LUKA 17
17
Jesu`n ataihilh
(Mat. 18.6,7,21,22; Mrk. 9.42)
1Tuachi`n aman nungjuite kiangah, “Puknate omlou thei ahikei, hinanleh pukna omsaktu tung agik hi! 2Hih mineute lak a khat apuksak sang in, a ngawng ah buhgawina suang awhsak in tuipi ah kipai leh amah a dingin ahoihjaw ding hi.” 3Pilvang un!
“Na sanggam pa`n natung a sil a bawlkhial leh phawk in, tualeh akisik leh ngaidam in. #Mat. 18.15. 4Nikhat sung a natung a sil sagihvei abawl khial a sagihvei na kiang a, ‘Ka kisik hi,’ chia nanglam ahung kihei kikleh na ngaihdam ding ahi,” achi hi.
Ginna
5Tualeh sawltakte`n Toupa kiangah, “Ka ginna uh khangsak in,” achi ua.
6Toupa`n, “Ankam tang khat bang ginna naneih uleh hih kawl sathau kung kiangah, ‘Na kibawtkhia inla tuipi ah na kisuan in nachi ding ua!’ na thu uh amang ding hi.
Sila mohpuakna
7“Nou lak a kua nahi ua, loukai hiam, belam ching ahiam a sila khat nei a, lou a pat a hungtun chiang a pai inla an neding in toungal in ana chi ding? 8‘Ka nek ding hung bawlsak inla, nakawng gak inla, ka nek a ka dawnzoh masiah ka nek ding bawl in, huazoh chiangin nang ne-in nadawn ding, chijaw lou ding maw?’ 9Aman hua silapa kiangah thu kipia bang a abawl jiakin apakta ei le? 10Huachi mahbang in nou zong na kiang ua thupiak jousiah na bawlzoh chiang un, ‘Sila phatuam lou ka hi uh ka bawl ding mawng uh ahi ka bawl uh, chi un,’ ” achi hi.
Jesu`n phak sawm adamsakna
11Tualeh hichi ahung hi a, Jerusalem juan a apai in Samaria leh Galili gam atuan paisuak a. 12Tuachia khuakhat a alut leh phak sawm in ana lamdawn ua, amauh gamlapi ah ading ua 13tualeh aw ngaihtak in akikou ua, “Jesu! Siapa! Ka tung uah zahngaiin!” achi ua.
14Tualeh aman amauh amuhtak in akiang uah, “Pai unla siampute va ki-ensak un,” achi a.
Tualeh hichi ahung hi a, apai lai un ahung siangthouta uhi. #Lev. 14.1-32.
15Tualeh alak ua khat in adamta chih ahung kitheih takin akik kik a, aw ngaihtak in Pasian a phat a. 16Jesu kengbul ah a khupbok a, kipahthu agen hi, amah Samaria mi ahi. 17Tuachi`n Jesu`n adawng a, “Sawm hilou maw suksiangthou a om; kuate khoia om ta ula? 18Hih gamdangmipa chihlouh Pasian phat ding a hung kik kik kuamah akimu kei,” achi hi. 19Tuachi`n aman a kiang ah, “Thou inla, paita in, na ginna in ahun damsakta hi,” achi hi.
Hung tung ding kumpi gam
(Mat. 24.23-28,37-41)
20Tualeh Pharisaite`n Pasian gam hungtun hun ding adok uleh aman adawng a akiang uah, “Pasian gam muhtheih in a hungtung kei hi. 21Tualeh, ‘En un, hihtak ah!’ ahihkeileh, ‘En un, huatak ah!’; zong achi kei ding uh, bangjiakin ahia ichihleh, ngaiun, Pasian gam pen nalak uah aom hi,” achi hi.
22Tuachi`n aman a nungjuite kiangah, “Mihing Tapa damlainite nikhat bek na muhnuam ni uh ahung om ding, hinanleh na mukei ding uhi. 23Tualeh amau`n na kiang uah, ‘En un, hihteng ah!’ ahihkeileh, ‘En un, huatak ah!’ ahung chi ding ua, pai kei unla, anung uh zong juikei un. 24Tunphe van mong langkhat a aphet a, van mong langkhat lam tanpha asalhvak mahbang in mihing Tapa zong ahung paini in ahi ding. 25Hinanleh hua masang in sil tampi athuak ding a, tulai khangthakte deihouh in aom ding hi. 26Noah damlai a sil omdan bang in Mihing Tapa hung paikik ni chiangin zong ahi ding hi. #Gen. 6.5-8. 27Noah gunkuang a alut a tui ahung let a, aun ua a hihlupni atun masiah ane un, adawn ua, zi anei ua, tualeh zi-leh ta in akipia tuah uhi. #Gen. 7.6-24. 28Tuachimah bang in Lot damlai in zong aom ua, ane un adawn ua, alei un ajuak ua, asuan un alam uhi. #Gen. 18.20; 19.25. 29Hinanleh Sodom khua a pat Lot apawt ni-in van a pat in mei leh kat aju a, aun un a kanglumta hi. 30Tuachimah bang in Mihing Tapa hung kilakni chiangin ahi ding hi.
31“Tuani chiangin kuahileh inn tung a om innsung ah a dangka omte lading in kum kei hen; tualeh huachi mahbang in kuapeuh lou a om zong hungkik kik kei hen. #Mat. 24.17,18; Mrk. 13.15,16. 32Lot zi theijing un! #Gen. 19.26. 33Mi kuapeuh a hinna humbitna zong in ata`n ding a, tualeh kuapeuh ahinna ta`n in ahumbit ding uhi. #Mat. 10.39; 16.25; Mrk. 8.35; Luk. 9.24; Jhn. 12.25. 34Kunghilh ahi, huazan in lupna khat ah minih alum ding a: khat lakmang in aom ding a, khat nutsiat in a om ding. 35Numei nih ansu in a om ding a, khat lakmang in a om ding a, khat nutsiat in a om ding.” 36Lou ah minih aom ding ua, khat lakmang in aom ding a, khat nutsiat in aom ding, achi hi.
37Tualeh amau`n adawng ua akiang ah, “Toupa, khoi ah la?” achi ua,
Aman akiang uah, “Saluang omna phot ah langta zong a omkhawm ding uh,” achi hi.
Currently Selected:
LUKA 17: THKHBSI
Highlight
Share
Copy
Want to have your highlights saved across all your devices? Sign up or sign in
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
