Maarko 1

Irrioon Yõaannẽ Batitta

(Tigiil Maatteeo 3:1-12; ꞌLuuka 3:1-18; Yõaannẽ 1:19-28)

1Ĩĩn ciee ꞌthianaanĩt cĩ nyeemuut ꞌcĩ abũnnaa#1:1 Nyeemuut ꞌcĩ abũnnaa: Õthõõth Nyeemuut ciee Yeesu Krĩstõ baa aku ũũny ꞌthẽccanẽẽt cĩggaac daahĩthaa cĩnnĩ hurucceea nẽ aaꞌnyeet rũgẽt ꞌcĩ aalla ooo. cĩ Ngeertĩ Nyekuci Yeesu Krĩstõ.#1:1 Yeesu Krĩstõ: ꞌThaara ꞌcĩg haĩ Yeesu ho, aĩ ẽẽlanneet Nyekuci. ꞌThaara ꞌcĩg haĩ Krĩstõ ho, aĩ ẽbẽra Nyekuci eet hĩĩ Habu.

2Aduha ꞌbuuhi baa ẽhẽẽd põrõvẽtaacĩ#1:2 Põrõvẽtaac: Ĩĩn põrõvẽtaacĩ eet ꞌcĩ athĩkna nyeemuut hĩ Nyekuc nẽ ikia uduhaak eeta. Iꞌthaia aĩ,

“Hĩꞌthõõakii hatĩ naa Nyekuci ꞌthooyyiahit caannĩ

ꞌcĩ aku akũmaneek ꞌgõõl cunni.”#Tigiil ꞌBuuk cĩ Malaaki 3:1

3“Ẽggẽrẽny mõlõõhĩ cĩ eet umwa horrwaa ꞌcĩ õdõhõhĩĩ kak aĩ,

‘Ũkũmatteek ꞌgõõl cĩ Makayyiookto,

aanytĩk ꞌgõõl cĩnnĩ hũũlan.’ ”#Tigiil ꞌBuuk cĩ Iꞌthaia 40:3

4Nĩngĩtĩ uppwaannanĩ Yõaannẽ Batitta horrwatõõ ꞌcĩ õdõhõhĩĩ kak nẽ ikia aggameek eet ꞌcĩg ũtũngteek ꞌthẽccanẽẽt cĩggĩĩng baattithimo,#1:4 Baattithimo: Aggam ẽẽtĩ baattithimo, hátĩ hẽtẽrẽtha ngaatĩ ũtũngẽẽhĩ nẽẽ ꞌthẽccanẽẽt cĩgĩnnĩg nẽ ẽlẽm Nyekuc. ĩnõõ ꞌcĩ hatĩ ũũnnĩkĩ Nyekuci ꞌthẽccanẽẽt cĩggĩĩng buúk. 5Baa õõ eeta vẽlẽk cĩg looc cĩ ꞌJudeea hĩ cĩg ꞌJeruꞌthalẽmĩ hĩ Yõaannẽ, hõõt huduktaak ĩnõõnnõ ꞌthẽccanẽẽt cĩggĩĩng nẽ aggameek ĩhõõggõ baattithimo lĩĩlaa cĩ Hidioo cĩ ꞌJõrdanĩ. 6Nẽ baa ahimit Yõaannẽ ceremwa ꞌcĩg adĩmanniaa ĩmanĩĩ cĩg nyaakaalak nẽ ẽcẽb hadẽẽngõ, nẽ adak ꞌgirooc nẽ uduk loteec cĩ hurubulitu hĩĩ ꞌgẽẽn cĩnnĩ. 7Baa irrioonĩk nẽẽ eet anneek, “Aaĩ hatĩ ẽẽtĩ umwaa ꞌcĩ anũaanna nganĩĩt ꞌcĩ ĩllõõannaa nganĩĩta, hõllõngaa haga naa ngaatĩ occa hõõganĩ lõhamũcĩ cĩg caawa cĩgĩnnĩg. 8Haggameekuung naa ngagiit baattithimo maamĩ haaga, nẽẽthĩ, aggameekuung hatĩ nẽẽ ngagiit baattithimo Loriiaa ꞌcĩ Ẽllẽẽmĩthĩ.”#1:8 Lori ꞌcĩ Ẽllẽẽmĩthĩ: Ĩĩn Lorii ꞌcĩ Ẽllẽẽmĩth Lori cĩ Nyekuci. Aĩ Yeesu, ĩĩn Nyekuci Maaꞌnyĩ, ne ĩĩ nẽẽ Ngeertĩ Nyekuci. Aĩ thõõth ciee, ĩĩn Maaꞌnyia Nyekuc nẽ ĩĩ Ngeerĩnĩ Yeesu Nyekuc. Nẽ ĩĩ Lorii ꞌcĩ Ẽllẽẽmĩth Nyekuc. Nẽ tarĩ ĩĩtõ Maaꞌnyia hĩ Ngeerĩnĩ hĩ Lori ꞌcĩ Ẽllẽẽmĩth vẽlẽk, Nyekuc Hõdẽẽthõng. Tigiil ꞌBuuk cĩ Yõaannẽ 1:1-18; 8:41-42; Dtiicanĩ cĩg ꞌThooyyiahu 5:3-4.

