Karikani B'aai 24
24
Karekean buun Itaaka
1Ao e a rangi ni kara ngkai Aberaam, ao E a tia te Atua ni kakab'aiaa ni b'aai ni kabane ake e a tia ni karaoi. 2Ao e taku nakon ana toro are te kabanea n ikawai are Erietera, are boni ngaia are e tararuai ana b'ai Aberaam ni kabane, “Ko na anganai baim 3b'a I tangiria ni berita ma ngkoe n aran te UEA, ae Atuan karawa ma aonnaba, b'a ko na aki karekea buun natiu te mm'aane mai buakoia kaain Kanaan. 4Ma ko na okirikaaki nakon te aba are I bungiaki iai, ao ko na karekea iai buun natiu te mm'aane are Itaaka mai buakoia au utu.”
5Ma e manga taku te toro arei, “Ao tera ae N na karaoia ngkana e rawa n irai n nakomai te aine are I rineia b'a buun natim? Tao N na kaoka natim te mm'aane b'a e na okira te tabo are ko nako mai iai?”
6Ao e taku Aberaam, “Ko na bon aki kaoka natiu te mm'aane nako ikekei.” 7E anaai te UEA ae Atuan karawa mai abaia tamau ma au koraki, ao E berita nako iu b'a E na anga te aba aei nakoia kanoau. Ane E na bon kanakoa te anera i m'aaim b'a ko aonga ni kona ni karekea buun natiu te mm'aane. 8Ngkana tao arona b'a e aki kan iriko te ataeinaine, ao ko a b'ara man te berita aei. Ma ko na bon aki kaira natiu te mm'aane n okira ikekei.” 9Ao e anga baina te toro arei nakon ana toka are Aberaam, ao e berita b'a e na karaoi baike e tuangnga Aberaam ni kabane.
10Ao e anaa tengaun ana kamero Aberaam te toro are e tararuai ana b'ai Aberaam, ao e nakon te kaawa ae buubura are maeka iai ngkoa Naora are i Metobotamia meang. 11Ao ngke e a roko, ao e kamotirawaia ana kamero i rarikin te m'anib'a are i tinanikun te kaawa are buubura arei. E a bon b'aka taai n te tai arei, ao bon te tai are a itiiti ran iai aine. 12Ao e tataro nakon te Atua ao e taku, “Te UEA, ae Atuan au toka are Aberaam, Ko na kakoroa bukin au waaki n te bong aei, ao kawakina am Berita nakon au toka. 13I a mena ngkai i rarikin te m'anib'a are a na roko iai aine n itiran. 14N na taetae nakon temanna mai buakoia ni kaangai, ‘Taiaoka, anganai am tiaeki n ran b'a N na mooi iai teutana.’ Ao ngkana e kaangai, ‘Moi, ao N na kamooia naba am kamero,’ ao tera ngke ngaia anne te aine ae Ko a tia n rineia i bukin am toro are Itaaka. Ngkana e riki aio, ao I ataia ngkanne b'a Ko bon kakoroa bukin am Berita ma au toka.”
15Ao i m'aain banen ana tataro, ao e roko Nei Rebeka ma ana konteina n ran i aon angana. Bon natin Betuera te aine ngaia, ao Betuera bon natin tarin Aberaam are Naora ma Nei Mireka. 16Bon te aine ngaia ae rangi n tamaroa, ao bon te ataeinaine naba ngaia. E nakon te m'anib'a ni kanoaa ana konteina n ran, ao e a manga oki. 17Ao e biri te toro arei nako ina ao e taku, “Taiaoka ma anganai te ran man am konteina b'a N na mooi iai teutana.”
18Ao e taku neierei, “Aei te ran, moi,” Ao e karuoa te konteina mai aon angana, ao e taua te konteina n ran ni kamooa iai Erietera. 19Ao ngke e a ngae teuarei, ao e taku neierei nakoina, “N na itiia naba nimaia am kamero ma ni kangaaeia raoi.” 20Ao e kabaikoa ni kab'aroa nikiran kanoan ana kaonteina nakon nnen nimaia maan ni kamooia maan akekei, ao e a manga biri nakon te m'anib'a n itiia riki te ran, ni karokoa a bane ni ngae raoi taiani kamero akekei. 21Ao e taratara neirei Erietera ma te aki kakarongoa, b'a e karaua ni kakoaua raoi b'a bon ngaia arei te aine ae rineia te UEA ke tiaki.
22Ao ngke a bane raoi ana m'akuri neierei, ao e anaa te m'am'a te koora ae bobuaka Erietera, ao e katinea i b'airina, #24.22 m'am'a... b'airina: Te m'am'a ni b'airi te bae e raneanea, ao ti te bo ma te taabia.ao taian burenibai aika koora aika buubura i aon anganibaina. 23Ao e taku, “Taiaoka, antai ngkoa aran tamam? E m'aawa ana auti ngkana I matu iai ma raou aikai nakon te tairiki?”
