LUK 8

Jisu gholo Totimi chekemi

1Tipa thiu Jisu no Alhou yehkipe sutsakiviu vekupha ghi aphughiqolo eno aphuqolo wue. Akhopemi chighikini ghi pa sasu che, 2tughakusa eno kusukini shipivive tsukemi totimi khami ghi che: Maria Magdoloni ipi kukicheu, li launo tughami tsuni haphevetsukeu ngo 3Herod ti anuli jukutsuu Chuza nipu Joana, Susana eno kutami kutomo ishi che. Totimi hipaqono panongu kua kini pesu Jisu ngo pa khopemi kuphu che. #Mt 27.55-56; Mk 15.40-41; Lk 23.49

Apitikive Holetsa

(Mt 13.1-9; Mk 4.1-9)

4Aphughiqo lono timino tamono wo kumqolu kelo Jisu no hipau hole tsa pi: 5“Timi lakhino apiti veniye wue. Pano vechekelo, apiti hami alalo vesu veno tiye nedaqodave eno aghauno ti mighive. 6Hamino atu kua yeghi shou vepukulu, ti lhoipeghi kemu ighuyive, kughengu tile thonitsanhi keu kuha kehu. 7Apiti hamino asahu gholo vesuve, eno asahuno tipa gholo lho ipeghino ti ghusuve. 8Apiti hamiye ayeghi kivilo vesulu eno lho ipeghino alothi aqhe kutolo pithilu.” Jisu no hipaqo piveno ighamuku pi, “Nonguno chikulupu kini aghi aye, inilo!”

Aholetsa Kiqi

(Mt 13.10-17; Mk 4.10-12)

9Kughou pa khopemino hipau hole kiqi iniju kelo, 10pano pi “Alhou yehkipe tuqhouqo ithipe nike nongu tsupe puani; ikemu kutami ghenguye ahole lonoke, tishikehu panonguno jupulaghi ithumla nani, eno ini pulaghi vetha mula nani.” #Isa 6.9-10

Apitikive Holetsa Hephopiye

(Mt 13.18-23; Mk 4.13-20)

11“Ahole kiqiye hike: apiti huye Alhou tsake. 12Apiti alalo vepukulu keu huye chiluvekemiqo; ikemu tughamino ighino panongu mlo lono atsa hu ikhi suwuve, panongu pelo puluno xalu nosakehu. 13Atu akeu yeghi shou vepuku keu piti huye khunoqono atsa chilu kelo alokivi shi ghi ikhilu; ikemu panonguye akuhu kuha: ado kitila ghenguye panonguno pulu ano ghukuju ighikeloye ikiqive cheni. 14Asahu gholo khipaqo vesulu keno panonguye chiluvekemiqo, ikemu pano likhi pano puloulo cheche kelauye panonguye kumsukimghe keu, kinikulu ayeghi hipaulo ghakiqipuqono pa qhasuve eno panongu lothi akite shilupemoe. 15Ayeghi kivilo apiti vesu lukeuye khunoqono atsa chilu eno aghokulu ngo amlo kivi xapusu kutuuno ikhilu keu lono athi pithi peghilu cheni.

Ali qholo Akulu

(Mk 4.21-25)

16“Khunomu akulu kuqu pesu alino qhove chemoe momu alipa qholo qhive chemoe, ikemu akulu kibepu shou qhi cheni, tishianguno iloghikemino akuvu ithulu nani. #Mt 5.15; Lk 11.33 17Kiu kiumu kusupua keuye ashou ipeghive nani eno nhapepua keuye phuluve nani eno ithive nani. #Mt 10.26; Lk 12.2 18Tishiaye, noye kishi ini ani kela kutokupuilo; kughengu khuno ani keno alau pesu tsu nani, eno kuhakeu launo pano kiu aniepi kumsu ani keno tighi ikhisuwuve nani.” #Mt 25.29; Lk 19.26

Jisu Paza eno pa Thikuzumi

(Mt 12.46-50; Mk 3.31-35)

19Jisu paza eno pa thikuzumi pa lau ighi, ikemu aqokitikhi ghenguno panonguye pa phivilo ighi mlano ake. 20Khamino pa vilo hipau pi, “Oza ngo othikuzumiye khalau puthugho ani, eno oputsa nishi ani.” 21Ikemu pano panongu khochile pi, “Iza eno ithikuzumiye khunono Alhou tsa chilukemi eno ti shichekeqono ke.”

Jisu no Pasapagha Ghasuve

(Mt 8.23-27; Mk 4.35-41)

22Ghulo lakhi Jisu no pa khopemi sasu ashuka lakhilo ilo eno panongu vilo pi, “Aizukucho hukukuu hechewuni nolo.” ikehu panonguno heche wuche, 23kelo paye zuauve. Pasapagha mulhuno aizukucho shou ikughi, eno ashukaye azuno chhitoive eno panonguye akuighupulo auve. 24Akhopemino ighino pa kudaghi pi, “Ampeu! Ampeu! ningu puhaveni cheae” Pano ithughi puzu amulhu ngo azu kighide lomi pi; eno tipaqono tavekethiu iquneive. 25Pano panongu vilo pi, “Nongu kupulu khile ani kya?” Ikemu panonguye akichiqhi msave, eno lakhino lakhi vilo pi: “Paye khuu keno amulhu ngo azu ahza tsukelo tipaqo ghi pa gholu kya?”