Baattithimo cĩ Yeesu

(Tigiil Maatteeo 3:13-17; ꞌLuuka 3:21-22)

9Ma waathinniook nicciag noho, ĩtĩngaayyia Yeesu ꞌtaaũnaa cĩ Naaꞌtharẽtĩ looccaa cĩ ꞌGalileea, hikia haggameek Yõaannẽ ĩnõõnnõ baattithimo lĩĩlaa cĩ hidioo cĩ ꞌJõrdanĩ. 10Ma baa ĩꞌngõtha Yeesu maamĩ battaala, ikia ĩcĩnõõthĩ nẽẽ hẽẽtkujjieen ngaatĩ abbuuhẽnĩ nẽ ulluucciak ĩnõõnnõ Lorii ꞌcĩ Ẽllẽẽmĩth ꞌcĩ aaĩ hĩ bõllõõĩ. 11Ma ho, õthõõth mõlõõhĩ umwaa ꞌcĩ aku hẽẽtahujjieen ĩĩ, “Ĩĩnĩ nii Loholeec caannĩ ꞌcĩ hammĩnannii gẽrrẽẽt ũdũt nẽ haccamanoothihi naa, hĩnĩngĩtĩ nganiita.”

Attĩman ꞌThĩttaanĩ Yeesu

(Tigiil Maatteeo 4:1-11; ꞌLuuka 4:1-13)

12Ma hĩdĩĩkoothong, ũũhĩ Lorii ꞌcĩ Ẽllẽẽmĩth Yeesu horrwatõõ ꞌcĩ õdõhõhĩĩ kak, 13ũũk aau nẽẽ nĩĩca waathinniook hẽẽn ꞌwec horrwatõõ ꞌcĩ õdõhõhĩĩ kak, attĩman ꞌThĩttaanĩ#1:13 ꞌThĩttaan: Ĩĩn ꞌThĩttaanĩ habu cĩ aajĩlẽẽt baag abũrĩ Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Tigiil ꞌBuuk cĩ Terethiitto 12:9. ĩnõõnnõ. Baa arũmĩ nẽẽ hĩ idiꞌngwa cĩg moru, nĩngĩtĩ au ẽẽlĩ aajĩlẽẽta#1:13 Aajĩlẽẽt: Ĩĩn aajĩlẽẽta loriẽẽt ꞌcĩg arũmĩ hĩ Nyekuc hẽẽtahujjieen nẽ aitiõõ ĩhõõggõ eleeti tõõ. Ĩꞌthõõa Nyekuci ĩhõõggõ waathinnioohĩĩ ũgẽẽgĩ hiita haꞌnyaktaak nyeemuut cĩ Nyekuci eet loota nĩnga. ĩnõõnnõ.

