JOHN 1

Akringtrong

1 # 1 Jon 1:1; Mad 19:13; Jon 17:5 Kulkung nata Trongkha louamsa, che Trongkha Ringpu soh inruuia louamsa, che Trongkha Ringpu sa. 2Amah in kulkunga Ringpu soh louamjousa; 3#Kol 1:16; 1 Kor 8:6; Hib 1:2Poot anaamte amah apaalla inseemkirsa, inseempot anaamte amah jaonoh a inkhatkho inseemnoh. 4#Jon 5:26; 11:25; 14:6Amahninga ringna louam, ringna chuva mii turel avaarna veisa. 5#Jon 9:5; 12:46Akvaar in inthim kaara amvaar, che anthim in akvaarta cheknoh.

6 # Mak 1:4; Met 3:1; Luk 3:3; Jon 1:19–23 Ringpu tingnata amthlah akming John ta an ong mii khat louam. 7Amah in akvaarta sakhi aveinatu thlengsa, mah chuvah mii naamte in amah apaalla malot ancheknatu. 8Amah atakvah akvaar khanoh, chuta akvaar khata asonnatu amah in thlengsa. 9#1 Jon 2:8Mii naamteta amvaarnatu akchim akvaarkha tukleiramma thlengsa.

10Amahvah tukleiramma louam, che tukleiramta amah apaalla aseempei, chuta tukleiram in amahta romnoh. 11Amah ataktal in thlengsa, chuta amah amiiei in amahta loulounoh ei. 12#Kal 3:26; Jon 3:18; 1 Jon 5:13Chuta amah akminga malot a amahta aklou mii naamteta, Ringpu asa anveinatu amah in tuui amlannei; 13#Jon 3:5; 1 Pit 1:23; Jem 1:18; 1 Jon 3:9Tunangkhat in amahninga akpok eiva, thiitingna khonoh nohle ruungtingna khonoh nohle mii in amdon tingna khonoh chuta Ringpu tingnasa.

14 # Rom 1:3; Kal 4:4; Phil 2:7; 1 Tim 3:16; Hib 2:14; 1 Jon 4:2 Trongin ruung hukveisa, che malungsi leh akchim in ksip a ikaar a amsa; Pa tingna paarthra vei Asa kupa khalekru tingna apaarthrata imuhpei. 15#Jon 1:30(John in mahmiita sakhi malanna onga ason, “Keiin ksonkha mahmii isa, kei kmaa a akthleng mii in keichunga kliin, alamva kei kiamnoh maa a amahvah louamsa.”) 16#Kol 1:19; 2:9; Eph 1:23; Rom 5:21Amah ningna aksip malungsi nata malungsi apumte inih naamte in iphahpei. 17#Jon 7:19Alamva trongsuurkha Moses apaalla amlanpei, che malungsi leh akchimva Jisu Khrista apaalla thlengsa. 18#Jon 6:26; 1 Jon 4:12; Jon 3:11Tukhat inkho Ringpu ta loumuhnoh ei; Asa kupa khop in amuhning, Ringpu tingna khalekru vei Asa kupa apasoh annai amahta amrompei.

Aklup John vaa Trongraan

(Met 3:1–12; Mak 1:1–8; Luk 3:1–18)

19 # Jon 1:6 Judi ei thiimpu leh Levi eita Jerusalem nata mathlah a, “Nangi tucheme?” ta amiruilai John in aloumasang sakhisa. 20#Jon 3:28Amah in indah tlohnoh, chuta seenga phoonga asonei, “Keiva Khrista noh ang.” 21#Met 11:14; 16:14; Mak 9:13; Met 17:13Che amahta anrui, “Chuleva nangva tucheme? Elaiah cheme?” Che amah in asonei, “Keiva amahnoh ang.” “Ringraan cheme?” Amah in amsangei, “Amahnoh ang.” 22Chunna amahta anson, “Nangi tucheme? Kannih kankuunga kanimsangro alamva kannihta kanimthlahmii ankuunga kansonnatu. Nangva tunangang nitihme?” 23#Mak 1:3; Met 3:3; Luk 3:4John in ason, “Keiva rapril kaara an onghou miikhasang, ringraan Isaiah in asonnanga, ‘Akpu vaa lamkha mathluunve.’ ”

24Ipek anmahva Pharisi ankuungnata amithlah ei. 25Che amahta anrui, “Chule nangva Khrista khonoh chele, Elaiah khonoh chele mahche ringraan khonoh chele, nilup eikha jarelname?” 26#Mak 1:7–8; Met 3:11; Luk 3:16John in amsang, “Keiin tuiia kiluppeichou, chuta nannih in nanromnoh nankaar a inkhat ngirra am, 27kei kiknua akthleng miivaa akehkhraang arui majakho keiva kimtik amnoh ang.” 28#Jon 3:26; 10:40Mah anaamte i John in alupna Jordon araal Bethani a suuksa.

