JOHN 10
10
Sadam Kemvaa Pandam
1“Keiin nankuunga atatak a kisonchou, ‘Tunangkhat in sadamkon thonga luutnoh a, apangtinga kalla akluut miikha inru inraansa; 2#Mak 6:34chuta thonga akluut miikhava sadam kemsa. 3Amahturel thong akngaak in thong amhoong; sadam in amah ahou antheih, che amah sadam eita anminga a ongei. 4Amah sadam eita ankonnata amthruhlai, anmah anmaa a seh, che sadam in amah aknuta anjuih, alamva amah ahouta anrom. 5Aktleina akthleng miivaa aknu juihnohtuei, chuta aktlei mii ankuungnata tlaantuei, alamva anmah in aktleinata akthleng miiva ahou romnoh ei.’ ” 6#Jon 16:25Mah pandam i Jisu in ankuunga huuina a asonei, chuta anmah kuunga asonkha loutheinoh ei.
Jisu vah Akthra Sadamkem Khasa
7Chunna veikhat inlenga Jisu in ankuunga asonei, “Keiin nankuunga atatak a kisonchou, keiva Sadamkonvaa thong khasang. 8Kei kmaa a akthleng annaamte inru inraan sengei; chuta anmah anhouta sadam in rungainoh ei. 9Keiva thong khasang; tungangkhat in keikuunga luutleva, amahta kakaltu, che amah in sehloonna meiphul asaakna aktuuktu. 10Inrumii in amruknatu, thatnatu mahche ammaangnatu noh a thlengnoh; anmah in akring anphahnatu keiin thlengsang, mahchu inleisolh a anphahnatu. 11#Hib 13:20; 1 Pit 5:4; Mad 7:17; 1 Jon 3:16; Jon 15:13Keiva akthra sadamkem khasang. Akthra sadamkem in amah sadam turel achaan amthlah. 12Baobeh akthrulh, sadamta kemnoh mii in, uiiramuiipii athleng amuh in sadamta eia atlaan; che uiiramuiipii in sadamta eita a atlaanei che heihei akthek ei. 13Amah in tlaanna amah ei alamva amahvah baobeh akthrulh miining mahche sadam turelva akirkho aril maluutnoh. 14Keiva akthra sadamkem khasang; kei sadam eita ansak kromei che anmah inkho keita kanromang, 15#Met 11:27; Luk 10:22Pa in keita keirom khananga, keiinkho Pa ta krom; chunna kei sadam turella kichaan kamthlah. 16#Jon 11:52; 17:20; Eph 2:13–18; 1 Pit 2:25Kei sadam akonna ak amnoh aktleiakho kei sadam ammei; anmahkho keiin kithlentuei, che anmah in kei kihou antheihtu. Mahchunna sadamlom inkhat mahche sadamkem inkhat vei tuei. 17Churella Pa in keita keirilvol, alamva kei kichaan kamthlahpei mahchuta veikhat inlenga kaphahnatu. 18#Jon 14:31; 15:10; Phil 2:8; Hib 5:8Tukhat inkho kikuungna chaan lounoh, mahchu kitakrouin ja a kamthlah. Kei chaanta kamthlahnatu kei kituui am, che mahchu veikhat inlenga klohnatu tuuikho am; mah trongthuun i Pa tingnata kphahpei.”
19 #
Jon 7:43; 9:16 Mahtrong irella Judi ankaar a veikhat inthrek inbaak suuklasei. 20#Jon 7:20; 8:48; Met 11:18Anmah aktam in anson, “Mahmii i khousaar chuunga innahsa; jarella atrongta nanrungeihme?” 21#Jon 9:32Aktlei in anson, “Mah i khousaar chuung mii inkhatva atrongnoh. Khousaar in mitchota ammuhchek ume?”
Jisu ta Anjanoh
22Aknu achunna maithruunna Thlaam Katna buhdoonkha Jerusalemma suuksa. 23#Noon 3:11; 5:12Mahchu phalbia tla, che Solomon vaa mathruunna thlaam innmuk a Jisu in sehsa. 24Chunna Judi in Jisu ta kooia anngrihche anson, “Nangin kannihta jikcha soot a namsimna umangungme? Nangin Khrista chele kankuunga seenga kanisonrosa.” 25#Jon 5:36; 10:38Chunna Jisu in ankuunga amsangei, “Keiin nankuunga kisonpeichou, che nannih in keita kamlotnoh sachou. Keiin Pa akminga kitlohthlou anaamte, kei turella sakhi amlan; 26#Jon 8:47chuta nannih in keita kamlotnoh sachou, alamva nannihva kei Sadam nohchou. 27Kei Sadamtva kihou antheih, keiin anmahta kromei, che anmah in kei kiknuta kanjuih ang; 28#Jon 17:2; 1 Jon 2:25che anmahta ache amnoh akring kamlanei, mahche anmahva tikniakho maangnoh usei, che anmahta tukhat inkho kikutnata keisutnoh tuei. 29Anmahta keikuunga amlan Pa in aktlei naamte chunga akliin, che tukhat inkho anmahta Pa kutnata sut cheknoh tuei 30#Jon 17:21Pa leh keiva inkhat ningung.”
31 #
Jon 8:59; 11:8 Veikhatla Judi in amahta andennatu lung anchunpei. 32Jisu in ankuunga amsangei, “Pa tingnata akthra thlou jikcha nankuunga kammuh peichou; mahsuung akhanna jarella keita lung nandensam angme?” 33#Mak 14:64Judi in amisang, “Akthra thlou nitloh kharella nangta lung nakdeennoh ung chuta Ringpu ta leem manuih a nitrong kharelna; alamva miikhatcheta nitakta Ringpu namvei.” 34#Jon 8:17Jisu in ankuunga amsangei, “Mah i nannih trongsuura injhinohme, ‘Keiin kisonchou, nannihva rappunoh choume?’ 35Ringpu trong akthlengta amah in rappu ta ongle (ringjihva koii cheknohtu), 36keiturelva Pa in maseenga tukleiramma kamthlah peiang, che ‘Keiva Ringpu Asa kupa ang’ ta kisonlai khatloh a nannih inla nangva Ringpu ta leem manuih a trongche nantih angme? 37Keiinta Pa athlouta tlohnoh angle, chuleva keita kamlotnohve; 38mahchuta keiin tloh angle, nannih in keita kamlotnoh choulakho, Pa in keikuunga am mahche keiin Pa kuunga ammangta nanromnatu che romma amahkuunga nan amnatu kthloukha malotve.” 39#Jon 7:30; 8:59; Luk 4:30Veikhatla amahta ansuurnatu insuulsei, chuta ankutnata inlitsa.
40 #
Jon 1:28
Chunna Jisu in Jordon araalla John in matsah a alupna amunkhanna veikhat inlenga mahchunna amsa. 41Amahkuunga mii khalmo thlengei; che anmah in anson, “John va daang jakhatkho tlonoh, chuta mahmii irella John in asonva chim.” 42#Jon 7:31; 11:45Ohkhanna miitam in Jisu ta amilotpei.
Currently Selected:
JOHN 10: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