Aũ Yeesu nuyyiook ꞌcĩg oou

(Tigiil Maatteeo 4:12-17; ꞌLuuka 4:14-15)

14Ma baa urutaa ꞌcĩ aarĩhõõthĩhĩ Yõaannẽ baabuuth ẽlẽk, ikia ũũk Yeesu ꞌGalileea nẽ ũũk illiman nyeemuut ꞌcĩ abũnnaa cĩ Nyekuci. 15Baa õthõõth nẽẽ aĩ, “Õbõhĩ habuccieet cĩ Nyekuci aau ojoonu. Ũtũngteek ꞌthẽccanẽẽt cugguung nẽ elemtu nyeemuut ꞌcĩ abũnnaa!”

Aũ Yeesu nuyyiook ꞌwec

(Tigiil Maatteeo 4:18-22; ꞌLuuka 5:1-11)

16Ma baa nga õvvõ Yeesu ẽdẽcĩ dẽmẽt cĩ Bũlũc cĩ ꞌGalileea, ikia udtuuha nẽẽ ꞌgõtõn ꞌramma, ꞌThimõõnẽ hĩ Andrea, adhuheek nyelelewwa cĩnĩĩng bũlũcatõõ, hĩnĩngĩtĩ baa ĩĩn nẽẽg eet ꞌcĩg aggam ulugo. 17Ma ho, ũtũvvũ Yeesu ĩhõõggõ ĩĩnnĩk, “Iita unuyyiaangu nganĩĩta nẽ hatĩ heteretheehuung naa ngagiit ꞌgõõl ꞌcĩ avvaannu eet hiita hĩ nganĩĩta.” 18Ma nĩngaata noho, iita ũtũngteek nẽẽg nyelelewwaꞌnya cĩggĩĩng nẽ ũnnẽẽcõ ĩnõõnnõ.

19Ma baa ũũk Yeesu ĩĩcĩ oou hĩdĩhĩdĩĩc, udtuuha nẽẽ ꞌJeemith hĩ Yõaannẽ lõhõlĩ cĩg ꞌThebedeeo, ꞌcĩg baag aattĩg haahũlaa cĩnĩĩng alũũlũ nyelelewwaꞌnya cĩggĩĩng. 20Ma hĩdĩĩkoothong, ũtũvvũ nẽẽ ĩhõõggõ, nĩngĩtĩ ũũnnĩkĩ nẽẽg maaꞌnyĩ ꞌThebedeeo hĩ dticcianniook haahũla nĩngaata nẽ ũnnẽẽcõ ĩnõõnnõ.

Iiggia Yeesu lori ꞌcĩ abathĩ

(Tigiil ꞌLuuka 4:31-37)

