LUKA 8

Numei nih Jesu nna sepsakte

1Tualeh hichi ahung hi a, Jesu thuhilh kawm leh Pasian gam tangthupha gen kawm in khuapi leh khuata ah avak kawikawi a, sawmlehnihte a kiangah a om uhi. 2Tualeh numei kuate hiam, dawipai damkik leh natnate a pat damkik Mari Magdalini achih uh, a sung a pat dawi sagih pawtdoknanu tawh, #Mat. 27.55,56; Mrk. 15.40,41; Luk. 23.49. 3tualeh Herod dangka kemtu Chuza zi Joanna tawh, Susana tawh, tualeh midang tampite tawh ahi ua, huaten aneihsa un a nna asepsak jel uhi.

Khaichi thehpa gentehna

(Mat. 13.1-9; Mrk. 4.1-9)

4Tuachi`n mipi tampitak ahung kikhawm ua, khuachin a mi akiang a ahung pai tak un, gentehna thu agen a:

5“Khaichi thehpa a khaichi theh in akuan a; tualeh athehlai in khenkhat lamsik ah atu a, mi`n atuanchil a, tungleng vasaten anengaita uhi. 6Tualeh khenkhat suangtung ah atu a, apoutak in alei anawm louh jiakin avulpaita hi. 7Tualeh khenkhat loulingnei lak ah atu a, tuachi`n ling tawh a hung poukhawm a, adeplumta hi. 8Tualeh khenkhat leihoih ah atu a, ahung pou a, alehja in agahta hi,” achi a.

Tualeh hihthute agen khit in akikou a, “Kuapeuh jakna ding bilnei jousiahin ja hen!” achi hi.

Gentehna thu omjia

(Mat. 13.10-17; Mrk. 4.10-12)

9Tuachi`n a nungjuite`n hih gentehna thu bang chihna ahia? chin amah adong ua. 10Tuachi`n aman, “Pasian gam thugukte noute theih ding phal ahina, hinanleh midangte kiangah gentehna guak a gen ahi; mujing ngala amuh louhna ding uleh, jajing ngala atheihsiam louhna ding un.” #Isa. 6.9 (LXX).

Jesu`n gentehna te ahilhchian

(Mat. 13.18-23; Mrk. 4.13-20)

11“Hua gentehna thu ahihleh hih a hi: Buhchi pen Pasian thu ahi a. 12Lamsik a tute ahihleh thu jate ahi uh, tuachi`n dawimangpa a hungpai a, thu a lungtang ua pat a lamang hi, a gintat ua hundam a a omlouhna ding un. 13Suangtung ate ahihleh hichi bang ahi uh, azak tak un thu kipak takin apom ua; tualeh hihte`n jung anei kei ua, tomkhat sung agingta ua, khemna atuah chiang un apukjel uhi. 14Tualeh loulingnei lak a tute ahihleh thu jate ahi ua, ajak nung un apai ua, khawsak ding dan ngaihtuah nate, hausaknate tualeh damsung nopsaknate`n adep a, agah piching ngaikei hi. 15Hinanleh leihoih a tute ahihleh lungtang siangthou leh hoih in thu aja ua, apom ua, tualeh kuhkal tak a gah suangte ahi uhi.

Meivak zang a gentehna

(Mrk. 4.21-25)

16“Mi kuaman meivak adet chiangin kuang in a khuhngai kei, ahihkeileh lupna nuaiah zong a koihngai kei hi. Alut jousiahin vak a muhtheihna dingin meivak tunna ah akoihjaw hi. #Mat. 5.15; Luk. 11.33. 17“Kilanglou ding a im bangmah aom kei a, tualeh theihlouh ding a kisel bangmah aom kei hi. #Mat. 10.26; Luk. 12.2.

18“Tuajiakin bang chi`n ahia najak uh pilvang un, ajiak ahihleh kuapeuh aneite piak beh ahi ding a, tualeh kuapeuh aneiloute aneihsun zong laksak ahi ding hi,” achi hi. #Mat. 25.29; Luk. 19.26.

