LUKE 24

Jisu in Veikhat Ring

(Met 28:1–10; Mak 16:1–8; Jon 20:1–10)

1 # Met 28:1–8; Mak 16:1–7; Jon 20:1,11–13 Chuta kouhtu matsahrem akni juktiing inranga, anmah in thlouraang antloh amrimtui pootta phurh a rusuunna sehsei. 2Che rusuun akhaar lungta inphonga am antuuk, 3chuta anmah in asuunga anluut in Jisu aruungta tuuknohsei. 4Mah churella anmah in inhalla an amsuunga, anve, intle inluut silh a kupa innih ngir anmuh; 5anmah in intriseia ankhup in, kupa innih in ankuunga anson, “Akthi kaarna kiringta jarelna nanjonme? 6#Met 16:21; 17:22,23; 20:18,19; Mak 8:31; 9:31; 10:33,34; Luk 9:22; 13:32–33; 18:31–33Amah in Kalili a amlai khatloh a nanisonme intheihve, 7mah chuvah miivah Asa kupata alehchel ankut a amilanche amithlutu, mahche nithum tihpia ringtu.” 8Chunna amah trongchuta intheihsei. 9Che anmah in rusuunnata inlenga mah naamte chuta somleikhat leh aktleikuunga ansonpei. 10#Mak 16:1; Luk 8:1–3; Jon 20:2Pek mah kumei eichuva Makadalini Meri, Joanna, Jems anu Meri, mahche aktlei kumei eisoh inruuia mahchuta raangroi ankuunga antongpei; 11chuta mah trongchu ankuung avah apupu trongta anlohpei, anmahta malotnohsei. 12Chuta Pitar in inthoua rusuun phah a tlaanna sehsa; che inkhup a an in, innaal puunta injarh a am, mahchunoh a aktlei jakhatkho muhnohsa.

Immaus ah Seh

(Mak 16:12–13)

13Mah aknital chunna anmah ankaarna mii innih in khuuming Immaus ah seh ei, mahchu Jerusalem nata mel sirihvak inla, 14anmah in aksuukthlou naamte kharelna khatleh khat trongsei. 15Che anmah in tronga intella ansehsuunga, Jisu atak in ankuunga innaia anmahsoh sehjousa. 16#Jon 20:14; 21:4Chuta amahta anromnoh natu anmah anmitta ammangei. 17Che Jisu in anmahta asonei, “Nannih in seh malamma khatleh khat trongchou i jarelname?” Chunna amahta ancheknohseia ngirtlinga amsei. 18Che anmah innih ankaarna akming Kleopas in amahkuunga amsang, “Minka suunga aksuuk ei i jakhatkho romnoh nanga rapkhei veia, Jerusalem ak ankhoptu thlengscheme?” 19#Met 21:11; Luk 7:16; 13:33; Noon 3:22Cheva anmahta aruiei, “Jaknang thlouta suuksame?” Chunna anmah in anson, “Ringpu mahche mii naamte maikuunga thlouvah khatkho tronga akchek amneh ringraan vei Najrethna Jisu relna, 20khatloh a inihvaa akthloi thiimpu leh inipuui ei in amahta thatnatu maraal mathlaak a amithlu tameh. 21Amahva Israel ta akthloktu miitalsa ta imtuur peita, mah naamte aksuuk i mi insoh nijanthum aphahpei. 22Inih ikaarna kumei arouin juktiing inrangdor a rusuunna seh eia, ralladom inihta salungkhouna inimveipei. 23Amah aruungta tuuknohsei, anmah anhamuh a ringroi in Jisu vah ringsa ta asonta kannihting inlenga knisonung. 24#Jon 20:3–10Kannih kankaarna arouin rusuunna seh eia, kumei in anson khananga antuukpei; chuta amah atakva muhnohsei.” 25Mahchunna Jisu in anmahta asonei, “Ah kmong miieio, ringraan in ason anaamteta nanrilla malot tapchoukhame! 26Khrista in anaamte klah knang athotu mahche amah paarthra a luutnoh ume?” 27#Luk 24:44–45; Noon 28:23; 1 Pit 1:11Amah atakrelna ringjih naamte in asonkha Moses nirik ah mahche ringraan annaamte antrongta anmah kuunga minna amtheih ei.