21Baa õõ Yeesu hĩ nuyyiook cĩgĩnnĩg ꞌtaaũnaa ꞌcĩ haĩ Kapernaum. Ma baa Kõrraa cĩ ꞌYiommaanõ,#1:21 Kõr cĩ ꞌYiommaanõ: Baa iyyioman eeta cĩg ꞌJudeei Kõrraa cĩ ꞌYiommaanõ halaacõ Nyekuc. Kõrraa cĩ, ammuha nẽẽg Nyekuc ngaatĩ ĩĩnnĩ Teheꞌnyioohit nẽ ĩĩ ellioohit cĩnĩĩng. Hanneek naag Kõr cĩ ꞌYiommaanõ ho, lõõcĩ tõrkõnõn, nẽẽthĩ, avvĩ eeta cĩg ꞌJudeei Kõr cĩ ꞌYiommaanõ anneek, “Thabath” ꞌcĩ baa ĩĩn Kõr cĩnĩĩng ꞌcĩ ĩĩn tũkĩramma. Tigiil ꞌBuuk cĩ Luugithõõ 20:8-11, Ditoronomi 5:12-16. ũũk uduhun nẽẽ ꞌCieeth cĩ Laiitto nẽ iꞌthianaaĩ ꞌlimman.#1:21 ꞌCieeth cĩ Laiitto: Baa gõõng aꞌnyak eeta cĩg ꞌJudeei ꞌCieethi ꞌcĩg mẽẽlĩg cĩg Laiittak ꞌtaaũnnioohĩĩ cĩggĩĩng. Baa gõõng aluttiaak nẽẽg ꞌCieeth cĩ Laiitto Kõrraa cĩ ꞌYiommaanõ halaacõ Nyekuc nẽ itigiilito Thõõth cĩnnĩ. 22Baa ĩnaat eeta ꞌlimman cĩnnĩ ho gẽrrẽẽt, hĩnĩngĩtĩ baa alliman nẽẽ eet makaaꞌthĩtaa ꞌcĩ hõllõngaa aduhõõ hĩ ꞌlimmanniook cĩg nyattal cĩ Mũũꞌtha. 23Ma ꞌCieethaa cĩ Laiitto nĩngaata, baa aaĩ eet umwaa ꞌcĩ aꞌnyak lori ꞌcĩ abathĩ nẽ urruuo ĩĩ, 24“Adiimi nii hĩ ngagĩĩt#1:24 Ngagĩĩt: Thõõth ꞌcĩ aĩ ngagĩĩt ko, õthõõthĩ lorii ꞌcĩ abathĩ ẽlẽ cĩnnĩ hĩ ꞌgõõnõgĩ ũgĩ buúk ꞌcĩg abathĩ. neegi Yeesu cĩ Naaꞌtharẽtĩ? Akuu nii, hátĩ ijjia ꞌruheet ngagĩĩta? Hagayyi naag nganiit ĩĩnĩ Eet ꞌcĩ Ẽllẽẽmĩth cĩ Nyekuci!”

25Nĩngĩtĩ ẽggẽrꞌnyẽẽkĩ Yeesu lori ꞌcĩ abathĩ ho annẽẽkĩ, “ꞌJaahõ! Duhuna battaala ẽllaa cĩ eet nicci!” 26Ma ho, ikia õtõmõõĩ lorii ꞌcĩ abathĩ ho eet nicci gẽrrẽẽt nẽ ẽggẽrẽny moloohaa cobbi, nĩngĩtĩ aduknaanĩ ẽllaa cĩ eet nicci.

27Baa abulan thõõth ciee eet vẽlẽk gẽrrẽẽt nẽ ijitto nyaagwaana ĩĩtõ, “Ne occa gõõng ciee? Occa ĩĩn ciee ꞌlimman ꞌcĩ nga ĩĩn ngeju ꞌcĩ attiran gẽrrẽẽt! Athĩhĩ aattĩ loriẽẽta ꞌcĩg abathĩ buúk ĩnõõnnõ.” 28Ma hĩdĩĩkoothong, ikia ĩꞌthanothoothĩk nyeemuut cĩ Yeesu ho looc cĩ ꞌGalileea vẽlẽk.

Aaꞌnyĩk Yeesu eet ꞌcĩg mẽẽlĩg hũbũttaathõ

(Tigiil Maatteeo 8:14-17; ꞌLuuka 4:38-41)

29Ma baa uduhutta Yeesu hĩ nuyyiook cĩgĩnnĩg hĩ ꞌJeemith hĩ Yõaannẽ ꞌCieethaa cĩ Laiitto, iita õõt nẽẽg ĩĩcĩ õlõ cĩ ꞌThimõõnẽ hĩ Andrea. 30Baa õmmõõrĩ inyitti ꞌThimõõnẽ aaburii ẽlẽ gẽrrẽẽt, oongi ꞌcieetõõ. Ma nĩngaata, ikia uduhaak eet umwaa Yeesu nĩĩcĩ noho. 31Nĩngĩtĩ õkõõĩ nẽẽ hõbõktõ hĩ nangẽrẽb nẽ aggam ĩnõõnnõ aꞌthiit cĩnnĩ nẽ õdõng haau ꞌjieena. Ma hĩdĩĩkoothong, ikia ũtũngeek ĩnõõnnõ abuurꞌtheta, nĩngĩtĩ adticanõõthĩkĩ nẽẽ ĩhõõggõ.