Tughakusa akemi Shipivi

(Mt 8.28-34; Mk 5.1-20)

26Panonguno Galil ghungulo Gergesan yeghilo ighilu. 27Jisu no amuku tokelo aphughi lono tughakusa alolo akemi lakhi ighino pa sasu kusholu. Paye aphi umokeu ado kushuwa shive eno akilo ngomo ikemu akumo qhokeu kilo acheghi. 28Kughou pano Jisu ithulu keno, ighaghi Jisu zulo ikiqiveno asutsa ighamuku ghi pi. “Alhou Ighono Akiqheu Nu Jisu, noye ni lau kiu shikepu ani kya? Ino oqhuiniju ani, ighime kevilo!” 29Kughengu Jisu no tughakusa vilo timi launo ipevelo pi ahza tsue. Ghuthu kutomo hino pa tsuquluveche eno ayikichhe kighino tshuno aghukhe shi anamu, paye ayikichhe kighi ghi suthaveno tughakusano hasasu aghasalo wuveche. 30Jisu no pa iniju, “Oje khuu kya?” Pano pi, “Legon,” kughengu tughakusa kutomo pa lou iloke. 31Tughakusano Aqoh #Grik lo Abyss lo panongu halesu kevilopi pa qhuiniju.

32Awo aqo lakhi tipa holo atolo nguchua; eno tughakusano panongu pelo tipaqo philo ilolu pelo pi Jisu qhuiniju. Pano ilolu nani pive. 33Ikehu tughakusano timi phi lono ipeghino awo philo ilove; eno awoqo kuchopu atuxu kudau kohakive susu aizukucholo ilo putsuqhive.

34Kughou awo khemino ti ithulu keno panonguye pove eno hipau vehu pesu aphughilo eno aphu aphulo vekupha wove. 35Timiqono kiu shivekeno juniye wukha, eno timiqono Jisu lau ighino timi khuu phi lono tughakusa ipeve keno aphi mini uno pa kukumsu achipi shighi Jisu pukhu philo iqa aghike ithulu; ike panonguye msave. 36Khunoqono ti ithuluve keno timiqo vilo timi huye kishi shipivive keno piwo. 37Tilehi Gergesan yeghi sukumxalo kuami kumtsuno Jisu vilo wuvelopi pithu, kughengu panongu kumtsu shishe msave; ikehu paye ashukalo ilono idewove. 38Timi khuu phi lono tughakusa haphevetsu keno pano Jisu vilo pa gholo chepe lopi qhuiniju; ikemu Jisu no pa puwove ghi pi, 39“Okilo idewolo, eno Alhou no oghenguno kiutoi mla keno piphe alo.” Timi huno wono aphughi kumtsu Jisu no pa ghenguno kiu mlatsu keno asheshu ae.

Jairus Nga eno Totimi lakhino Jisu Ku-uphi Bukeu

(Mt 9.18-26; Mk 5.21-43)

40Kughou Jisu no aizukucho tuxa kudau ideghi keno aqokitikhino alokivishi pa sasu kushoe, kughengu panongu kumtsuno pa khe ake. 41Tishi akelo Jairus ighi, paye Sinagog lo sakiphemi lakhi. Pano Jisu pukhu phivilo itsaqi puzu pa kilo ighitsu penike qhuiniju, 42kughengu pa nga lakhi likhi akeu khuu ampe chighi kini shiakeno, thiveniye ake. Ike Jisu no wuchekelo timiqono aqha kumtsu lono pa tsakibi khoyipe ake.

43Totimi lakhi ampe chighi kini ahji chijikeu lono suchekemi lakhi tile aghi. Liye kiu akeno shikipivimi launo akuchopu puwokhave, ikemu lakhi nomu li shipivi mlave. 44Lino aqokitikhi gholono Jisu thiu ighi eno pano uchekeu phishelo bue eno paikhavino lino ahji pochekeu tave. 45Jisu no iniju, “Khuno ibu kya?” Kumtsuno moe piwu khave, tile Pitor no pi, “Kutsuchekeu, timi aqokitikhino osuhupe ani eno otsakibi khoiyi pe anie!” 46Ikemu Jisu no pi, “Milakhino ibuvae, kughengu akuka ilauno ipekeu ino ithivae.” 47Ike atotiuno itshu mlakeu ithiveno lino khokhoshi ighi eno Jisu gizulo ikiqi puzu tile akemi kumtsu zulono lino pa vilo kushiye pa bu eno kishi paikhavi lono lino viluve keno pie. 48Jisu no li vilo pi, “Angao, okupuluno oshipivi luvae, aloino wolo.”

49Pano atsapiake mtsa Jairus ki lono timi lakhi asutsa pesu ighi. Pano Jairus vilo “Ongaye thivae, tighenguno kutsuchekeu shipuna kevelo.” 50Ikemu Jisu no chiluveno ighowo pi, “Msakevilo, pulubekeu likhi alo eno liye itaghi viluve nani.” 51Kughou pano aki tolukeno Pitor, Jems, Johan eno anga papu aza pama ishi thono kutami lakhimu pa gholo alou sailo moe. 52Anga ghenguno tile lakhi khino qanimulo ae. Jisu no pi, “Igha qa kevilo, liye zu ani kethono thimphie!” 53Panonguno pa junuqhi kughengu liye thive keu panonguno ithi ake. 54Ikemu Jisu no li u tsuquno kughi pi, “Ithulo, Anga!” 55Li kuxu ideghive eno tipa mtsa liye ithughive, eno kiuala chukepu pe li tsulopi Jisu no panongu hakite. 56Li puaza pamaye akichiqhive, ikemu kiu shiveakela khu vilomu pipemo nike Jisu no panongu piputove.

Currently Selected:

LUK 8: SUMIBSI

Highlight

Copy