NASEPTE 9
9
Saul pianthakna
(Nst. 22.6-16; 26.12-18)
1Tuachi`n Saul in Toupa nungjuite avau thu leh thah atup thu genkhia kawm kawm in siampi kiangah avapai a. 2Tualeh Damaska khua a kikhopna innte a dingin lai a ngen a, lampi a mi kuapeuh pasal hi`n numei hitaleh amuh muh kansa a Jerusalem khua a ahung paipih theihna ding in.
3Tualeh khualzin a Damaska khuagei a hungtun in, thakhat in van a kipan in vak akim ah ahung tang a. 4Tuachi`n leiah apuk a, “Saul, Saul! Nang bangding a hung bawlgenthei na hia?” chi`n aw aja a.
5Tuachi`n aman, “Toupa kua na hiam?” achi a.
Tuachi`n Toupa`n, “Jesu na bawlgentheih ka hi,” chiangjumte pekjing nang a dingin ahaksa hi, achi a. 6Tuachi`n aman kithing kawm leh lamdang satakin, Toupa bang bawl dingin nungdeih a? achi a. Tuachi`n Toupa`n akiang ah, “Thou inla khuapi sung ah lut in, tuachi`n nabawl ding ahung nahilh ding uh,” achi hi.
7Tualeh amah tawh zinkhawmte gen ding beiin ading ua, aw aja ua, hinanleh kuamah amukei uhi. 8Tuachi`n Saul leia kipan in athou a, ahung hak a hinanleh bangmah amuthei kei a, tuachi`n akhut in akai ua, Damaska khua ah apuilut uhi. 9Tuachi`n khua mulou in nithum aom a, bangmah ane in adawn kei hi.
10Tualeh Damaska ah amin Anania kichi nungjui khat aom a, Toupa`n mangmu bangin akiang ah, “Anania!” achi a, tualeh aman,
“Toupa hiah ka om,” achi a.
11Toupa`n akiang ah, “Thou inla, lamlian tang achih uah pai inla, tualeh Juda inn a om Tarsa khua a mi amin Saul kichi kankhia in, ajiak ngaiin, athum laitak ahi, achi a, 12tualeh mangmu bangin mikhat amin Anania kichi lut a, amit vaksak ding a atung a akhut ngain amuta hi.”
13Tuachi`n Anania in, “Toupa, hihpa in Jerusalem khua a na misiangthoute tung a sil hoihlou abawl dante mi tampi kam ah kija hi. 14Tualeh hihsan ah zong na min lou jousiahte mattheihna dingin siampite kiang a kipan in thu amu hi,” achi a.
15Hinanleh Toupa`n akiang ah, “Pai maiin, ajiak amah pen Jentelte leh kumpipate leh Israelte kiang a Ka thu pualut ding a ka belseh ahi. 16Tualeh kamin jiak a bang zahta a thupi ahia athuak ding, akiang ah theisak ding ka hi,” achi hi.
17Tuachi`n Anania avapai a, inn ah alut a, atung ah khut ngaiin, “Sanggampa Saul, namit vakna ding leh Khasiangthou na dimtheihna dingin, Toupa, nung paina lampi a na kiang a kilak Jesu ngeiin a hungsawl ahi,” achi hi. 18Thakhat in lip tawh kibang banghiam khat amit a kipan akiata a, tualeh thakhat in amit ahung vakta a, tuachi`n a thou a, baptisma atangta hi; 19tuachi`n an ane a, a halhta hi. Tuachi`n Saul Damaska a nungjui omte kiang ah ni bangzah hiam atam hi.
Saul in Damaska ah thu agen
20Tualeh kikhopna innte ah Jesu pen Pasian Tapa ahihdan thu atang koupihpai ngal hi.
21Tuachi`n athu jate jousiahin lamdang asa mahmah ua, “Hihpa Jerusalem khua a, hih min loute bawlgenthei jelpa hilou amaw? Tualeh kansa a siampite kiang a pui tum a hihsan a hungpai hilou amaw?” achi ua.
