LUKE 8

Jisu Aknu Akjuih Kumei

1 # Luk 4:15; Mak 15:40–41; Met 27:55–56; Luk 23:49 Mahchuche aknua amah in khuuboom khuuboomma che khuu khuua Ringpu vaa kurung huunna Akthra Trongta raanna sehsei; che aroi somlei nihkho amahsoh inruuijousei. 2#Met 27:55,56; Mak 15:40,41; Luk 23:49Mahche thranoh li in akluut che kumei arou aknaeita amthrat ei, khatkho amahkuung nata khousaar sirih in anthruhna Meri Makadalili, 3che Herot vaa ataploikuunga thlou amrel Khuja akmei Joana leh Susana, aktlei kumei jikcha in anmah andoon ankhaal mathruh a amijoom.

Chivorh Pandam

(Met 13:1–9; Mak 4:1–9)

4 # Met 13:1–9; Mak 4:1–9 Mahchuche khuupii jikchanata miitam in Jisu kuunga anthleng in, anmah kuunga pandam malanna asonei. 5Chi akloon mii in amah chita avorhnatu sehsa; che amah in chi avorh in chi arouin lamkomma a tlasa, che mahchu keh akho anchilhpei, marvaanna va inkho ansaakpei. 6Mahche chi arouin lungkaara tlasa; che mahchu amoongin leipii amnohrel chaarsa. 7Mahche arouin kuling kaara tla, che kuling in mahchusoh jouta amoongche ahippei. 8#Met 11:15Aktleiva akthra leipiia tla a che mahchu moonga akrah suruk reija inrah. Tronglam i asonsuunga Jisu in onga ason, “Tunangkhat in rungeihnatu amkuur am miikhan rungaiso.”

Pandam Artha

(Met 13:10–17; Mak 4:10–12)

9 # Met 13:10–13; Mak 4:10–12 Chunna Jisu aroi in amahkuunga anrui, “Mah pandam iva artha jangsame?” 10Mahchunna Jisu in asonei, “Ringram huunnavaa anthuptrong romnatu nankuunga kamlanchou; chuta aktlei ankuung avah anmah in muh a anmuhnoh natu, che rungaia anlohtheihnoh natu pandam veia kison.”

Chivorh Pandamta Invuia Matheihna

(Met 13:18–23; Mak 4:13–20)

11 # Met 13:18–23; Mak 4:13–20; 1 Thes 2:13; 1 Pit 1:23 “Pandam chuva maisa: Chi i Ringpu atrongsa. 12Lamkom na in arungai miisei; mahchunna seitan in thlenga antak in malot a inkal anphahnoh natu anril suungnata trongkha sut a aloh ei. 13Lung achungnava anmah in anrungeih in trongchu roomthok a anlouloh, chuta akjung thuuk a athlaknohrel lai kakruta amilot che madoi athlenglai anril inleng anmahkhasei. 14Kuling kaarna khava anmah in antheihche, anmahtu annono anhoong anva laltu rilla roomthok in achek a thra marahna janoh. 15Mahche akthra leipiina khava akseeng leh akthra anril in trongkha anrungeih che chetkenga choia andoutheih a thra inrah anmahkhasei.”

Meiser Luktoonga Makhum

(Mak 4:21–25)

16 # Mak 4:21; Met 5:15; Luk 11:33 “Tukhat inkho meiser ataarche luktoong makhumnoh ei, chunohle ihnathuuia sihnoh ei, chuta akluut mii in akvaar khata anmuhnatu meiser taarna achunga anthong. 17#Mak 4:22–23; Met 10:26–27; Luk 12:2–3; Eph 5:13Alamva indang cheknohtuta inthup a amtu jakhatkho amnoh, che inromnoh tuta inthup a amtu jakhatkho amnohtu. 18#Mak 4:24–25; Met 13:12; 25:29; Luk 19:26Churelna nannih in jaknang hoonga nantheihme cheksilve; alamva ak am mii kuungah ralla kamlantu, che ak amnoh mii kuungnata amah in ste asihkhaphao klohtu.”

