Mark 13
13
Jesu'n Houin Suhmanga Aum Ding Asei Masah
(Matt 2:1-2; Luk 21:5-6)
1Chuin Houin'a kona apotdoh-in aseijuite khatnin ajah-a, Houhil, vetan, asongho itobang song hija chule in kisah ho hi itobanga kisalul hitam, ati.
2Jesu'n ajah-a, Nangman hiche in loupitah hi namu-em? Hikoma hi song suhchim louva khat chunga khat kisethop himhim umlou helding ahi, ati.
Gimna Le Hesohna
(Matt 24:3-14; Luk 21:7-19)
3Chuin Pathen Houin jontah Olivet molsanga chun atouvin ahile Peter, Jacob, John, Andrew teho chun atumbeh-in ajah-a, 4Hicheng chu itihle hi dingham? Chule hitiho chu ahung guilhun phat ding chu amelchihna ipi hintem? Neisei peh-un tin adong lhiuvin ahi.
5Chuin Jesu'n adonbutnin hitin aseije, Koiman nangho nalheplhah louna dingun kichih theijun. 6Mi tamtah keima minin hunguntin, Keima Christa kahi tiuvintin, mi tamtah alheplhah dingu ahi. 7Chule nanghon gal kisatle kidou thuthang najah tengule, lungdong hih-un; hicheng chu hung soh tei ding ahi; ahivangin achaina hiloulai ding ahi. 8Ijeh-inem itile vai khatle vai khat, gam khatle gam khat hung kidouvintin, mun chom mun choma ling hung kihot intin, kel hunglha-a gentheina hung lhung ding ahi; hicheng chu hahsatna kipatna ahi.
9 #
Matt 10:17-20; Luk 12:11-12. Amavang kichih theijun; ajehchu vaihom upate khutna pehdoh-a nahung umdingu, kikhopna in'a nakivo dingu, chule keima mina vaipoho le lengho anga amaho douna-a hettohsah dinga nahung din dingu ahinalaije. 10Kipana Thupha hi namtin vaipi lah-a hillhanga um masa tei ding ahi. 11Chule nakaijuva napehdoh tengule, ipi iti kasei dingham tin amasangin lungkham hih-un; ahin aphattahle nakipeh chanu chu seibouvun; ijeh inem itile aseija chu nangho hilouvin, Lhagao Theng joh ahi. 12Chule asopin asopi, pan acha tha dinga ahinpehdoh ding; chate kipatdoh uva anule apa adoudiu, amaho chu ahin thasah dingu ahi. 13#Matt 10:22. Chule keima min jala nangho mi jouse hotna nahung umdingu ahi; ahinla akhon ni geija thoh lhumkeija pangdetpabou chu huhhing-a umding ahi.
Tijatna Nasatah
(Matt 24:15-28; Luk 21:20-24)
14 #
Dan 9:27; 11:31; 12:11. Amavang themgao Daniel seibangin, misumang thet umtah chu adinna dol louva adin namu tengule (asim siman hehen), chutengle Judah gama um chengse thinglhang lamah jamuhen: 15#Luk 17:31. In chunga uma jong hung kumlha hihhen, athilkeo kilah dingin in sunga lut hihhen: 16Loujaova uma jong apon kilah dingin kilekit dahen. 17Ahin ohe, hiche lai chule agaija le naonoi chepsahho ada nadinguve! 18Chule najam nadingu phat chu phalbi ahi louna dingin taovun. 19#Dan 12:1; Tph 6:12. Chuche nikho chu hesoh gentheina nikho hi ding ahi, chutobanga hesohna nasatah chu Pathen'in lei asema patnin tu geijin aumkha hihlaije, chule um jong umlou ding ahi. 20Chule Pakaiyin chuche nikho chu asuhchom lou hileh, mihem himhim asohcha umlou ding ahi; ahivangin alhendohsa alhen chomte jala anikho chu asuhchom ahitai.
21Chutengle najah uva khattouvin, Ven, hikomah Christa aume, atia; ahiloule, Ven, khukoma aume, atile tahsan hih-un. 22Ijeh-inem itile Christa lhemho le themgao lhemho hung sohdoh untin, melchihna le mu kidang dang ahin vetsah dingu; ahitheile lhenchomte jeng jong ahinlheplhah dingu ahi. 23Nangho vang kichihtheijun; veuvin, ijakai kahil masah dem nahitaove.
Mihem Chapa Hungding Phat
(Matt 24:29-31; Luk 21:25-28)
24 #
Isai 13:10; Ezek 32:7; Joel 2:10,31; 3:15; Tph 6:12. Ahivangin chucheng nikholai, hesoh genthei joule, nisa thimintin, chule lha jong vahta lou ding, 25#Isai 34:4; Joel 2:10; Tph 6:13. vanlaijola konin ahsi ho hung pullhantin, chule van'a hatnaho chengse kihot lingsoh ding ahi. 26#Dan 7:13; Tph 1:7. Chutahle vanlaijola Mihem Chapa thunei Chungnung tah le loupitah-a meibola ahung amu dingu ahi. 27Chutah chule aman vantil ho asola, leiset monga pat van mong geija kolkimvel li-a kona alhen chomte alon khom ding ahi.
Theichang Phunga Kon Kihilna
(Matt 24:32-35; Luk 21:29-33)
28Theichang phung hin thulem kihilun; abah adona ajih akilhap tengle nipi anaitai ti naheuve. 29Chutobang chun nangho jong hicheng chu aguilhun namu tengule, anaitai, kotbul hung geija ahitai, ti heuvin. 30Tahbeh-a kaseipeh nahiuve, Hichengse chu aboncha aguilhun masangse-a, hiche tulai khanga mite hi mang lou ding ahi. 31Vanle lei mang ding ahin, keima thu vang mang lou ding ahi.
Koiman Anikho Le Anidantah Ahepoi
(Matt 24:36-44)
32 #
Matt 24:36. Ahivangin Pa tailou van'a vantilte jong, Chapa jong, koimachan anikhole ani dantah chu ahepoi. 33Chingtheijun, kiging jingin umunlang tao jingun: ijeh inem itile aphat chu itih ahi ding nahepouve. 34#Luk 12:36-38. Ajehchu mihem Chapa hi mi khat asohte thuneina pedoh, abonchauva atoh ding cheh-u pe-a, chule kotngah kiging jinga umdinga thu apeh nunga, a-in dalha-a migam danga chemanga tobang ahi. 35Hiche jeh chun kiging jingin umun, ijeh-inem itile inneipu chu itih-a ahung ding nahepouve, nilhah lam ahim, jan khangkim ahim, ahkhonphat ahim, jingkah ahim, ahung ding phat nahepouve. 36Hetman louvin hungjeng tale na-imut petnu hungtoh khante. 37Nangho jah-a kasei hi mi jouse jah-a kasei ahi, Kiging jingin umun, ati.
Currently Selected:
Mark 13: THADBSI
Highlight
Share
Copy
Want to have your highlights saved across all your devices? Sign up or sign in
Thadou Kuki CL (Re-edited) Bible - Pathen Thutheng BU
Copyright © 2015 by The Bible Society of India
Used by permission. All rights reserved worldwide.