22Hinanleh Saul pen ahung hat semsem a, Jesu hi Krist ahi taktak hi chih hilhchian in Damaska khua a Juda omte angaihna theilouin akoih hi.
23Tualeh ni tamtak nungin amah thah tum in Judate akihou ua, #2 Kor. 11.32,33. 24hinanleh Saul in athiltup uh ana thei a. Tualeh amau`n amah thah tum in kulh kongkhak sun leh janin ata`ng uhi. 25Tuachi`n nungjuite`n amah janin apui ua, kulhbang ah bawm in a khaikhiata uhi.
Saul Jerusalem leh Tarsa ah
26Tualeh Saul Jerusalem atun in nungjuite kithuahpih asawm a. Hinanleh amau`n nungjui ahih a gintatlouh jiak un alau mahmah uhi. 27Hinanleh Barnaba in amah apui a, sawltate kiang ah ahung paipih a. Lampi a Toupa amuh a, ahoupih bang, tualeh Damaska khua a Jesu min a hangsantak a thu agendante bang a genta a. 28Tuachi`n amah Jerusalem khua ah akiang uah lutjel pawtjel in aomta hi. 29Toupa Jesu min in hangsan takin thu agen jel a, tualeh Grik Judate anial a, hinanleh amau`n amah thah atum uhi. 30Tuachia a sanggamte`n atheih tak un Kaisaria khua ah apaipih suk ua, Tarsa khua ah asawl mangta uhi.
31Tuachi`n saptuamte Judea gam vel, Galili gam vel, Samaria gam vel ah adet deuhdeuh ua, muangtak in aomta uhi. Tualeh Toupa laudan siam in, Khasiangthou khamuan in aom ua, ahung tam deuhdeuhta uhi.
Peter Lidda leh Joppa ah
32Tualeh hichi ahung hi a, Peter pen gam jousiah tuan in apai a, Lidda khua a misiangthou tengte kiang ah ahung paisuk a. 33Tualeh huasan ah amin Aenia kichi, ajeng jiak a kum giat lupna a lumjing khat amu a. 34Tualeh Peter in akiang ah, “Aenia, Jesu Krist in ahung damsak hi, thou inla napuan phah jial in,” achi a, tuachi`n amah athou pai a. 35Tuachi`n Lidda leh Saron a om jousiahin amah amu ua, Toupa lam angata uhi.
36Tualeh Joppa khua ah amin Tabitha kichi nungjui khat aom a. (Tabitha Grik ham in Dorka ahi) Hih numeiin sil bawlhoih leh silpiak ahau mahmah hi. 37Tualeh hichi ahung hi a, hualaiin achi ana a, asita a, asilzoh un inndan tungnung ah alumsak uhi. 38Tualeh Lidda khua hi Joppa khua gei ahihjiak in nungjuite`n Peter huasan ah aom chih aja ua, “Sawt hallou a akiang ua hungpai ding a va-ngen dingin akiang ah minih asawl ua.” 39Tuachi`n Peter athou a amauhgel tawh akitonta a. A hungtun in amah inndan tungnung ah apaipih ua, tualeh meithai jousiah akiang a dingin Dorka akiang ua adamlai a apuan ak bawlte apuan bawlte lak pum in akap ua. 40Hinanleh Peter in aun un apawtsak a, akhupdin a athumta a; tualeh aluanglam nga in, “Tabitha thou in!” achi a, tualeh amahnu`n amit ahung hah a, Peter amuhtak in ahung touta hi. 41Tuachi`n Peter in akhut apia a, akaithouta a, tualeh misiangthoute meithaite asam a, dam in apiata hi. 42Tualeh huathu Joppa khua mi jousiahin atheisuak ua, tuachi`n mi tampi in Toupa agingta uhi. 43Tualeh hichi ahung hi a, Peter pen Joppa khua ah savun bawlpa Simon inn ah ni tampi atamta hi.
Currently Selected:
NASEPTE 9: THKHBSI
Highlight
Share
Copy
Want to have your highlights saved across all your devices? Sign up or sign in
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