32Ma ꞌjiaatĩn niccia baa okoloothĩk kõrra, iita aꞌnyaktaak eeta Yeesu eet ꞌcĩg õmmõõrĩ vẽlẽk hĩ ꞌcĩg aꞌnyak loriẽẽt ꞌcĩg abathĩ.#1:32 Loriẽẽt ꞌcĩg abathĩ: Baa ĩĩn cieeg aajĩlẽẽt ꞌcĩg baag arũmĩ hĩ Nyekuc hẽẽtahujjieen nẽ iita ũtũbũrĩt nẽẽg Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Nẽ ꞌyioko, iita accananit loriẽẽta cieeg eet loota nĩnga. Tigiil ꞌBuuk cĩ Terethiitto 12:7-9. 33Baa allũnganniaa eeta vẽlẽk cĩg ꞌtaaũn cĩ Kapernaumĩ, hiita hĩbbĩtĩt hirriamatteek hattũũg cĩ ꞌcieeth ꞌcĩ ꞌThimõõnẽ ho. 34Nĩngĩtĩ aaꞌnyĩkĩ Yeesu eet ꞌcĩg mẽẽlĩg ꞌcĩg õmmõõrĩ mooriꞌthiook cũũmõ cũũmõ hũbũttaathõ nẽ itiggia loriẽẽt ꞌcĩg abathĩ ꞌcĩg mẽẽlĩg buúk eleetinii cĩg eetuk nẽ ẽtẽdẽyẽẽhĩ loriẽẽt ꞌcĩg abathĩ ho ngaatĩ õthõõthĩ, hĩnĩngĩtĩ baa aga loriẽẽta ꞌcĩg abathĩ ho Yeesu nganĩ.

Ũũk alaõ Yeesu ngadiiha

35Ma baa ngaalloohoth ngerrenita, ĩtĩnga Yeesu ũtũngeek õlõ nẽ ũũk aau ẽmmẽn ngadiiha nẽ alaõ nĩngaata. 36Ma ho, ĩtĩngaacõ ꞌThimõõnẽ hĩ ꞌgõõnõgĩ õõt idiimtõthĩ ĩnõõnnõ. 37Ma baa õõ ammũda ho, õõt uduktaak ĩĩttĩk, “Adiimmi eeta vẽlẽk nganiita.”

38Ẽdẽcĩ Yeesu ĩhõõggõ anneek, “Hõõt olooyyiohĩĩ ꞌcĩg obokii ho, hátĩ hũũk hillimman nyeemuut ꞌcĩ abũnnaa ĩĩca buúk. Thõõth ꞌcĩ hakuuni naa ho cieeni.” 39Nĩngĩtĩ õvvõõĩ nẽẽ looc cĩ ꞌGalileea vẽlẽk, irrioonĩk eet ꞌCieethini cĩg Laiittak nẽ itiggia loriẽẽt ꞌcĩg abathĩ eleetinii cĩg eetuk.

Eet ꞌcĩ adak helleggeri

(Tigiil Maatteeo 8:1-4; ꞌLuuka 5:12-16)

40Baa aku eet umwaa ꞌcĩ adak helleggeri#1:40 Helleggeri: Baa aduha nyattalĩ cĩ Mũũꞌtha aĩ, ẽẽtĩ ꞌcĩ adak helleggeri ĩĩn ꞌriiring nẽ aꞌngirannii ngaatĩ arũmẽẽnĩ hĩ eet cĩg ꞌJudeei. Má ikia ũbũna ẽẽtĩ cieeni, aꞌnyĩĩk heteretheek ẽlẽ paadĩr nẽ hatĩ uduha paadĩrĩ ĩĩ ũbũna nẽẽ ĩĩ tẽlla. Tigiil ꞌBuuk cĩ Levitiko 14:1-32. ammũdaak Yeesu nẽ akateek ĩnõõnnõ huruꞌnyia nẽ ĩĩlaleek ĩĩnnĩk, “Má atabi, aꞌnyaa hũbũna.”