Jesu nu leh a sanggamte

(Mat. 12.46-50; Mrk. 3.31-35)

19Tualeh anu leh a sanggamte a hungpai ua, hinanleh mipi jiakin akiang atungthei kei ua. 20Tuachi`n, “Na nu leh na sanggamte nang hung munuam in inn pualam ah ading uh chi`n ahilh ua.”

21Tuatakin aman adawng a akiang uah, “Ka nu leh ka sanggamte ahihleh Pasian thu ngaikhia a juite ahi uh,” achi hi.

Jesu`n tui kihot adaisak

(Mat. 8.23-27; Mrk. 4.35-41)

22Tualeh hichi ahung hi a, nikhat a nungjuite tawh gunkuang ah ahung tou ua, aman akiang uah, “Nawng galkhat lam ah ipai ding uh achi a,” tuachi`n gunkuang phel in atawlta ua. 23Tualeh a kitawl laiun amah a ihmuta a, tualeh tua nawng tung ah huihpi ahung langsuk a, a gunkuang uh tuiin adimta a, tuachi`n lauthawng huaitakin ahung omta uhi. 24Tuatakin amauhte a kiangah ahung pai ua, aphong ua, “Siapa, Siapa! mangthang ding ka hita uh!” achi ua. Tuachi`n amah a hungthou a, huih leh tui kihot ataita a, tuachi`n atawp a, ahung daita hi. 25Tuakhit in aman akiang uah, “Na ginna uh khoia om ahia?” achi a.

Tuachi`n amauh lauin lamdang asa mahmah ua, “Hihpa bang chibang mi hi ahia? Huihte leh tui nasan thu apia a, athu amang uh!” achi ua.

Gadara gam a dawinin pai damsakna

(Mat. 8.28-34; Mrk. 5.1-20)

26Tuachi`n Galili gal a om Gadarate gam ahung tung ua. #8.26 Gadara, Gerasa, (Gergesa-grik) chi`n a om, hinanleh akibang ahi uhi. 27Tualeh amah gam a akaidok takin hun sawtpi dawinin pai kuahiam khat in khuapi a pat amah ana kituah pih a; tualeh aman puan asilh kei a, inn mawng mawng ah zong a om kei a, hanmual lak ah a omjel hi. 28Tualeh aman Jesu amuh takin, a kikou a, amaiah apuk a, tuachiah aw ngaihtak in, “Jesu nang tungnung pen Tapa, kei leh nang bang bawlding nei ihia? Hung hihgim lou dingin kung ngen ahi!” achi hi. 29Aman dawinin hua mipa sung pat a pawt ding a thu ana piaktak jiakin, tamveipi dawinin in ana mankhata a, sikkhau leh kol bulhsak in a omta a, tualeh aman a kikannate a phutan a, gamdai ah dawi delhmang in a om hi.

30Tuachi`n Jesu`n akiang ah, “Na min bang ahia?” chi`n a dong a,

“Aman, ‘Nuai,’ ” achi a; asung a dawi tampi lut ahihjiak in. 31Tualeh amau`n kawkhuk thukpi a paikik ding a thu pialou dingin akiang ah a ngen ua. #8.31 Grik ham a Abissos kichi pen- abyss, bottomless pit- hell- chih ahi a, gawtmun-leinuai- kuakhuk tawbei chih a leh in a om hi.

32Tualeh huamun ah vok-hon tampi ata ua, amau`n huate sung a alut phalsak dingin a ngen ua, tuachi`n aman aphalsak hi. 33Tuatakin dawite hua mipa sung a pat a pawtkhia in vokte sung ah alut ua, vok honte nawnglam ah munken a pat a taisuk ua, tui valh in asita uhi.