24Ao e kaeka neierei, “Bon Betuera tamau are natin Naora ma Nei Mireka. 25E m'aawa ara auti, ao a m'aiti naba kanaia maan i bukiia am man.”
26Ao e katorobubua te mm'aane arei n taromauria te UEA. 27Ao e taku, “E na neboaki te UEA, ae Atuan au toka are Aberaam, ae bon kakaonimaki ni kakoroa bukin ana Berita ma au toka. E a tia ni kairai raoi te UEA nakoia ana koraki au toka.”
28Ao e birinako neierei nakon ana auti tinana, ao e karakin b'ai ni kabane. 29Ao iai m'anen Nei Rebeka ae arana Raab'an, ao e biri n otinako nakon te m'anib'a, nakon te tabo are e mena iai ana toro Aberaam. 30E noora te taabia ni b'airi i b'airin m'anena, ao te burenibai i aon anganibaina, ao e ongo naba ana taeka teuarei nakon m'anena. Ao e nakon ana toro Aberaam are e teitei i rarikiia ana kamero i rarikin te m'anib'a, 31ao e taku, “Nako mai, irai nakon te auti. Bon ngkoe te aomata ae kakab'aiaki iroun te UEA. E aera ngkai ko a teitei i tinaniku ikai? E rangi m'aawa au auti, ao iai naba nneia am kamero.”
32Ma ngaia are, e a nako Erietera nakon te auti, ao e karuoi b'aai Raab'an mai aon taiani kamero, ao e kam'arakeia n taian uteute. Ao i mwiina, e a uota te ran nakon ana toro Aberaam ma raona b'a tebokan waeia. 33Ao ngke a roko taian am'arake, ao e taku Erietera, “Bon iai moa te b'ai ae I kan taekinna i m'aain am'arakera.”
Ao e taku Raab'an, “Ao waakina am rongorongo mai ikanne.”
34Ao e taku, “Bon ana toro Aberaam ngai. 35E a tia ni kakab'aiaa au toka are te UEA, ao E karikia b'a te aomata ae kaub'ai. E anganna ana nanai n tiibu, ana nanai ni kao, ana tirewa, ana koora, ana toro aika aine ma mm'aane, ana kamero, ao ana aati. 36Ao e riki natin au toka te mm'aane iroun Nei Taara ngke e a bon kara Nei Taara are buuna, ao e a tia n anga ana b'ai ni kabane au toka nakon natina te mm'aane. 37Ao e tuangai au toka b'a N na berita b'a N na bon ongotaeka nakon ana kaetieti. Ao e taku, ‘Ko na aki rinea buun natiu te mm'aane mai buakoia ataeinainen te aba ae Kanaan. 38Ma ko na nako nakoia ana utu tamau, nakoia au koraki, ao kakaea buuna i buakoia.’ 39Ao I titirakina au toka ni kaangai, ‘Ao ngkana tao arona b'a e aki kan irai te aine are N na rineia?’ 40Ao ngaia e taku, ‘E na kanakoa Ana anera te Atua ae I ongotaeka i rouna b'a E na raoniko, ao e na kororaoi bukin ane ko m'ananga iai. Ko na karekea buun natiu te mm'aane mai buakoia au koraki, ao ana utu tamau.
41Bon ti teuana te kawai are ko na kona n inaomata iai mai aan te taeka ni berita aei, b'a ti ngkana ko kawariia au koraki ma a bon rawa iai, ao ngkanne ko a inaomata.’
42“Ao ngke I a roko n te m'anib'a n te bong aei, ao I tataro ni kaangai, ‘Te UEA ae Atuan au toka are Aberaam, I butiko b'a Ko na kakoroa bukin te b'ai ae I waakinna. 43Aio ngai ae I mena i rarikin te m'anib'a aei. Ngkana e roko te ataeinaine n itiran, ao N na bubutiia b'a e na anganai ana ran teutana man ana konteina n ran. 44Ngkana arona b'a e kariaia, ao e anganiia naba au kamero te ran, ao boni ngaia anne te ataeinaine ae Ko rineia b'a buun natin au toka.’ 45Ao i m'aain banen au tataro, ao e roko Nei Rebeka ma ana konteina n ran i aon angana, ao e nakon te m'anib'a n itiia te ran. Ao I taku nako ina, ‘Taiaoka ma ko na anganai te mooi teutana.’ 46Ao e kawaekoa ni karuoa ana tiaeki n ran mai aon angana, ao e taku, ‘Mooi, ao N na anganiia naba am man te ran.’ Ma ngaia are, ‘I a mooi, ao e kamooia naba taian kamero n te ran.’ 47Ao I titirakinna ni kaangai, ‘Antai tamam?’ Ao ngaia e taku, ‘Boni Betuera tamau are natin Naora ma Nei Mireka.’ Ma ngaia are, ‘I a katinea te taabia ni b'airi i b'airina, ao taian burenibai i aoni baina. 48Ao I katorobubua n taromauria te UEA, are Atuan au toka are Aberaam, are E a tia ni kairai raoi nakon ana koraki au toka, are I a kunea iai te nati te aine i bukin natina.
