MATHAI 22
22
Kitenna ankuang gentehna
(Luk. 14.15-24)
1Tualeh Jesu`n a dawng a akiang uah gentehna thu agen kik a. 2“Van gam pen kuahiam kumpi khat a tapa a ding a kitenna ankuang lui tawh kibang ahi. 3Tualeh kitenna ankuang luina a chialte sam dingin asilate asawl a, amauh ahung painuam kei uhi. 4Aman asila dangte asawl dok kik a: ‘chialte kiang ah vapai unla, ngaiun, ka ankuang kamanta; ka bawngtalte leh ka gan vakthaute kagou a, bangkim amanta hi; kitenna ah hungpaita un!’ vachi un, achi hi. 5Hinanleh amau`n ana limsak kei ua, khat alou ah, khat asum bawlna ah a paimangta ua, 6tualeh midangte`n asuakte aman ua, musittak in abawl ua, athatta uhi. 7Hinanleh kumpipa in huabang thu ajaktak in aheh mahmah a, a galkapte a sawl a, hua tualthatte a hihmang a, tualeh akhuapi uh zong a halsakta hi. 8Tuachi`n aman asilate kiangah, ‘kitenna ankuang amanta, hinanleh ka chialte anetak ahikei uh, achi a. 9Tuajiakin kongjing ah pai unla, mi namuh taphot uh anne dingin hungchial un,’ achi hi. 10Tuachi`n hua silate apawt ua, kongjingte ah vapaiin amuh taphot uh misia mipha aun un a samkhawm ua; tuachi`n kitenna inndan sung michialte in ahung dimta hi.
11“Hinanleh kumpipa a michialte en ding a a hunglut leh, kitenna puan silhlou mi khat amuta a. 12Tuachi`n aman a kiang ah, ‘Lawm, bangchidan ahia kitenna puan silhlou a hihsan a nunglut?’ achi a. Tuatakin amah adai dide a. 13Tuachi`n kumpipa`n asilate kiangah, ‘Akhut leh akengte kan unla, puakhia unla, pualam mial ah paikhia un, hua ah kahleh hagawina a om ding.’ ” #Mat. 8.12; 25.30; Luk. 13.28.
14Ajiak, “Tampi sap ahi a, hinanleh tawmnou khat tel ahi uh,” achi hi.
Siah thu a dokna
(Mrk. 12.13-17; Luk. 20.20-26)
15Tuachi`n Pharisaite apai ua, athugen a mattheihna ding dan a kikum ua. 16Tualeh amau`n a nungjuite uh leh Herod pawlte a kiangah asawl ua, huate`n a kiangah, “Siapa, midiktak nahi a, diktak in Pasian lam thu nahilh a, mi kuamah khawksak tuam na neikei chih ka thei uh; kuamah khentuam na neikei hi. 17Huajiakin bangchi nasa a? Hung hilh in. Kaisar kiang a siah tawi asiang hiam, sianglou?” achi ua.
18Hinanleh Jesu`n a lungsim uh gitlouhdan pen athei a, “Milepchiahte aw! Bangding a hung ze-et nahi ua? 19Siah dangka hung ensak un!” achi a,
Tuachi`n a kiangah makhai khat a hungtawi ua, 20tuateh aman akiang uah, “Hih kualim leh kua laigelh ahia?” achi a.
21Amau`n a kiangah, “Kaisar a,” achi ua.
Tuachi`n aman akiang uah, “Kaisar silte Kaisar kiangah pia unla, Pasian silte Pasian kiangah pia un,” achi hi.
22Hih thute ajak un lamdang asa mahmah ua, amah apaisan ua, a paimangta uhi.
Thohkikna thu a dokna
(Mrk. 12.18-27; Luk. 20.27-40)
23Huanimah in Sadukaite thohkikna a omkei chite a kiangah a hungpai ua. #Nst. 23.8. 24“Siapa, Mosi-in mi taneilou a asihleh a sanggampa in azi aluah ding a, asanggampa a dingin chi akhahsak ding ahi, achi hi. 25Tuin, kalak uah sanggam pasal sagih a om ua, a upapen in zi anei a, asita, chi akhahlouh jiakin azi asanggampa anutsiat a. 26Huachimah bangin anihna zong taneilou in asi a, athumna in aluah a, sagihna tan in aneichiat ua. 27Atawp in numeinu zong ahung sita hi. 28Tuajiakin, thohkikna ah amahnu pen kuazi ahita diai? A un un lah a neichiat ngal ua,” chi`n a dong ua.
29Jesu`n a dawng a akiang uah, “Pasian Laisiangthou leh Pasian sil bawltheihna na theihlouh jiak un na hihkhial jel uhi! 30Thohkikna ah kitenna a om nawnkei a, teng zong a kitengsak nawnkei uh, van a vanmite bang ahita uhi. 31Hinanleh misi thohkikna ah: Pasian in na kiang ua agen simkha ngailou nahi uh hiam? 32‘Keimah Abraham Pasian, Isak Pasian, Jakob Pasian ka hi,’ achih, chi in. Pasian jaw misi Pasian ahikei a, mihing Pasian ahi jaw,” achi hi. #Exo. 3.6.
33Tualeh mipite`n hih ajaktak un a thuhilhdan lamdang asa mahmah uhi.
Thupiak lianpen thu a dokna
(Mrk. 12.28-34; Luk. 10.25-28)
34Hinanleh Jesu`n Sadukaite aseljou chih ajak un amau akikhawm ua, 35tuachi`n alak ua dansiammi khat in amah ze-et in thukhat a dong a, 36“Siapa, danthu ah khoipen ahia thupiak lianpen?” chi in.
37Jesu`n a kiangah, “ ‘Toupa na Pasian na lungtang tengteng in, na kha tengteng in, na lungsim tengteng in na it ding ahi,’ chih. 38Hih thupiak masapen leh thupiak lianpen ahi. 39Tualeh anihna zong hihbang mah ahi: ‘Nangmah na ki it bangin na innvengte na it ding ahi,’ chih. #Lev. 19.18. 40Hih thupiak nihte tungah danthu leh Jawlneite thu jousiah a kikhaikhawm siang ahi,” achi hi. #Luk. 10.25-28.
Messiah thu a dokna
(Mrk. 12.35-37; Luk. 20.41-44)
41Pharisaite akikhop lai un, Jesu`n amauh thu a dong a, 42“Krist hi bangchi`n na ngaihsun ua? Amah kua tapa ahia?” achi a, amau`n a kiangah,
“David Tapa,” achi ua.
43Aman akiang uah, “Ahihleh,” bang chidan a “David in kha a amah, ‘Toupa’ achih?”
44“ ‘Toupa`n ka Toupa kiangah:
na melmate na kengphang nuaiah kakoih masiah,
ka jiatlam ah tou in,’
chia Toupa achih ahia? 45David in amah ‘Toupa’ achihleh, a tapa bang achi hihthei diai?” achi a.
46Tuachi`n kuamah in amah kamkhat in zong a dawngthei takei ua, huani a kipan in kuaman thudang mawng mawng a dong ngam nawn takei uhi.
Currently Selected:
MATHAI 22: THKHBSI
Highlight
Share
Copy
Want to have your highlights saved across all your devices? Sign up or sign in
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
