METHIU 17
17
Jisu Ameel Amthleina
(Mak 9:2–13; Luk 9:28–36)
1 #
Met 26:37; Mak 5:37; 9:2–10; 13:3; Luk 9:28–36; 2 Pit 1:17–18 Niruk aknua Jisu in Pitar, Jems mahche anao John phurh a ankaang muul khat chungah kalsei. 2Che anmah maikuunga amah ameel tleisa, Jisu vaa amai kini nanga intle che apuunrei in kvaar nanga inngousa 3Che anve, Moses leh Elaiah in Jisu soh inruuia tronga am anmuh. 4Cheva Pitar in Jisu kuungah ason, “Akpu inih in onna iam thratu, nangin jacheleva, onna thiil inthum seemtang, inkhat in nangtu, inkhat in Moses tu che inkhat in Elaiah tu.” 5#Met 3:17; 12:18; Mak 1:11; Luk 3:22; Jon 12:28Amah in atrongsuung, anve, antle sumphai in anmahta amlihpei, che kak hanga sumphai kaarnata hou inkhat in thlenga ason, “Mah i keiin khalmo kirilvol Kisakupa, amah kuungah keiin pelsang, amah in ason rungaive.” 6Che aroiin mahchuta antheih lai, anmai makhup a khalmo intrisei. 7Chuta Jisu in thlenga anmahta palla asonei, “Inthouve, intrinohve.” 8Che anmah in inthoua an anlai Jisu noh a tukhatkho muhnohsei. 9#Met 8:4; 16:20; Mak 3:12; 5:43; 7:36Anmah in muulnata antrumsuunga Jisu in trong asonei, “Miivaa Asa kupa in thinata aringnosoot mah ahamuh i tukhat kuungkho sonnnohve.” 10#Mak 9:11–13; Met 11:14Che aroi in Jisu ta anrui, “Chuleva Jarella ringjih lulok in Elaiah matsah a thlengtu antihme?” 11Amah in amsangei, “Elaiah in matsah a thlengtu, mahche poot anaamte amlengtu; 12#Met 11:14; 16:21; 17:22; 20:17; 26:2; Luk 17:25chuta keiin nankuungah kitihchou, mah chuvah Elaiah va thlengchesa, anmah in amahta louromnoh ei, chuta anmah in antlohja akuungah antloh. Chunanga miivaa Asa kupakho anmah ankut a klah knang aphahtu tla.” 13Chunna Jisu in aklup John rella trongsa tih a aroiin anrompei.
Khousaar chuung Kupasa Khatta Jisu in Amthrat
(Mak 9:14–29; Luk 9:37–43)
14 #
Mak 9:14–27; Luk 9:37–43 Che anmah in miitam kuungah anthlenglai, mii khat in Jisu kuungah thlenga akhuk makamma ason, 15“Akpu, kisa kupata niril mavolro, alamva amahta surpitumma klahsa; che amah in injomma mei leh tuiikaara luut. 16Chunna keiin amahta nang niroi ankuungah kithlen, chuta anmah in mathrat cheknohsei.” 17Chunna Jisu in akuunga amsang, “Ah, malot amnoh chimnoh akseh ringnatluun nannihsoh jikcha soot a keiin am umang angme? Amahta keikuungah keithlenve.” 18Cheva Jisu in khousaarta asaal, mahche amah ningnata inthruhsa, che mah laitalla naochu thrasa. 19#Mak 9:28–29Chunna Jisu kuungah aroiin inrukte thlenga anson, “Jarelna kannih in khousaarta manom cheknoh ungme?” 20#Luk 17:6; Met 21:21; Mak 11:22–23; 1 Kor 13:2; Mak 9:23Amah in ankuungah asonei, “Nannih in namilotnoh relna. Alamva keiin nannihta tak a kitihchou, nannih in intrammu tuihru malotchoule muultumta nantihtu, ‘Onnata ousonna inlenro’ che mahchu inlentu, che nankuungah veinohtu jakhatkho amnohtu. 21Chuta mainangi huh hella ngennoh avah tikniakho veinohtu.”
Jisu in Athihsam Rella Veikhat Asonla
(Mak 9:30–32; Luk 9:43–45)
22 #
Mak 9:30–32; Luk 9:43–45; Met 16:21; 20:17–19; 26:2 Anmah in Kalili ah an amlai Jisu in ankuungah asonei, “Miiva Asa kupata miikut ah amilan usa, 23che anmah in anthattu, mahche nithum tihpia amah in ringtu.” Ohchuna anrilsok a klahsei.
Mathruunna Thlaamvaa Roithaang
24Anmah in Kaparnaum a anthlenglai, Ringpu mathruunna thlaamma sekel aher akthrai in Pitar kuungah thlenga ason, “Nannih lulok in roithaang malannohme?” 25#Rom 13:7; Met 22:17–21Amah in ason “Oi, athaang.” Che amah in innsuung aluutlai Jisu in akuungah ason, “Simon nangin jangta nimdonme? Thaleiramna kurung eiin tuningnata roithaang anlohme? Anmah ansakuung name chunohle aktlei ningnata anlohme?” 26Pitar in Jisu kuunga ason, “Rapkheimii ankuungnata amithaang.” Chunna Jisu in akuungah ason, “Chunohleva ansakupava khangvalmii veisei. 27#Met 5:29; 18:6–9; Jon 6:61; 1 Kor 8:13Chusalakho inih in anmahta thlouvat eveinoh nahtu tuiiboomma seh a kuui thaangro, che matsah nikai ngakha abao ma aanga nianlai nangin baobeh apumkhat niktuuktu, mahchu loua nangleh keiturel ankuunga malanro.”
Currently Selected:
METHIU 17: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