Jisu Anu Khatkho Anaoei

(Met 12:46–50; Mak 3:31–35)

19 # Met 12:46–50; Mak 3:31–35 Mahche Jisu anuleh anao eiin amahta inmuhpinatu amahkuunga anthlenglai, mii tammal khanna amahkuunga luut a inmuhpi cheknohsei. 20Mahche Jisu anuleh anao eiin amahta inmuhpinatu apaalla ngaak a amsei. 21#Luk 11:28; Jon 15:14Chuta Jisu in ankuung asonei, “Ringpu trongta nantheihche athlou veia aktloh anmahta kei kinu che kinaosei.”

Jisu in Khusuur Thliraang Akhaam

(Met 8:23–27; Mak 4:35–41)

22 # Met 8:23–27; Mak 4:35–41; 6:47–52; Jon 6:16–21 Nikhatnia Jisu leh aroi in mulia chuungsei che ankuunga asonei, “Inih in tuiiram araalla inkahrei.” Mahchunna anmah in muli anthohsuunga Jisu vah insa. Che tuiiramma khuleh thli karaangsa. Cheva tuii aklek a anmah in thihnaringna a tlasamsei. 23Anmah in mulita thoua anseh in amahva insa: Cheva tuiiramma khuleh thli tranga karaangsa, chunna mulisuunga tuii sipsamma thihnaringna anphahpei. 24#Luk 5:5; 8:45; 9:33,49; 17:13Cheva anmah in Jisu ta mathoua anson, “Jisu, Jisu, kannih thisamsung!” Mahchunna Jisu in inthoua thlileh tuiisolh amthronta akhaam in annih a inngaia inneemsa. 25Mahche Jisu in ankuunga asonei, “Nannih in namilot khosame?” Chunna anmah in trihkho trih a salungkhoukho khouva khatleh khat insonsei, “Thlileh tuii inkhoh amah atrongta amijuih Jisu i tumeio?”

Jisu in Khousaar chuung Miikhatta Amthrat

(Met 8:28–34; Mak 5:1–20)

26 # Met 8:28–34; Mak 5:1–20 Chunna Kalili soh maingat a am Kerasenis khuuboomma anmah in tlungsei. 27Mahche Jisu in tuiipaalla anthruhlai, khousaar chuung mii khat khuuboom nata inthruh a Jisu soh intuuksa; alamva amah in khalmo sot a puunreikho silhnoh inn akho amnoh, chuta rusuunkaara am. 28#Mak 1:24; Jon 2:4Amah in Jisu ta amuh in onga Jisu amaikuunga intlolh a ahou inkaanga ason, “Akthloirem Ringpu Asa kupa Jisu o, nangin keita jangtlohtang nitihme? Keiin nangta kamthruunche keita kamlahnohro.” 29Alamva Jisu in mahmii chunnata anthruhnatu akseengnoh lita jathang amlan. (Alamva seengnoh li in amahta lai amrel asuur; che mii in amahta seel seilakho, thirruia kaanseilakho che ahang masuur seilakho, amahta ankaannakha akpotkir mahche khousaar in amahta raprilla amnom.) 30Mahche Jisu in akuunga arui, “Nikming tume?” Chunna amah in ason, “Lejan” alamva khousaar tam in akuunga luut ei. 31Khousaar in kannihta adong amnoh khur a kansehnatu jathang kanitlohnoh rota Jisu kuunga anngen.

32Pek muulkaar a vokjaam khat anthlai saa ammei; che anmah in kannihta vokjaam ankaar a kanluutnatu kanijarota Jisu ta anngenpei. Mahchunna Jisu in anmahta ajapei. 33Cheva khousaar in mii chunnata inthruh a vokjaam kaar a anluutche tuiiramma hunpeia tuii luut a raangchatsei.

