NOONNA THLOU 8
8
Saul in Khakla ta Akchut
1 #
Noon 11:19
Mahlai achunna Jerusalem a am khakla anchunga tranga chut anmithronpei; raangroi noh a annaamte Judia mahche Samaria ram aveel apumtea inthektlamsei. 2Ril luut a amlot ei in Stephen ta anphuumpei, mahche amah turelna khalmo marhuuisei. 3#Noon 22:4,5; 26:9–11Chuta Saul in khakla ta ammaang, inn inna luut a, kupa kumei eita kai kaia simma athunei.
Samaria a Akthra Trong Anraan
4Ipek inthektlamma akseh mii eiin anseh ansehna a akthra trongta anraanpei. 5Philip in Samaria khuuboom khat a sehsa, mahche anmah kuunga Khrista ta sonna araanei. 6Mii khalmo tam in Philip trongta antheih in mahche daang atlohthlou jikchata anmuh in ril khalek veia amah in asonkhanna anril luutsa. 7Alamva akseengnoh li in aluutna mii ramkhanna ong onga inthruhsei, mahche pangneem akthi leh kehtlik miitam thrasei. 8Nga tloh a mah khuuboomna mii in khalmo anroomthoksei.
9Chuta akming Simon ta an ong mii khat am, amahva matsah a leiva tloh a khuuboomma Samaria na mii eita salung makhoua asih ei, amah in, keiva akthloimii angta ason. 10Mii andihrem nata anrolhrem phah a annaamtein amahkuunga anril maluut a ason, “Mahmii i Akliinta an ong Ringpu vaa tuui am mii khasa.” 11Mahche anmah in amahkuunga anril anmiluut, alamva lai khalmo soot a anmahta salung amkhouei. 12Chuta Philip in Ringpu kurung huunna mahche Jisu Khrista akmingta araan in amahta anmilotpei, mah khanna kupa kumei eita anluppei. 13Simon inkho amlotpei. Mahche Simon in alupche Philip soh inruui sehjousei, mahche Philip in daang leh salungkhouna kliinthlou jikcha atloh in amahva salungkhousa.
14Ipek Samaria na mii in Ringpu trongta anrouloh peita Jerusalem a ak am raangroi in antheihpeia, anmah in Pitar leh John ta anmakuunga anmithlahpei, 15anmah in Akseeng Li anphahnatu raangroi in thlengseia anmah turella anngenpei; 16alamva tukhat chungkho Akseeng Li trumnohmang, chuta anmah in Akpu Jisu akminga inlupningei. 17Mahchuche anchunga ankut ansih a anmah in Akseeng Li anphahpei. 18Ipek Simon in raangroi ankut anmah anchunga ansih apaalla Akseeng Li anphahchuta Simon in amuh a, anmakuunga baobeh amlanei, 19“Kei kuungakho mah tuui i kamlanve, chunna keikho kikut kisih kisihnamii in Akseeng Li anphahnatu;” ta asonei. 20Chuta Pitar in amahkuunga ason, “Nang haarngou i nangsoh maangjouso, alamva Ringpu kuttholva inbaobeh thrulhna thlouta nimdonpei. 21Onna nang nikholkho nichuumkho amnoh, alamva Ringpu kuunga nang niril chimnoh. 22Churella nang nithratnoh khannata niril thlengro, mahche Akpu kuunga ngenro, che vei ajaleva nang nilehkha ip aja. 23Alamva nangva ankhah tuur amche, che aleh in nangta nakkhit a am kimuhche.” 24Mahchunna Simon in amsangpei. “Nannih in nansonkha keichunga jakhatkho atlaknoh natu kei turella Akpu kuunga ngenve.”
25Ipek anmah in sakhi malanna mahche Akpu trongta raanna, Samaria na mii in khuu khuua akthra trongta raanna Jerusalem a inlengsei.
Philip Khatkho Ethiopia na Phrangki
26Chuta Akpu vaa ringroi khat in Philip ta ason, “Inthoua akhutong Jerusalem nata Kaja phah a aktrum lamkhanna sehro.” Mah khanna raprillam lam. 27Chunna amah in inthoua sehsa. Cheva anro, Ethopia na aksarh inseemche mii khat, amahvah Ethopia na kurungpi Kandas ta rou aktlohche amah adoon akhaalta thloupu veia ak an phrangki in Jerusalem a Ringpu amthruunnatu thlengsa. 28Amah in anlenglai; amah skol kari a inbok a ringraan Isaiah nirikta paa amsa. 29Mahchunna Li in Philip ta ason. “Mahkhan kalro che amah skol kari a jaoro.” 30Chunna Philip in amahkuunga tlaansa, che amah in ringraan Isaiah nirik apaata arungeihpei, cheva aruipei, “Nangin nipaakha niromme?” 31Mahchunna amah in ason, “Tunangkhat in kamtheihnoh leva khatloh a kiromchek ume?” Cheva amah in Philip ta skol karichunga akalnatu aongpei che amahsoh inbokjousei. 32Ipek amah in ringjihta apaana achaangva maire: “Sathat kuunga sadamta anthlennanga; nohle sadamta amul akchehmii kuunga anthlennanga; sadamta amul akchehmii kuunga atrong suuknoh nanga, amah abao ma aangnoh 33Amahvaa inruruh khanna amah apichaarta inlousa. Amah ringnatluunta tunang in tanga son achekume? Alamva amah achaanni thaleinata inlousa.”
34Cheva mahkhata aromnoh khanna Philip kuunga ason, “Amah ringraan in trongi tunang turella asonme, amah atak turelna asonme chunoh a aktleikhat turelna asonme?” 35Mahchunna Philip in abao aanga amah ringjih ajatal khannata mathronna amahkuunga Jisu rella akthra trongta araanpei. 36Che anmah in lamchunna ngata anseh in tuii ste amnah a thlengsei, cheva aksarh inseem in ason, “Anro! Onna tuii amsa! Keita keilup ajaume,” amah in amsang, “Ajanohna jakhatkho amnohtu?” 37Chunna Philip in ason, “Nang niril apumte inta malotchele, ajatu.” Che amah in amsang, “Jisu Khrista i Ringpu Asa kupata kamlot.” 38Cheva amah in skol karita mangeihnatu jathang amlanpei. Mahche mahnia Philip leh aksarh inseem in tuiia trumsei, che amahta aluppei. 39Che anmah in tuiinata anthruhsoh, Akpu vaa Li in Philip ta veikhat inlenga mamuhnohsa, chunna amah in aroomthok a alamtonga sehsa. 40Chuta Philip va Ajotas a antuukpei, che amah in Keisaria a athlengnomiil amah in sehseh a khuupii anaamma akthra trongta araanpei.
Currently Selected:
NOONNA THLOU 8: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
