Te Otinako 18
18
Kawaran Moote Iroun Ietero
1Ao Ietero are ibongani Mirian, are tamani buun Moote, e ongo aron b'aai ni kabane ake E a tia ni karaoi te UEA nakoni Moote ma Iteraera ngke E kaotinakoia mai Aikubita. 2Ma ngaia are, e kawara Moote, ao e kaira buun Moote are e tiku are Nei Tibora 3ma natina mm'aane ake uoman ake Kerition,#18.2-4 Kerition: Noora te taeka ane n 2.22. ao Erietera.#18.2-4 Erietera: N Ebera nanon “Erietera,” “E a tia ni buokai te Atua”. E taku Moote, “Bon te iruwa ngai n te aba ae I boou i aona;” ma ngaia are, e arana natina te mm'aane are temanna b'a Kerition.#18.2-4 Kerition: Noora te taeka ane n 2.22.
4Ao e taku naba, “E a tia ni buokai ma ni kamaiuai te Atua ae Tamau man tiringakiu iroun uean Aikubita.”#18.2-4 kamaiuai...mairoun uean Aikubita: Noora 2.1-15. Ma ngaia are, e arana natina te mm'aane are temanna b'a Erietera. #18.2-4 Erietera: N te taetae n Ebera, e kan bo nanona ma “E buokai te Atua.” 5Ao e kawara Moote Ietero n te rereua are e maeka iai Moote n te maunga are tabu, ao e airi ma buun Moote, ao natina mm'aane ake uoman. 6E a kamani kanakoa ana taeka nakoni Moote b'a a na roko ni kawaria. 7Ma ngaia are, e a kaman butim'aia Moote, e bobaraaki i mataia ma ni kaboria ao n inga ma ngaiia. Ao a i titirakiniia i bon irouia b'a a uara, ao i mwiina, a kaai n rinnako n ana auti n rianna Moote. 8Ao e a karakini b'aai ni kabane Moote nakon Ietero ake E karaoi te UEA nakon uean Aikubita, ao kaain Aikubita i bukin kamaiuaia Iteraera. E boni kaongoraea naba taiani kangaanga ake a kaaitibo ma ngaai aomata i aoni kawaia, ma aron te UEA ni kamaiuia. 9Ao e rangi ni kukurei Ietero ngke e ongo baikai, 10ao e taku, “E neboaki te UEA are E kamaiuko mairoun uean Aikubita ma kaaina! E neboaki te UEA are kamaiuia Ana aomata man te tautoronaki! 11I a bon ataia ngkai b'a E boni korakora riki te UEA nakoia atua nako, i bukina ngke E karaoa aei ngke a karaoa te m'akuri ae buakaka kaain Aikubita nakoia Iteraera.” 12Ao i mwiin arei, ao Ietero e a uota te karea ae b'anin ao karea riki tabeua n anga nakon te Atua: ao a bane n iria Aaron ma taani kairiia Iteraera b'a a na kana te iriko ae tabu arei ni bon aron aia taromauri.
Rineakiia Taani Moti
(Te Tua 1.9-18)
13Ao n te ingabong are i mwiina, ao e tabe Moote ni katoka te mangaongao i marenaia aomata, ao e rangi n tabetabe man te ingabong ni kabongnga. 14Ao ngke e noori b'aai ni kabane Ietero ake e karaoi Moote, ao e taku, “Tera ngkai ae ko karaoia nakoia aomata? E aera ngkai ti ngkoe ni karaoi aia kanganga aomata aika a nikiri i roum. A teibabaa aomata man te ingabong ni kabongnga.
15Ao e taku Moote, “N na riai ni karaoa aei b'a a kawarai aomata b'a a kan reireiaki nanon Ana kantaninga te Atua. 16Ngkana a roko i rou uoman aomata n taekina bobuakaia, ao I tuangiia Ana babaaire ma Ana tua te Atua.”
17Ao e taku Ietero, “Bon tiaki anne arona ae eti. 18Ko a boni kakorakaiko n reitaki ma aomata. E bon rangi ni bati tabem iai ngkana ti ngkoe. 19N na tuangko ngkai arom ae ko na karaoia, ao E na raoraoniko te Atua. E bon riai b'a ko na tei i bukiia aomata i matan te Atua, ma ni uoti mangaongaoia nako Ina. 20Ko riai n reireiniia Ana kaetieti te Atua, ma n tuangiia aroia ni maiu, ma baika riai ni karaoi. 21Ma i rarikin anne, ao ko riai n rineia mm'aane aika konab'ai b'a taani kairiiri i bukiia aomata. Rineia taani kairiiri i bukiia tengaun, nimangaun, tebubua ao teuana tengaa, aika koraki aika mamaka te Atua aika a kakaonimaki, ma n aki b'ab'aina te babakanikawai. 22Ko na kam'akuriia b'a taani moti i bukiia aomata, i aon tuua aika a tia ni kamatoaaki. Ao a kona ni uoti taiani kangaanga nako im, ma a kona ni baairei taiani kamangaongao i bon irouia aika uarereke. Ko na rangi ni bebete iai ngkai a i buokanib'aia rawawatam. 23Ngkana ko karaoa Ana kaetieti te Atua n aron aei, ao ko na bon aki kurakai iai, ao a na okiri aia auti aomata ma te kukurei b'a a toki iai mangaongaoia.”
24Ao e karaoa ana reirei Ietero Moote, 25ao e rineia mm'aane aika konab'ai mai buakoia Iteraera. E rineia tabeman b'a taani kairiiri i bukiia tengaa, ao tabeman i bukiia tebubua, ao tabeman i bukiia nimangaun, ao tabeman i bukiia tengaun. 26Ao a riki b'a taani moti i bukiia aomata i aon tua ake a tia ni kamatoaaki, ma ni uoti taiani kangaanga nakon Moote, ma a boni baairei taiani kamangaongao aika a uarereke.
27Ao i mwiin arei, ao e a kabo Moote nakon Ietero, ao e a okira ana auti Ietero.
Currently Selected:
Te Otinako 18: KNVB
Highlight
Share
Copy
Want to have your highlights saved across all your devices? Sign up or sign in
