Maatteeo 28

Ũrũga Yeesu

(Tigiil Maarko 16:1-8; ꞌLuuka 24:1-12; Yõaannẽ 20:1-10)

1Ma baa edeccia Kõrra cĩ ꞌYiommaanõ, lomidikaawa ngerrenita, iita õõt Maria Madalẽẽna hĩ Maria baa umwa, hõõt hĩcĩnĩt ꞌlook cĩ Yeesu.

2Baa aaĩ hirihidtihi umwaa ꞌcĩ attiran gẽrrẽẽt, hĩnĩngĩtĩ baa alluuccia aajĩlõ cĩ Makayyiookto hẽẽtahujjieen nẽ ũũk ĩĩcĩ ꞌloohu. Nĩngĩtĩ aku abĩllĩĩngĩ bẽẽ ꞌcĩ aꞌnyũũgẽnĩ hattũũg cĩ ꞌloohu ho nẽ ũũk iccioloonganĩ thõng. 3Baa aaĩ nẽẽ hĩ bõrõhẽẽcĩ ꞌcĩ ammadĩ thõng nẽ ĩĩtõ õõrĩg ceremwaana cĩgĩnnĩg haauto hĩ loduruui. 4Baa iꞌngolli bekiooha ĩnõõnnõ gẽrrẽẽt nẽ abarritit haauto hĩ eeta ꞌcĩg adaahito ẽlẽk.

5Nẽ uduhaak aajĩlõ nicciee ngaaĩ niccig ĩĩnnĩk, “Ma hiteelinnu, haga naa adiimmu niig Yeesu baa odooddothoothĩk hurucceea. 6Aitiõõ nẽẽ ngaati tõõ! Ũrũga nẽẽ daahĩtha hĩ baa aduha nẽẽnĩ. Iita da ĩcĩnĩt nĩngĩ baa aarĩhõõthĩkĩ ẽlẽ cĩnnẽẽnĩ. 7Nẽ ꞌyioko, õõt hĩdĩĩkoothong õõt uduktaak nuyyiook cĩgĩnnĩg ĩĩttĩk, ‘Ũrũga Yeesu daahĩtha nẽ utuwaneekuung ngagiit ũũk ĩĩcĩ ꞌGalileea. Õõ hatĩ acinnu niig ĩnõõnnõ ĩĩca.’ Thõõth ꞌcĩ hakuu haduhaakuung naa ngagiit ko nicciaani.”

8Nĩngĩtĩ aꞌthũkcĩ ngaaĩ niccieeg ũũnnĩkĩ ꞌlook hõõt huduktaak nuyyiook cĩgĩnnĩg, tananga itieelli, baa accamanoothĩk pee. 9Ma hĩdĩĩkoothong, ikia uppwaannak Yeesu ĩhõõggõ nẽ ĩĩnnĩk, “Hĩꞌthaayyuunga!” Nĩngĩtĩ au ĩĩthahaanĩ nẽẽg hiita hõbõktõ hĩ ĩnõõnnõ nẽ arabũtĩtõ ꞌthoo cĩgĩnnĩg, nĩngĩtĩ alaĩ ĩnõõnnõ. 10Ma nĩngaata, ikia uduhaak Yeesu ĩhõõggõ ĩĩnnĩk, “Ma hiteelinnu! Õõt uduktaak ꞌgotoonoga anneek, hõõt hommottio ĩĩcĩ ꞌGalileea, õõ hatĩ acĩnna nẽẽg nganĩĩt ĩĩca.”

Nyeemuut cĩ bekioohu

11Ma baa nga õvvõ ngaaĩ cieeg ꞌgõõla, iita õõt athegereeꞌnya ũgẽẽgĩ ꞌcĩg baag ẽbẽk ꞌlook cĩ Yeesu ĩĩcĩ ꞌtaaũnõõ nẽ õõt uduktaak makayyiook cĩg paadĩrꞌnyaannu thooꞌthiok vẽlẽk ꞌcĩg baag acĩn nẽẽgĩ. 12Ma baa iita ommottio makayyiooha cĩg paadĩrꞌnyaannu hĩ makayyiook cĩg eetuk, iita ummuhit ꞌgõõl ꞌcĩ appirridanĩ nẽẽg athegereeꞌnya ꞌrabbẽẽtĩĩ ꞌcĩg mẽẽlĩg gẽrrẽẽt. 13Nẽ itilõõcõ ĩhõõggõ ĩĩttĩk, “Uduktaak eet ĩĩttĩk, ‘Iita igorithit nuyyiooha cĩg Yeesu ẽlẽ cĩ Yeesu baa baal, baa nga hooginna naag thõng.’ 14Nẽ má ũũk ĩthĩk ꞌgaalacĩ cobbi thõõth icci, hothoothonna hatĩ hĩ ngagĩĩta nẽ hatĩ iittiõõ thõõth umwaa ꞌcĩ abathĩ hĩ ngagiit tõõ.” 15Nĩngĩtĩ aggamaanĩ athegereeꞌnya ꞌrabbẽẽt niccig nẽ ĩdĩmanit hĩ baa adukiaak ĩhõõggõ. Nẽ nga aalla athithan eeta cĩg ꞌJudeei nyeemuut ꞌcĩ aĩ, “Iita igorithit nuyyiooha cĩg Yeesu ẽlẽ cĩ Yeesu,” hĩĩ kõr hĩ niccieeni.

Tilooinit cobbi

(Tigiil Maarko 16:14-18; ꞌLuuka 24:36-49; Yõaannẽ 20:19-23; Dtiicanĩ cĩg ꞌThooyyiahu 1:6-8)

16Nĩngĩtĩ ĩꞌngaannĩ nuyyiooha cĩg Yeesu baag ĩĩn õmmõtõ hĩ hõdẽĩ õõĩ ꞌGalileea, ĩĩcĩ muur baa aduhaak Yeesu ĩhõõggõ anneek hõõt homottiõõĩ. 17Ma baa ĩcĩnĩt nẽẽg Yeesu, iita alaacõ nẽẽg ĩnõõnnõ, nẽẽthĩ hinnia, baa nga aalla ĩccaad ũgẽẽgĩ ĩnõõnnõ noho. 18Ma nĩngaata, ikia uppwaannak Yeesu ĩhõõggõ nẽ ĩĩnnĩk, “Baa aaꞌnyĩhoothĩhaa nganĩĩt makaaꞌthĩt cĩ hẽẽtkujjieen hĩ cĩ lootu vẽlẽk. 19Nẽ ꞌyioko, õõt aanytĩk eet loonyini vẽlẽk hĩĩtõ nuyyiook cĩgannĩg, aggamteek ĩhõõggõ baattithimo ꞌthaarĩĩ cĩg Maacõnĩ hĩ cĩg Ngeerĩnĩ hĩ cĩg Lori ꞌcĩ Ẽllẽẽmĩthĩ, 20õõt illimanit ĩhõõggõ jurrung hĩthĩhĩt thõõth vẽlẽk baa hallimaneekuung naa ngagiita. Nẽ dĩdĩ, harũmĩ hatĩ gõõng naag hĩ ngagiit hõdõõkõthĩ ĩꞌthõng kõr cĩ decciaanĩt cĩ lootu.”

Currently Selected:

Maatteeo 28: did

Highlight

Copy