LUK 4

Jisu Ghukuju

(Mt 4.1-11; Mk 1.12-13)

1Jisu ye Aghungu Kimthe no chhitoi puzu Jordan lono xaideghi, eno Aghungu no aghasalo sawuve, 2tilehi atsala lhobidi dolo paye Tughamino ghuju ae. Tipa dolo paye kiumu chumoe eno kughono hipaqo ashekha shive keno paye mzuthive.

3Tughami huno pa vilo pi: “Nono Alhou Nu keaye, atu hipau ahza tsuno asho kughulhovelo.” 4Jisu no pa khochile pi: “Kucho yesulo ishi yehpuani, ‘Timi ye achuqupu ghengu likhino xulu chemoe.’ ” #Zaki 8.3

5Tughamino pa sasu kunguu wuve eno anhekutsu khavi lono ayeghi wu akukaqha kumtsu pa piye, 6eno pa vilo pi, “Ino hipaqo kuka eno ajukuvu kumtsu pe otsuvenie, kughengu hiye ikhiphepe itsu puani eno ino khu khumu tsunishikeu tsuluvi. 7Nono itsaqi imlla aye hi kumtsu owu shive peni” 8Jisu no pa khochile ghi pi: “Kuchoyesulo ishi yepuani, ‘Noye Ampeu oLhou mllalo eno pa likhi huthulo!’ ” #Zaki 6.16

9Tithiu Tughamino Jerusalem lo pa sasu wu eno achineki kutsuqalo pa kughuqa, eno pa vilo pi: “Nono Alhou Nu keaye, olikhi okutoshi hileno ilheqivelo. 10Kughengu kuchoyesulo ishi yepuani, ‘Alhou no kungumi hapesu otucholuvepe nani.’ #Leshe 91.11 11Itaghi ishi pipuani, ‘Panongu uno okhapeluvepe nani, tishikeu lono atu shou opukhu kutsusuluno sakehu.’ ” #Leshe 91.12 12Jisu no pa khochile, “Kuchoyesu lono pi, ‘Noye Ampeu oLhou ghuju kepu kumoe.’ ” #Zaki 6.16 13Kughou Tughamino thwokha la lono Jisu ghuju tave keno pano ado kivi ithulu moke kuto pa pheve.

Galil lo Jisu Kumla Huthu

(Mt 4.12-17; Mk 1.14-15)

14Tithiu Jisu ye Galil lo ide ighi, eno Aghungu Kimthe kuka pa gholo ae. Ike pa ghiliye tipa sukumxa kumtsu vekuphave. 15Pano panongu Sinagog qolo kutsu eno kumtsuno pa sheqhe.

Nazaret lo Jisu Milive

(Mt 13.53-58; Mk 6.1-6)

16Tithiu Jisu ye pa saputhu keua Nazaret lo wu eno apineni pa lhoayehlo shichekeu toi Sinagog lo wu. Pano kuchoyesu phiniye puthugho. 17ike Isaya tungkupu kaku ikhipe pa tsu. Pano likukuzu kaku lhaphe kelo hi yepuaghikeu ithulu:

18“Ampeu Ghungu ishou ani,

Asutsa kiviu kumlhomi lau asheshu penike pano teli pe ni nukishetsue,

Akughumi lau khakiqhi kutughu

penike, eno anhethi ichekemi lau ithukulupu sughi penike ipuwue.

Nedaqoda puakeqo phepuwu penike ipuwue.

19Eno Ampeu no pawu timi xalunikeu mipe pithi penike ipuwue.” #Isa 61.1-2

20Jisu no kaku hu likuzuveno akheu tsuchileve puzu iqave. Sinagog lo akemi kumtsu panongu nhethi sukuqumono pa jua. 21Pano panongu vilo pithu: “Hi phisukeu nonguno chiluke toi, kuchoyesu tsajo hipau ishino shikupu anie.” 22Eno kumtsuno pa shepekeu shie eno pa kichi lono kupukini tsa pikeulo akumzaqhiyive; eno panonguno pi: “Hiye Josef nuke kumo kesha?” 23Pano panongu vilo pi: “Mtsuqheino nonguye ivilo hipau tsa pi nani,’Shikipiviu, olikhi oshipivivelo’ eno ‘khipaqo Kapernaum lo shiepi ninguno chilukeno, nophu yina hilehi ghi tipaqo shilo!’ ” 24Pano pi: “Kuchouno ino nongu vilo pini, tungkupmi lakhiye pano phuyina loye pa ikhilu chemoe. #Jn 4.44