41Ma ho, atamaatĩk Yeesu eet nicci, nĩngĩtĩ ahumi ĩnõõnnõ nẽ ĩĩnnĩk, “Eeĩ, hatabbii naa nganiit bũna. Bũna ĩĩ tẽlla!” 42Ma hĩdĩĩkoothong, ũtũngeek helleggeri ĩnõõnnõ nẽ ũbũna.

43Nĩngĩtĩ ilootĩkĩ Yeesu ĩnõõnnõ thõõth gẽrrẽẽt nẽ ĩꞌthooĩk ꞌgõõl hũũk anneek, 44“Ma hõkõ haduhaahi eet umwa thõõth icci. Deceek bĩĩt teretheek ẽlẽ cunni paadĩr#1:44 Paadĩr: Eetinii cĩg Ĩꞌthĩraẽlĩ, ĩĩn paadĩrĩ eet ꞌcĩ aku habuccieetaa cĩ ꞌLeevi nẽ ĩnõõnnõ ꞌcĩ ĩbbõõr ꞌgaarrieenit halaangatõõ cĩ ꞌCieeth cĩ Nyekuci. nẽ aaꞌnyĩhuu ꞌbaaninit baa aduha Mũũꞌtha#1:44 Mũũꞌtha: Urutaa cĩ daahĩth cĩ Yothebo, iita ĩĩtõ lohollia cĩg Ĩꞌthĩraẽlĩ appahacaaꞌnya Ijjiba irkiꞌnyia ꞌmiiaꞌnya ꞌwec. Baa adticaniini Nyekuci Mũũꞌtha hõõgaĩ eet cĩg Ĩꞌthĩraẽlĩ appahacẽẽꞌthĩta. Baa aaꞌnyĩk Nyekuci lõhõlĩ cĩg Ĩꞌthĩraẽlĩ nyattal, hĩnĩngĩtĩ Mũũꞌtha. Ĩnõõ ꞌcĩ haĩnnĩ nyattal icci nyattal cĩ Mũũꞌtha ho. Baa arũgĩ Mũũꞌtha irkiꞌnyia aalib hõdẽĩ hĩ ꞌmiiaꞌnya ꞌwec, baa nga hittirria Yeesu. Tigiil thõõth cĩnnĩ ꞌBuuhaa cĩ Luugithõõ 2-24. ꞌcĩ abũnnayyĩĩ nii ho, hĩĩ terethiinit cĩ bũnnai cĩ ẽlẽ cunni.”#1:44 Helleggeri: Baa aduha nyattalĩ cĩ Mũũꞌtha aĩ, ẽẽtĩ ꞌcĩ adak helleggeri ĩĩn ꞌriiring nẽ aꞌngirannii ngaatĩ arũmẽẽnĩ hĩ eet cĩg ꞌJudeei. Má ikia ũbũna ẽẽtĩ cieeni, aꞌnyĩĩk heteretheek ẽlẽ cĩnnĩ paadĩr, hátĩ huduha paadĩrĩ hĩĩ ũbũna nẽẽ ĩĩ tẽlla. Tigiil ꞌBuuk cĩ Levitiko 14:1-32.

45Ma ho, õkõ hinnia ẽẽtĩ nicciee ĩꞌthaanĩk nyeemuut nicci looc vẽlẽk, hikia haaꞌnyĩk Yeesu hitingõlĩ ngaatĩ õkõõĩ ꞌtaaũna lothippita nẽ awwua ꞌrẽẽna ngadiiha, ngaatĩ aitiõõnnĩ eeta tõõ. Aalla nẽẽ au eeta loonyini vẽlẽk, ammũdeek ĩnõõnnõ noho.

Currently Selected:

Maarko 1: did

Highlight

Copy