Luke 3

John Baptist Thu Lhangsap

(Matt 3:1-12; Mrk 1:1-8; Jhn 1:19-28)

1Chuin Tiberius Caesar lengchan kal kum somle ngana-in, Pontius Pilate Juda gamvaipo ahia, chule Herod Galilee gam vaipo ahia, asopipa Philip Ituria le Trachonitis gamkai vaipo ahia, chule Lysanias Abilene gam vaipo ahi lai,

2Anna le Caiaphas thempulen ahilhon laijin, Pathen thu chu gamthipma Zachariah chapa John hengah ahung lhungtan ahi.

3Chuin ama chu Jordan luipang jui kimvela gam jouse-a ahungin, chonset suhbeina dinga lungheija baptize chan thu alhangsam len;

4 # Isai 40:3-5. Isaiah themgao lekhabua kisunbang chun,

Gamthipma khosam aw khatnin,

Pakai lamlen semtohsan koijun,

alampi semjangun.

5Damkom chengse kidip chama,

molsang jousele lhang jouse kisunem ding;

chule lamkon chu kisujanga,

aphon nachu kisunam ding;

6Chule mi jousen Pathen mi huhhingna amu ding ahi.

7 # Matt 12:34; 23:33. Hiti chun aman, ama khutna baptize chang dinga ahenga hunga mihonpi jah-a chun, Vo gulse sonho, khonunga lunghan hung lhung dinga kona jam ding lungthim koiham napeuvah? 8#Jhn 8:33. Hiche jeh chun lungheitoh kilomin gadoh-un; chule nalah uva, Abraham kapu luiju aumnai titahih-un; ijeh-inem itile kaseipeh nahiuve, Pathen'in hiche songho-a kona hi Abraham son asodoh sah thei ahi. 9Chule tu jeng jongin thing bultinah heicha kikoija ahitai; chutiachu thingphung aga phalou chengse chu kiphuh lhu-a, meija kisep lutji ahi, ati.

10Chuin mihonpi chun, Achutile keihon ipi kabol dinguham? tin ama adongui.

11Chuin aman adonbutnin, amaho jah-a, Sangkhol ni neijan anei louva chu kihoppi hen; chule anneh neijan jong chutima chun bolhen, ati.

12 # Luk 7:29. Chuin kaidongho jong chu baptize chang dingin ahenga ahungun ajah-a, Mihil, keihonla ipi kabol dinguham? atiuve.

13Aman amaho jah-a, Nanghon nakiteppeh kalvalun mi-a lahbe hih-un, ati.

14Sepaiho injong adongun, Keihon jong ipi kabol dinguham? atiuvin. Aman amaho jah-a, Alam louvin koimacha acham louvin lahpeh hih-un; jouvin jong mi heh hih-un; chule nalo jat jat uvah lung lhaijun.

15Chuin mihon agaldot jingu ahito lhona, Hiche John hi Christa ahi khat tadem, tia lungthima angaito laitah-un, 16John'in adonbutnin, abonchauva jah-a, Keima vangin twija baptize kachansah nahiuve; ahivangin keima sanga hat chungnungjo ahunge, keima akeng chot khao sutlham dinga jong kilom kahipoi; amatah chun nangho Lhagao Thenga le meija baptize nachansah dingu ahi. 17Aman akhutna godal akichoijin, aphol ajapngim sela, chule achang pang sunga akhum ding; asi vang chu mit theilou meija agovam ding ahi, ati.

18Hiti chun aman tilkhouna thudang tamtah aseijin, amaho jah-a chun Kipana Thupha ahil lhanglen ahi. 19#Matt 14:3-4; Mrk 6:17-18. Ahin John'in Herod lengpa chu asopipa Philip inneipi Herodia jal leh athilbol phalouho jala apho jeh-in, 20John chu songkul'a akhumin, chonset chunga chonset abolbetai.