34Cheva vokjaam aksel in mah aksuuk khata anmuh in tlaanna khuuboomma khatkho ramboomma antongpei. 35Cheva mah aksuuk chuta ak an heihei inthruhsei, che anmah in Jisu kuunga thlengsei, khousaar in inthruh a amah miikhan puunreikho silh a invetnoh ramroom veia Jisu kuunga inbok a am anmuh in intrisei. 36Cheva khousaar asuur amahta khatloh a thrakhem meta akmuh mii in akthleng ankuunga antongpei. 37Cheva Kerasenis ramta kooi a ak am mii in anmah ankuungnata mah a asehnatu Jisu ta anson; alamva anmah in intri suuksei; cheva amah in muli chuunga inlengsa. 38Chunna khousaar in inthruh a amah mii khanna Jisu soh inruuitangta akuunga angen; chuta amahta mathlah a ason, 39“Nang ni inna inlengrosa, che Ringpu in nangturel jikcha phah akliinthlou naktlohme sonna madangro.” Chunna amahturel Jisu in jikcha phah akliinthlou atlohmeta khuuboom apumtea sonna amdangpei.

Jairas Asakumei Khatkho Jisu Apuunta Akpal Kumei

(Met 9:18–26; Mak 5:21–43)

40 # Met 9:18–26; Mak 5:21–43 Ipek Jisu in anlenglai miitam in amahta roomthok a anloulohpei, alamva annaam in amahta anloungaak. 41Mah khanna akming Jairas an ong kupatkhat thlengsa, amahvaa sinakok akpuui mii; amah in Jisu akehkungah intolh a keiinna thlengrota angen, 42alamva asakumei inkhatruning, kum somlei innihvak thisamma am.

Jisu in athlenglai miitam in anlompei. 43Mahche tukhat inkho amithrat cheknoh kum somleinih thii luunga kna kumei khat in, 44Jisu kuunga thlenga, amah apuunpaarta apal; cheva amah athii luungchu kak hanga indoonsa. 45#Luk 8:24Mahchunna Jisu in ason, “Keita keipalkha tunangme?” Mii naamte in nakpalnoh ungta andah inva, Pitar in ason, “Akpu, miitam in nangta naklommei che nangkuunga inhommei!” 46#Luk 5:17; 6:19Chuta Jisu in ason, “Tumekhat in keipallang; alamva kei kuungnata tuui inthruhsa, kirom.” 47Kumei khanna kei i inthup janoh tunaisang ta arompeia amah in inchuunna thlengsa, che amahkuunga intoltlep a jarella amahta kapalme mahche khatloh a kak hanga keita kamthrat angmeta miinaam anmaikuunga asonpei. 48#Met 9:22; Luk 7:50; 17:19; 18:42Che Jisu in kumei akuung khanna ason, “Kisa kumeio, nangin namlot kharella nangta namthratpei; leh oia sehrosa.”

49Jisu in atrongsuung talla rampuui innata mii khat in thlenga a ason, “Nang nisa kumeikha thisa; Lulokta inlenga chutnoh rosa.” 50Chuta ohchuta Jisu in atheih in akuunga amsang, “Intrinohro, malotru malot paningro, amah in thratu.” 51Inn achunna amah in athlenglai, Pitar, John, Jems inkhatkho naova apa leh anu noh a tukhatkho asuunga luutpinohsa. 52Cheva amahturel miinaam in trapkho trapsei, che sinthruuisei; chuta amah in ason, “Trapnohve; alamva amahvah thinoh, chuta inning.” 53Amah naoi thisa anromma Jisu ta aminuihpei. 54Chuta Jisu in nao akutta matuh a aong, “Rungaak o, inthouro.” 55Mahchunna amah akli inlenga, kak hang ngirsa; che amahkuunga saakphu malanveta jathang amlanei. 56#Met 8:4; Mak 3:12; 7:36; Luk 9:21Cheva anu apa in salungkhousei; chuta mah aksuuk i tukhat ningkho sonnohveta Jisu in ankuunga aktrang jathang amnanei.

Currently Selected:

LUKE 8: TARAOBSI

Highlight

Copy