Karikani B'aai 26
26
Maekan Itaaka i Kera
1Ao manga iai riki te rongo teuana n te aba naba arei i mwiin are riki n ana tai Aberaam. Ao e nako Itaaka ni kawara Abimereka are uean Biritia, are i Kera. 2Ao E a tia ni kaoti te UEA nakon Itaaka ma n taku, “Ko na aki nako Aikubita; tiiku n te aba aei n aron are I tuangko b'a ko na tiku iai. 3Maeka ikai, ao N na memena iroum ma ni kakab'aiako. N na anganiko te aba aei ni kabutaa, ao nakoia naba am kariki. N na bon kakoroa bukin te berita are I karaoia ngkoa ma tamam are Aberaam. 4N na anganiko am kariki aika ai aron m'aitin taian itoi i karawa, ao N na anganiia te aba aei ni kabane. Ane a na bubutiai botannaomata b'a N na kakab'aiaia naba n aron kakab'aiakiia am kariki. 5N na bon kakab'aiako i bukina ngke e a tia n ongotaeka tamam are Aberaam i Rou, e kaawakin Au tua ma Au kaetieti ni kabane.”
6Ma ngaia are, e a maeka Itaaka i Kera 7Ao ngkana a titirakinna aomata i bukin buuna, ao ngaia e taku b'a m'anena. E rawa ni kaotia ae buuna, b'a e maakuia aomata akekei b'a a kaawa n tiringnga i bukin anaakin Nei Rebeka mai rouna, b'a e bon rangi n tikiraoi. 8Ao ngke e tuai rangi ni maan Itaaka ni mena ikekei, ao e taratara rikaaki te uea are Abimereka man ana winto, ao e noora Itaaka ma Nei Rebeka ngke a kirei. 9Ao e kananako wetean Itaaka Abimereka, ao e taku, “Ngaia bon buum, ao e aera ngke ko taku b'a m'anem?”
Ao e taku, “I taku ngai b'a N na tiringaki ngkana I kaotia ae buu.”
10Ao e taku Abimereka, “Tera ngkai ae ko a tia ni karaoia nako ira? Ngke tao arona b'a e matu te aomata temanna ma buum, ao bon am bure anne.” 11Ao e kauringiia ana aomata Abimereka ni kaangai, “E na tiringaki te aomata ane karaoa ae buakaka nakon te aomata aei ma buuna.”
12Ao e ununiki Itaaka n te aba arei, ao n te ririki are e taia tebubua okiokin te m'aiti are e a tia n unikia, i bukina ngke E kakab'aiaki iroun te UEA. 13Ao e reitinako arona arei ni karokoa e a riki b'a te aomata ae rangi ni kaub'ai. 14Ao a rangi ni bakantang i rouna kaain Biritia i bukina ngke a rangi ni m'aiti ana tiibu, ana kao, ao ana toro. 15Ma ngaia are, a kanoai taian m'anib'a n te tano, ake a kenaki ngkoa irouia ana toro tamana are Aberaam ngke e maiu.
16Ao e a taku Abimereka nakon Itaaka, “Ko na kitana abara, b'a ko a rangi ni korakora riki nakoira.” 17Ma ngaia are, e a nako Itaaka, ao e a katea ana maeka ni M'aruan Kera, are e a manga tiku iai tabeua te tai. 18E a manga keken riki taiani m'anib'a ake a bon tia ni kenaki naba n ana tai Aberaam, ake a taunaki irouia kaain Biritia i mwiin maten Aberaam. Ao e a manga arani taian m'anib'a akekei Itaaka ni bon araia naba iroun tamana are Aberaam. #26.18 manga arani... bon araia naba: Karaoan aei iroun Itaaka boni kaotan ae ana b'ai m'anib'a aikai. 19Ao a kena te m'anib'a ana toro Itaaka n te m'arua arei, ao e reke te ran. 20Ao a ngurengure kaain Kera, ao a taku, “Bon ara ran te ran aei.” Ma ngaia are, e arana te m'anib'a arei Itaaka b'a “Ngurengure.” 21Ao e a manga kena riki te m'anib'a teuana ana toro Itaaka, ao e a manga reke naba iai te ngurengure, ma ngaia are, e arana te m'anib'a anne b'a “Kairiribai.” 22Ao e a manga kitana ikekei, ao e a manga kena te m'anib'a riki teuana, ao ai bon akea te kamangaongao n aei, ma ngaia are, e a aranna b'a “Inaomata.” Ao e taku, E a anganiira ngkai te inaomata te Atua ni maeka n te aba aei, ao ti nang bon taia arora ikai.
23Ao e nako Itaaka nako Beerateb'a. 24Ao E kaoti te Atua nako ina n te tairiki anne, ao E taku, “Boni Ngai Atuan tamam are Aberaam. Ko na aki maaku; I mena iroum. N na bon kakab'aiako ma n anganiko am kariki aika m'aiti i bukin au berita ma Aberaam are Au toro.” 25Ao e karaoa te baonikarea Itaaka ikekei, ao e taromauria te UEA. Ao i mwiina, e katea ana auti n rianna ikekei, ao a manga kena riki te m'anib'a teuana ana toro.
Te Boraraoi i Marenan Itaaka ma Abimereka
26Ao a roko mai Kera Abimereka ma Autitata ma ana tia iango, ao Bikora are mataniwiin ana taanga ni buaka, b'a a na kawara Itaaka. 27Ma ngaia are, e taku Itaaka nakoia, “E aera ngkai kam a manga roko ni kawarai, ao are kam a tia n riribai, ma ni kanakoai mai abami?”
28Ao a taku, “Ti a ataia ngkai b'a E bon memena te UEA iroum, ao e riai b'a ti na karaoa te boraraoi i marenara ma ngkoe, ao ti butiiko b'a ko na berita iai 29b'a ko na aki karaoa ae buakaka nakoira, n ai arora naba ngke ti aki karaoa ae buakaka nakoim, b'a ti kanakoko ma te rau. Ti a bon kakoaua raoi ngkai b'a E a bon tia ni kakab'aiako te UEA.” 30Ao e a karaoa ana baka n am'arake Itaaka ma ngaiia, ao a am'arake ma ni mooi. 31Ao n te ingabong are i mwiina, ao a karaoa aia boraraoi ma ni kamatoa n te berita, ao i mwiina e a karaure Itaaka ma ngaiia, ao a raure nako ma te rau.
32Ao ni bon te bong naba anne, ao a roko ana toro Itaaka, ao a tuangnga i bukin te m'anib'a b'a e a reke te ran. 33Ma ngaia are, e a arana te m'anib'a arei Itaaka b'a “Berita.” Ao bon anne moan reken te kaawa ae buubura are Beerateb'a. #26.33 Beerateb'a: Nanona m'anib'an te tekeraoi. Ke m'anib'an te boraraoi ae e rau.
Buun Etau aika Ianena
34Ao ngke ai abwi ana ririki ni maiu Etau, ao e karekeia buuna uoman ainen Eta aika; Nei Iurita are natin Beeri te aine, ao Nei Batemata, are natin Eron. 35A bon riki ngaiia b'a taan kamaraka nanoia Itaaka ma Nei Rebeka.
Currently Selected:
Karikani B'aai 26: KNVB
Highlight
Share
Copy
Want to have your highlights saved across all your devices? Sign up or sign in
