chekeu chilu keno pano iniju, “Hiye kiu kya?” 37Panonguno pa vilo pi, “Nazaret no ghami Jisu no hechesu wuchenie.” 38Pano ighamuku— “O David nu Jisu! Ikimiye kutu tsulo!” 39Azuu chechekemiqono pa lomi pi eno pa vilo inaqhoivelo pi. Ikemu pano alau shi ighamuku “O David Nu, ikimiye kutu tsulo.” 40Jisu no ngove puzu anhethi kighicheu pa lau saghi lopi ahza tsue. Kughou pano kupunu ighi keno, Jisu no pa vilo iniju, 41“Ipelo oghenguno kiu shitsu peni shi ani kya?” Pano pi, “Akijeu, niye ithulu kithe nishi anie.” 42Tileno Jisu no pa vilo pi, “Ithulu kithevelo, okupuluno opelo viluvae.” 43Paikhavi lono paye ithuluve eno Alhou shikimthi ghi Jisu pape wuve. Eno timi kumtsuno ti ithuluno Alhou akishe tsue.

Currently Selected:

LUK 18: SUMIBSI

Highlight

Copy