28 # Mak 6:48 Che anmah in ansehnasam khuukha anailai, amah in ankuungnata ralbeb a sehsa; 29chuta amahta khaamma anson, “Kannihsoh amjouro, alamva khulouhram veisa, che khalmo thilsa.” Chunna Jisu in anmasoh amjounatu inlengsa. 30#Luk 9:16; 22:19Amah in tebor a anmahsoh anboklai, amah in tol loua doi amlan, che mahchuta khoia, anmahta amlannei. 31Cheva anmah in inthrangseia amahta rom akchekpei; cheva ankuungnata maangsa. 32Anmah in khatleh khat insonsei, “Lamma ringjihta inihkuunga inimtheihlai iril khalmoa kaangnohme?” 33Mahche anmah in pungtal achunna inthoua Jerusalem a inlengsei, mahchunna aroi somleikhat leh aktleisoh amjou antuukpei. 34#1 Kor 15:5Che anmahta ansonei, “Taktak a Akpu in ringsa, Simon kuunga ammuhpei!” 35Chunna lamma aksuukthlou, amah in tol khoia amah atakta khatloh a amromeime tihrelna antongpei.

Jisu in Atakta Aroi Ankuunga Ammuh

(Met 28:16–20; Mak 16:14–18; Jon 20:19–23; Noon 1:6–8)

36 # Jon 20:19–20,27; 21:5,9–13; 1 Kor 15:5; Noon 10:40–41 Mah ita ansonlaia, Jisu ataktal ankaar a ngirsa. 37Chuta anmah in intria kukthlata imuhpeita amidonpei. 38Che Jisu in ankuunga asonei, “Nannih in jarella inlao sachoume, che jarella nanrilla amahnoh namidon peime? 39#1 Jon 1:1Kei kikutleh kikehta keianve, keisang, keiromve; keipalve mahche keianve; alamva keita nanmuh angi oinanga kukthlava aruung khatkho aruh amnoh.” 40Mahchuta asonlai ankuunga amah akut leh akehta ammuh ei. 41Anmah in malotnoh a, roomthoknoh a che salungkhoua an amsuunga, ankuunga asonei, “Onna isaaktuphu nansihme?” 42Innsuunche nga akirta akuunga amilanpei. 43Che mahchuta loua anmaikunga asaakpei.

44 # Luk 24:26–27; Noon 28:23 Mahchuche ankuunga asonei, “Keiin nannihsoh kiamjoulai mah kitrongi nankuunga kisonpeichou, mah chuvah kei turelna Moses trongsuura injih, mahche leila ah inijh naamte amthlungtu tla.” 45Chunna ringjihta rom ancheknatu anmah anrilta amhoongpei 46#1 Kor 15:3–4Mahchuche Jisu in ankuunga asonei, “Mah chuvah Khrista in klah knang aphahche nithum tihpia thinata ringtu, 47#Noon 1:4–8; Met 28:19che rilthleng khatkho alehnata ip rella Jerusalem nata mathronna jatboom apumtea mah ita keiminga inraantu. 48Mah naamte i nannih in sakhichou. 49#Noon 2:1–4; Jon 14:26; 20:21–23Che anve, Pa atrongchetta nankuunga kamthlah peichou; chuta achungtonga tuuita puun nanga nansilh nohmiil khuuboomma amve.”

Jisu ta Ringramma Ahan

(Mak 16:19–20; Noon 1:9–11)

50 # Noon 1:9–11 Cheva Jisu in anmahta Bethani phah a asehpiei, che akut domma anmahta doi amlanei. 51Anmahta doi amlansuunga, ankuungnata achunga ahanpei. 52#Noon 1:12–14Che anmah in roomthok a Jerusalem a inlengsei. 53Che anmah in Ringpu mathruunna thlaamma injomma Ringpu ta mapaak a amsei.

Currently Selected:

LUKE 24: TARAOBSI

Highlight

Copy