Ringpu vaa Sadam

29 # Jon 1:36; Noon 8:32; 1 Pit 1:19; Mad 5:6; 1 Jon 3:5 Akhuvar a Jisu in amahkuunga thleng amuh a amah in ason, “Anve, Ringpu vaa Sadam, tuklairamna alehta akloukha! 30#Jon 1:15Mahmii isa keiin kisonkha, ‘Kei kiknua akthleng mii ivah keichunga akliin, alamva amahvah kei kmaa a louamsa.’ 31Kei kitak in amahta romnoh ang; chuta mairella keiin tuiia aklup thlengsang, mah chuvah amah atakta Israel ankuunga aphoongnatu.” 32#Mak 1:10; Met 3:16; Luk 3:22Che John in sakhi malanna ason, “Keiin ringramna Li ukthru nanga atrumche amah achunga am kimuh. 33Kei kitak in amahta romnoh ang; chuta lupnatu keita kamthlah amah in keisonang, ‘Li in trumma achunga am nimuhna miital khanna nannihta Akseeng Li a naniluptu.’ 34Kei kitak in muh a sakhi kamlanchou mah chuvah mah i Ringpu vaa Asa kupasa.”

Jisu vaa Matsahrem Aroiei

35 # Luk 7:18 Akhuvar a John in aroi innihsoh ngirra amjou; 36Jisu in asehlai amahta anna ason, “Anve, Ringpu vaa Sadam!” 37Mah in asonta aroi innih in antheih, che anmah in Jisu aknuta anjuihpei. 38Jisu in anheilai, amah aknuta anjuih amuh a ankuunga asonei, “Nannih in jangta nanjonme?” Amahkuunga anson, “Rabbi” (arthava Lulok), “Nang ramma amcheme?” 39Anmah kuunga asonei, “Thlenga anve.” Anmah in thlenga ramma ammeta anmuhpei; che mahni chunna amahsoh amjousei, alamva mahchu pung somvak tlasa. 40#Met 4:18–22; Mak 1:16–20; Luk 5:2–11John atrong rungaia Jisu aknujuih mii innih inkhatva Simon, Pitar che anaokupa Andriu veisa. 41#Jon 4:25Amah in matsah a amah ute Simon ta aktuuk a amahninga ason, “Inih in Miisa iktuukpei” (arthava Khrista). 42#Jon 21:15–17; 1 Kor 15:5; Met 16:18Amahta Jisu kuunga athlenpei. Jisu in amahta anna ason, “Nangva John vaa asa kupa Simon che. Nangta Keiphas kiong uche (arthava Pitar).”

Jisu in Philip leh Nathanael ta Aong

43 # Met 10:3; Jon 6:5; 12:21; 14:8 Akhuvar a Jisu in Kalili a asehnatu arilla ngirsa. Che Philip ta aktuuk a amahkuunga ason, “Kei kiknu keijuihro.” 44Philip vaa Andriu leh Pitar an amna khuuboom Bethsaida na. 45#Luk 24:27Philip in Nathanel antuukpia akuunga ason, “Moses trongthuunna injih mahche ringraan in amijih, Najareth na Joseph asa kupa Jisu kantuukpei.” 46#Jon 7:41; Mak 6:2Nathanel in amahta ason, “Najareth nata aktlei akthra inthruhsame?” Philip in amahta ason, “Thlenga anro.” 47Nathanel in Jisu kuunga thlengta amuh a, amahta ason, “Anro, taktak a Israel mii, akuunga aril chimnoh amnoh.” 48Nathanel in Jisu ta ason, “Keita khatloh a nakrom angme?” Jisu in amsang, “Philip in nangta nak ongnoh maa a nangin thotthing athuuia niamkha kimuhche.” 49#Mak 15:32; Jon 12:13Nathanel in amsang, “Rabbi, nangva Ringpu Asa kupache! Nangva Israel ei kurungche.” 50Jisu in akuunga amsang, “Keiin nangta thotthing athuuia kimuhche ta nikuunga kisonrelna namlotme? Maichung ralla anrolthlou nangin nimuh umang.” 51#Luk 3:21Chela amahta ason, “Keiin nangta taktak a kisonche, nangin ringram inhoonga Ringpu vaa ringroi eiin miiva Asa kupa chunga trum kal nimuhtu.”

Currently Selected:

JOHN 1: TARAOBSI

Highlight

Copy