JOHN 3

Nikodimas Khatkho Jisu

1 # Jon 7:50; 19:39; Luk 23:13; Jon 7:26 Ipek Pharisi ankaarna akming Nikodimas an ong Judi akpuui mii khat am. 2#Jon 2:11; 7:31; 9:16; Noon 10:38Mahmii kupa in nikhat khulouh a Jisu kuunga thlenga ason, “Rabbi (Lulok) nangva Ringpu tingnata akthleng lulokcheta kanrom; Ringpu in inruuipinoh avah, nangin nitloh daang i tukhat inkho tloh cheknohtu.” 3#Jon 1:13; 1 Pit 1:23; Jem 1:18; 1 Jon 3:9Mahchunna Jisu in akuunga amsang, “Taktak a keiin nikuunga kisonche, tunangkhat inta thar a poknoh leva, amah in Ringpu vaa kurungram muh cheknohtu.” 4Nikodimas in Jisu ta ason, “Mii khat in atarche khatloh a inlenga pok achekume? Amah in anu poomsuung veinih inlenga luut a pok achekume?” 5#Eph 5:26; Tit 3:5Jisu in amsang, “Atatak a keiin nikuunga kisonche, tunangkhat in tuiia mahche Li a poknoh avah, Ringpu kurung ramma luut cheknohtu. 6#1 Kor 15:50Ruunga akpok in ruungsa, mahche Li a pok in lisa. 7Nangin thar a poktu tlacheta nikuunga kson khanna salungkhou nohro. 8Thli in araangja na a raanna seh, mahchuta nangin ahou nitheih, chuta mahchu ramnata thlengme nohle ramma sehme romnohche; mahchunang jimma Li ah akpokho veiningme.” 9Nikodimas in amahkuunga ason, “Mah i khatloh a vei achekume?” 10Jisu in amahkuunga amsang, “Nangin Israel ei lulok inkhatveia mah kisonita loutheinoh cheme? 11#Jon 8:26; 1:18; 3:32Atatak a keiin nikuunga kisonche, inih in iromkhata trongningme, che inih in imuhkhata sakhi veiningme; chuta kannih in kanson sakhita nannih in lou indahschou. 12Tukleiram a poot eita nankuunga kson in malotnoh choule, ringramna poot eita nankuunga son angleva khatloh a namilotchek ume? 13#Rom 10:6; Eph 4:9Miivaa Asa kupa in ringramnata trum khanoh a tunangkhat inkho ringramma kalnohmang. 14#Jon 8:28; 12:34Moses in raprilla murulta akdomnanga, miivaa Asa kupata akdomtu tlasa, 15mah chuvah tukhat in amahta malotle ache amnoh a ring anphahtu.”

16 # Rom 5:8; 8:32; Eph 2:4; 1 Jon 4:9–10 Alamva Ringpu in tukleiramta maichah phah a arilvolsa mah chuvah amah Asa kupa inkhatru khata inimlanpei, chunna amahkhata amlot tukhat in kmaang krel amnoh a ache amnoh ringna aphahtu. 17#Jon 8:15; 12:47; Luk 19:10; 1 Jon 4:14Alamva Ringpu in tukleiramta amlaalnatu Asa kupata mathlahnoh, chuta amah apaalla tukleiram in inkal aphahnatu Asa kupata amthlahpei. 18Amahta amlot mii khata malaalnoh, amahta amlotnoh mii khata amlaalpei, alamva amah in Ringpu vaa Asa kupa akming khanna malotnoh 19#Jon 1:4; 8:12; Eph 5:11,13Mah pichaarchuva maisa, mah chuvah tukleiramma akvaar thlengsa, chuta mii invah akvaar khachunga anthimta thloia anditpei, alamva anmah anthloua thranoh seengsa. 20Alamva thranoh aktloh miirel in akvaarta intirh ei, amah in atlohthlouta indangtuta akvaara thlengnoh ei. 21#1 Jon 1:6Chuta tunangkhat akchim aktloh amahvah avaarna a thlengtu, jarelname tihva amah in Ringpu in atlohthlou khanna seenga andangnatu relna.

Jisu Khatkho Aklup John

22 # Jon 4:2 Maiche aknua Jisu in aroi eisoh Judia ramma sehsa; mahchunna anmahsoh inruuia ohchunna nikhat ninih nichuunga anlupsei. 23John inkho Salim akom Anon ah alup ei, alamva mah khanna tuiitam am; mii akthlengeita alup ei. 24#Met 14:3; Mak 1:14; 6:17; Luk 3:19,20Alamva mahlaiva John va simma inthunnohmang.

25Ipek John aroi leh Judi inkhat ankaar a maseengna rella trong inkharhna suuksa. 26#Jon 1:7,28Che anmah in John kuunga thlenga anson, “Rabbi, Jordon araalla nangsoh amjou, nang sakhi namveikha onna amsa, amah in miita tui alup ei, miikha anro, che mii naamte in amahkuunga thlengei.” 27#1 Kor 4:7John in amsang, “Ringram tingnata akphahkhop amahnoh avah tukhat inkho jakhatkho phah cheknoh ei. 28#Jon 1:20,23Keiva Khrista khanoh ang, chuta amah amaa a keita kamthlah angta keiin kisonkhata nantak in keitu sakhi veisachou. 29#Mak 2:19–20; Met 25:1; Jon 15:11Tharei in aktuukha changrisa, mahkha thareivaa apaisa, ngirra amahta arungeih, changrivaa ahouta atheih in aroomthok hang; alamchunna mah roomthok inna kirilla sipsang. 30Amahvah ahanraltu tla, chuta keiva inlengtu tla ang.”

Ringram tingna Akthleng Amahvah

31 # Jon 3:13; 8:23; 1 Jon 4:5 Achung tingnata akthleng amah in achungtingna; tukhat thalei tingna in thaleivaa ata vei, amah in thalei rella trong, ringram tingnata akthleng amahvah apumte achungtinga. 32#Jon 3:11Amah in amuhta che atheihta sakhi amlan, chuta amah aringtukna thaminta tukhat inkho lounoh ei; 33amah aringtukna thaminta aklou miiva Ringpu i chimsa ta atak a chum innamsa. 34Alamva Ringpu in amthlah mii khanna Ringpu atrongta trong, jarelna tihva Amahkuung aksip Li ta amlan; 35#Met 11:27; Luk 10:22Pa in Asa kupta arilvol, chunna poot anaamte amahkuunga amsilpei. 36#Jon 3:16; 5:24Asa kupata amlot tukhat in ache amnoh ring aphahpei; Asa kupa trongson amjuihnoh tukhat in ache amnoh ring phahnohtu, chuta Ringpu in inhaanga asaokha atakchung amtu.

Currently Selected:

JOHN 3: TARAOBSI

Highlight

Copy