25“Ikemu kuchouno ino nongu vilo pinikeuye, Elija ghulokilo Israil lo topuchimemi kutomo ache kelo ampe kuthu aqhi tsugho ghumove kehu eno ayeghi kumtsulo puqumiye kije ave; #1 Kuka 17.1 26tishimu Elija ye panongu lakhi laumu puwu moe, ikemu Sidon yeghilo Zarefat phulo topuchimemi lakhi lau likhi puwue. #1 Kuka 17.8-16 27Elisha tungkupu ghulokilo Israil lo apughami kutomo ake, tishimu Siriami Naman thono kutami lakhimu shikimthe tsumoe.” #2 Kuka 5.1-14 28Panonguno ti chilukelauye kumtsuno amlo ide keuno chhitoive. 29Panonguno ithuno pa sunhe sasu aphughi lono ipeve, eno panongu phughi shikeu toghi nhekikhi lo pa sawu, eno pa kughape atuxulo kulusuniye shie. 30Ikemu pano panongu puxusu pa lalo chesu wuve.

Tughakusa Akemi Lakhi

(Mt 1.21-25)

31Tithiu paye Galil lo Kapernaum phulo iqive eno apineni timiqo kutsue. 32Panonguye pa kukutsulo akichiqhive, kughengu pa tsalo akuka ae. #Mt 7.28-29 33Ike Sinagog lo tughakusa ghungu sa-akemi lakhi ae eno pano asutsa vekipighi ighamuku pi: 34“O Nazaret no ghami Jisu, noye ni pelo kishive peniye kya? Noye ningu kutsanike ighi ani kesha? No khuu keno ino ithi ani, noye Alhouw Akimtheu Lakhi ke.” 35Ikemu Jisu no pa lomipi; “Inaqhoi velo! eno pa launo ipeghivelo.” Tughakusano panongu zulono timi hu sunhekuluqhive ikemu kiumo ghime mono pa launo ipeve. 36Timi kumtsu akichiqhiveno lakhino lakhi vilo pi, “Hiye kiu shivetsu anikya? Kughengu pano akuka lono tughakusa ghungu ahza tsu kelo panonguno ipevae.” 37Jisu ghili kughakeuno tipaqha kumtsulo vekuphave.

Jisu no Kutomo Shipivi

(Mt 8.14-17; Mk 1.29-34)

38Sinagog lono ipe kethiu Jisu no Simon kilo ilo. Simon paniye mqhomzai aghamiki aghi eno timiqono li ghenguno Jisu vilo pi. 39Pano ighi eno li phivilo puthugho puzu aghakimki lomi pi eno tino li qhive. Paikhavi lono liye ithughi luve eno panongu lamlue.

40Avela shivekelo timi ajeli kusu lono su akhakemi panonguno pa lau saghi. Pano lakhi khi shou pa- u be eno panongu shipivitsu. 41Tughami ghi timi kutomo launo ipeghino ighae, “Noye Alhou Nu ke.” Ikemu Jisu no panongu lomi pi eno panongu pelo atsa pipemo, kughengu tughamino paye Mesiya kepi ithiakehu.

Jisu no Judia lo Asheshu

(Mk 1.35-39)

42Atsala ipeghi kethiu Jisu ye cheve eno yenguike alo wuve; ikemu aqokitikhino pa phujua. Panonguno pa lau ighi eno panongu qhivepemo niye pukaputsa pa sasu ngoe. 43Ikemu pano panongu vilo pi, “Niye Alhou yehkipew Asutsa Kiviu aphu kutau loghi asheshu masa. Hipau ghenguno ipuwu puani ke.” 44Eno paye Judiaw Sinagog lo asheshu wue.

Currently Selected:

LUK 4: SUMIBSI

Highlight

Copy