34Tualeh akhawite`n sil omdan amuhtak un atai ua, hihthu khuapi leh khua neu ah avagen uhi. 35Tuatakin bang thu ata chia en ding in ahung pawt ua; Jesu kiang ahung tun uleh dawimatpa puansilh a, lungsim hoihtak pua a Jesu kengbul a tou amu ua, tuatakin alauta uhi. 36Tualeh amauhte`n dawimatpa damsak a ahung omdante ana hilh ua. 37Tuatakin Gadara gam kimvel a mi jousiahin alau mahmah jiak un amah akiang uapan paimang dingin a ngen ua; tuachi`n amah gunkuang sung ah alut a akik kikta hi. 38“Tualeh a sung a dawi pawtnapa`n akiang a omden dingin a ngen a.”

Hinanleh Jesu`n amah asawl khia a. 39“Na inn ah paikik inla, Pasian in natung a bangchituk a silthupi hung bawlsak ata ale, chih vahilh in,” achi a.

Tuatakin amah apaita a, Jesu`n sil thupitak amah ding a abawlsak khuapi pumpi ah a phuangjakta hi.

Jaira tanu leh numei sipawt damsakna

(Mat. 9.18-26; Mrk. 5.21-43)

40Tualeh hichi ahi a, Jesu ahung kinungleh kik in mipi`n amah kipak takin ana vaidawn ua, ajiak aun ua amah nangak jing ahi uhi. 41Tualeh ngaiin, pasal khat amin Jaira kichi kikhopna inn a vaihawmtu ahung pai a, Jesu kengbul ah a khupbok a a inn a hawhding in a ngen a, 42ajiak aman tanu kum sawmlehnih vel pha khatguak anei a, amah laitat in alum a.

Hinanleh Jesu apai takin mipi`n atuam lutlut ua. 43Tualeh numei khat kum sawmlehnih sipawt, aneih jousiah daktorte kiang a joubeita, hinanleh kuaman adamsak zohlouh. 44Anung ah a hungpai a, apuan mong akhoih a tuachi`n asipawt akangta hi. 45Tuatakin Jesu`n, “Kua ahia ahung khoih?” achi a.

Tualeh mi jousiahin kei hikeng achihchiat tak un, Peter leh alawite`n, “Siapa mi jousiahin hung tuam a, hungneh lutlut ua, kua ahia ahung khoih nachih,” achi ua.

46Jesu`n, “Kua ahiam khat in ahung khoih hi, ajiak sil bawltheihna ka sung a pat in apawt hi chih kathei hi,” achi hi. 47Tuachi`n numeinu`n akiphual theihlouh amuh takin, kithing kawm in a hungpai a, a maiah apuk a, mipi jousiah maiah a kiangah akhoihna san leh ahung dampai dan a phuangta hi. 48Tuachi`n Jesu`n a kiang ah, “Tanu, khamuangtak in om in; naginna in ahung damsak ahi. Lungmuangtak in paita in,” achi hi.

49Aman hichi a thu agenlai in kikhopna inn vaihawmtu inn a kipan in mikhat a hungpai a, “Na tanu asita hi, Siapa hihbuaidah maiin,” achi hi.

50Hinanleh Jesu`n hih ajaktak in adawng a, a kiangah, “Lauken; gingta maiin tuachi`n amah adamdok kik ding,” achi hi.

51Tualeh innsung a aluttak in Peter tawh Jakob tawh Johan tawh tualeh naupang apa leh anu chihlouh kuamah lut aphal kei hi. 52Aun un amahnu kah in ana mau vengvung ua, hinanleh aman, “Kap kei un; asi ahikei a ihmu ahijaw!” achi hi.

53Amau`n amahnu asita chih atheih un amah anuihsan uhi. 54Tualeh aman aun un a sawldok siang a, amahnu khut in atu a, “Nungak thou in!” chi`n asam a. 55Tuatakin akha ahung paikik a, a thoukhiapai a, tuachi`n amahnu nek ding piading in thu apia hi. 56Tuatakin anu leh apa`n lamdang asa mahmah ua; hinanleh hua sil kibawl pen kuamah hilhlou dingin aman amauh a khamta hi.

Currently Selected:

LUKA 8: THKHBSI

Highlight

Copy