49Ao ai anne ngkanne au rongorongo, ma e a nako imi b'a kam butim'aea nanon au toka ke kam aki. Taiaoka ma tuangai b'a I aonga n ataa ae N na karaoia i mwiina.’ ”
50Ao a kaeka Raab'an ma Betuera ao a taku, “Ngkai e bon roko te baei mairoun te UEA, ao bon akea ara b'ai ni baireia. 51Bon aei Nei Rebeka, kam na airi ma ngaia. Kam na airi nako ma ngaia b'a buun natin ami toka, n aron are E a tia n taekinna te UEA.” 52Ao ngke e ongo aei ana toro Aberaam, ao e bobaraaki n tataro nakon te UEA. 53Ao e kaotinakoi ma n anga taian kunnikai ma tirewa, ao taiani koora aika tamaroa nakon Nei Rebeka. Ao e anga naba taiani b'aintangira aika bobuaka nakon m'anen Nei Rebeka ma tinana.
54Ao i mwiin aei, ao a tib'a am'arake ma ni mooi ana toro Aberaam akekei, ao e tiku ikekei ni kangainaa. Ao ngke a uti ngke e a ingabong, ao e taku Erietera, “N nang nako n okira au toka.”
55Ma a taku m'anen Nei Rebeka ma tinana, “Taiaoka ma e na tiku riki teutana neiei i rarikira i nanon teuana te wiiki, ke tebwina te bong, ao i mwiina, kam a airi nako naba ma ngaia.”
56Ma e taku Erietera, “Kam na aki tauai. E a tia ni kakoroa bukin m'anangau te UEA; kam na kaokai nakon au toka.”
57Ao a taku, “Ti na bon weteia n ongora i rouna b'a tera ana iango.” 58Ao a wetea Nei Rebeka, ao a titirakinna ni kaangai, “Ko kan ira te mm'aane aei?”
Ao e taku Nei Rebeka, “Eng.”
59Ma ngaia are, a kanakoa Nei Rebeka ma aia toro are e a kara #24.59 toro are e a kara: Bon Tebora, are e kaikawaa Rebeka mangke e moan bungiaki (noora 35.8). b'a raona n iriia nako ana toro Aberaam ma mm'aane ake raona. 60Ao a angan Nei Rebeka taeka ni kakab'aia aikai:
“Ke ko riki ngkoe ae m'anera b'a tinaia mirion.
Ke a taui aia kaawa aia kairiribai kanoam.”
61Ao i mwiin arei, ao a katauraoia Nei Rebeka ma ana ataeinaine, ao a toka i aon taian kamero b'a a nang nako ma ana toro Aberaam, ao a m'ananga nako.
62E a tia n roko Itaaka n te rereua are #24.62 Rairai ni kawai tabeua i nanon te rereua; N Ebera man rokoia.“Ana m'anib'a Temanna ae Maiu ae noorai,” ao e tiku ni maeka ni m'akoron Kanaan maiaki. 63Ao e otinako n te b'akantaai teuana n nakonako i tinanikun te kaawa, ao e noori taiani kamero aika tabe n roko. 64Ao Nei Rebeka, ngke e noora Itaaka, ao e ruorikaaki man ana kamero, 65ao e titirakina ana toro Aberaam ni kaangai, “Antai teuare e tabe n nakomai arei?”
Ao e kaeka te toro ni kaangai, “Bon au toka.” Ma ngaia are, e anaa te rabunanimata, #24.65 te rabunanimata: B'ain naba te mare, ao nanona ngkai b'a e a kukurei Rebeka n riki b'a buun Itaaka.ao e rabuna matana iai.
66Ao te toro arei, e tuanga Itaaka b'aai ni kabane ake a tia ni karaoi. 67Ao e a kaira Nei Rebeka nakon te auti n rianna are e maeka iai ngkoa tinana are Nei Taara, ao e a riki b'a buuna. E rangi n tangira Nei Rebeka Itaaka, ao e a riki ni m'aninga iai nanokaawakina ni buan tinana.
Currently Selected:
Karikani B'aai 24: KNVB
Highlight
Share
Copy
Want to have your highlights saved across all your devices? Sign up or sign in