Jesu Baptize Chan

(Matt 3:13-17; Mrk 1:9-11)

21Chuin ahitin ahi, miho jouse baptize achanuva, Jesu jong baptize achan jouvin, ataovin ahile van akihongin, 22#Semt 22:1; Labu 2:7; Isai 42:1; Matt 3:17; Mrk 1:11; Luk 9:35. Chule Lhagao Theng tahsa vouvin vakhu bangin ahung kumlhan achunga achun, chule van'a konin aw ahung gingin, Nangma ka-Chapa deitah nahi; nachungah kalung alhai tangeije, ati.

Jesu Khanggui

(Matt 1:1-17)

23Jesu amihil kipat chun ama kum somthum vel alhingin, mi ngaiton ama chu Joseph chapa ahin, Joseph chu Heli chapa ahin, 24Heli chu Matthat chapa ahin, Matthat chu Levi chapa ahin, Levi chu Melchi chapa ahin, Melchi chu Janna chapa ahin, Janna chu Joseph chapa ahin, 25Joseph chu Mattathias chapa ahin, Mattathias chu Amos chapa ahin, Amos chu Nahum chapa ahin, Nahum chu Esli chapa ahin, Esli chu Nagge chapa ahin, 26Nagge chu Maath chapa ahin, Maath chu Mattathias chapa ahin, Mattathia chu Semei chapa ahin, Semei chu Joseph chapa ahin, Joseph chu Juda chapa ahin, 27Juda chu Joanna chapa ahin, Joanna chu Rhesa chapa ahin, Rhesa chu Zerubbabel chapa ahin, Zerubbabel chu Shealtiel chapa ahin, Shealtiel chu Neri chapa ahin, 28Neri chu Melchi chapa ahin, Melchi chu Addi chapa ahin, Addi chu Cosam chapa ahin, Cosam chu Elmodam chapa ahin, Elmodam chu Er chapa ahin, 29Er chu Jose chapa ahin, Jose chu Eleazer chapa ahin, Eleazer chu Jorim chapa ahin, Jorim chu Matthat chapa ahin, Matthat chu Levi chapa ahin, 30Levi chu Simeon chapa ahin, Simeon chu Juda chapa ahin, Juda chu Joseph chapa ahin, Joseph chu Jonam chapa ahin, Jonam chu Eliakim chapa ahin, 31Eliakim chu Melea chapa ahin, Melea chu Mennan chapa ahin, Mennan chu Mattatha chapa ahin, Mattatha chu Nathan chapa ahin, Nathan chu David chapa ahin, 32David chu Jesse chapa ahin, Jesse chu Obed chapa ahin, Obed chu Boaz chapa ahin, Boaz chun Salmon chapa ahin, Salmon chu Nahson chapa ahin, 33Nahson chu Aminadab chapa ahin, Aminadab chu Aram chapa ahin, Aram chu Hezron chapa ahin, Hezron chu Peres chapa ahin, Peres chu Judah chapa ahin, 34Judah chu Jacob chapa ahin, Jacob chu Isaac chapa ahin, Isaac chu Abraham chapa ahin, Abraham chu Terah chapa ahin, Terah chun Nahor chapa ahin, 35Nahor chun Seruch chapa ahin, Seruch chu Reu chapa ahin, Reu chu Peleg chapa ahin, Peleg chun Eber chapa ahin, Eber chu Shelah chapa ahin, 36Shela chu Cainan chapa ahin, Cainan chu Arphaxad chapa ahin, Arphaxad chu Shem chapa ahin, Shem chu Noah chapa ahin, Noah chu Lamech chapa ahin, 37Lamech chu Mathusala chapa ahin, Mathusala chu Enoch chapa ahin, Enoch chu Jared chapa ahin, Jared chu Mahalalel chapa ahin, Mahalalel chu Cainan chapa ahin, 38Cainan chu Enos chapa ahin, Enos chu Seth chapa ahin, Seth chu Adam chapa ahin, Adam chu Pathen chapa ahi.

Currently Selected:

Luke 3: THADBSI

Highlight

Copy