Te Otinako 26
26
Taian Keeten ma Rabunan Te Um'antabunrianna
(Te Oti 36.8-19)
E taku te Atua nakon Moote:
1Karin keetenin te Um'antabunrianna aika a karaoaki man tebwiina m'akorokoro ni kunnikai aika riinen aika tamaroa. A na riai n rarangaaki man buraen te tiibu ae buru, ae uraro, ao ae uraura, ao a na karaoaki taamnein maan aika maiu aika iai baiia ni kiba aika korootinaki. 2Ab'akin keeten n tatabeua nako bon tebwi ma uoua te miita ao uoua te miita raababana, 3ao ituua n tomai ni kariki b'a uoua keeten aika nimaua m'akorokoroia n tatabeua nako. 4Karaoi taian taninga ni kimoa n te kunnikai ae te buru i tinanikun m'akorokoro n aron are a katautauaki iai. 5Kanim nimabwi taian taninga ni kimoa akanne n aron are a katautauaki iai ao nimabwi taian taninga ni kimoa ni kaboraoi i aon te kabanea ni m'akoro n te kauoua n aron are e a tia ni katautauaki iai. 6Karaoi nimabwi taian matau aika koora are e na kona n reitii taian katautau ake uoua b'a teuana te m'akoro.
7Ko na karaoa rabunan te um'anrianna man tebwi ma teuana m'akorokoro ni kunnikai aika karaoaki ma buraen te kooti 8Kaboraoi ab'akiia ni kabane, ae kaka tebwi ma tenua te miita ao uoua te miita raababaia n tatabeua nako. 9Ituui ni booti ake nimaua man taian m'akorokoro akekei ni karaoa iai teuana te keeten. Ao i mwiina, manga ituui ake onoua riki ni booti ni karaoa iai kakauoua n te keeten, ao rukuma te kaonoua ni m'akorokoro ni kauataoa i matan te um'a n rianna. 10Kanim nimabwi taian taninga ni kimoa n iteran rababan taian keeten nako, 11ao kabaei taian keeten ake uoua ni karin taian matau aika buraonti i nanon taian taninga ni kimoa ake nimabwi. 12E na riai n anaanau riki te keeten are buraen te kooti nakon ab'akin te auti n rianna, 13ma ngaia are, e na rukumaki nimabwi te mirimiita man te keeten i akuun te auti n rianna n iterana ake uoua b'a rabunana. 14Karaoi riki uoua rabunana—teuana ae e karaoaki man kunin te tiibu mm'aane ae e kaurauraaki ao are teuana man te kunniman ae e tamaroa.
Kain Oon Te Um'antabunrianna
(Te Oti 36.20-34)
E taku te UEA:
15Karaoi kain oon te Um'antabunrianna man te kai ae te aketia. 16Buburan kain oon te Um'antabunrianna n tatabeua nako bon aua te miita rietana ao onobwi ma onoua ab'akina 17ao uoua taian beke aika taiani kai i rarikin kaina ake mai nano. 18Karaoi uabwi taian kaintei i bukin iterana are mai maiaki 19ao abwi tirewa ni beke ake a rinnako i aana, ao uoua taian beke ni katoai taian kaintei ni kamatoai ake uoua. 20Ao uabwi taian kaintei i bukin akuun te Um'anrianna man te itera maeao 21ao abwi beke aika taian tirewa, ao uoua i aan taian kaintei. 22I bukin ngkanne te oo are mai buki are i tinanikun te itera are mai maeao, kam na kamanenai oneai kain te oo 23ao uoua riki n taian kaintei i bukin taian koona. 24Taian kaintei ni koona aikai a na bane n toma nakon are mai nano b'a e na reitaki nakon are ma ieta. 25Bootan kain te oo ake a na kamanenaaki i bukin te oo are mai tinaniku bon wanua ao uoua aia kaintei i aaia n tatabeua nako.
26Karaoi tengaun ma nimaai kaainikamatoa man te kai ae te aketia i bukin kain te oo, 27ao nimaai taian kaintei ni iterana are teuana, ao nimaai kaintei i bukin te itera are mai maeao, are mai buki 28ma te kai ni kamatoa n nuuka ae e bangaki n ira anaun kain te oo ni kabane e na kananauaki man iteran te um'anrianna nakon iterana are teuana. 29Kabiri kain te oo ma taiani kai ni kamatoa n te koora ao kanim taian m'am'a koora ma kain te oo i bukin karinakin te kai ni kamatoa b'a e na rin i nanoia. 30Ao i mwiina, katea te auti n rianna n aron are I a tia ni kaotia nako im i aon te maunga.
Te Roki i nanon Te Um'antabunrianna
(Te Oti 36.35-38)
E taku te UEA:
31Karaoa te keeten man te kunnikai ae te rinen ae rarangaaki man buraen te tiibu ae mawaawa, e uraroo ao ae uraura. Korotinna n tamnein baike a maiu ake iai baiia ni kiba. 32Ao katinetinei i aon boua ake aai aika taian aketia ae rabunaki n taian koora, ao ni kanim'aki raoi ma taian matau, ake a baarongaaki n taian beke aika aua aika tirewa. 33Kanim'a te keeten i aan taian karinan ni matau ake a barongaaki i taubukin te um'anrianna, ao i akuun te keeten ao ko na katuka iai te Atiniberita are kakanoa n taian atibu ake uoua. Te keeten anne e na kaokoroa te Tabo are e Tabu ma te Tabo are Moan te Tabu.
34Katuka te Atiniberita are iai te tabo n akoi i aon matana i nanon te tabo are moan te tabu.#26.34 te tabo n nanoanga i aon matana: E kakoauaaki b'a e mena ana kaintokanuea te Atua i aon te aonnaba i aon matan te Atiniberita, ao anne te tabo are e kaota iai ana akoi nako ia ana aomata. 35I tinanikun te Tabo are Moan te Tabu, ao katuka te taibora i bukin te kariki are e tabu n te atai ao kaintein te taura are te koora n te maing.
36Kamanenaa te m'akoro ni kunnikai are te riinen ae e rarangaaki man buraen te tiibu ae buru, e uraura ao ni korotinaki n ae tamaroa i bukin te mataroa n rin nakon te auti n rianna. 37Kabiri n te koora taiani boua ake nimaai ake a karaoaki man te kai te aketia ao katei n tatabeua nako i aon te kaintei ae te buraonti. Ao i mwiina, kanim taian uki i aon taiani boua ao katinei ikanne.
Currently Selected:
Te Otinako 26: KNVB
Highlight
Share
Copy
Want to have your highlights saved across all your devices? Sign up or sign in
