Karikani B'aai 38
38
Iuta ma Nei Tam'aa
1Bon i nanon naba te tai anne, ao e teirake Iuta ni kiitaniia tarina, ao e nako n tiku i roun te mm'aane ae arana Ira, are kaain te kaawa are Aruram. 2Ao e kaaitibo Iuta ma ainen Kanaan temanna are natin Tua. Ao e iein ma ngaia, 3ao e bungiia te nati te mm'aane, ao e aranna b'a Era. 4Ao e a manga bikoukou riki neierei, ao e bungiia natina te mm'aane riki temanna, ao e aranna b'a Onan. 5E manga riki naba natina temanna te mm'aane, ao e aranna b'a Teera. Ao e mena Iuta i Ketiba ngke e bungiaki Teera.
6Ao e anaa te aine temanna Iuta ae arana Nei Tam'aa b'a buun natina are ana karimoa te mm'aane are Era. 7Ao e buakaka aron maiun Era, E aki kukurei te UEA i rouna, ma ngaia are e a tiringaki iroun te UEA. 8Ao e manga taku Iuta nakon tarin Era are Onan, “Naako matu ma buun tarim are mate. Onea mwiin tarim n riki b'a buuna, b'a a aonga n riki natin tarim.” #38.8 Onea mwiin... b'a buuna... natin tarim: Ngkana e mate te mm'aane n aki reke natina iroun neiere buuna, ao n te katei e na karekea natin tarina are e mate iroun neiere te bu. (Noora Te Tua 25.5-6). 9Ma e ataia Onan b'a e na aki atongaki b'a natina, ma ngaia are, ngke e wene ma buun tarina, ao e katinakoa ana tari nako aontano, b'a e aonga n aki reke natin tarina. #38.9 Ma e ataia... natina: Ngkae e mate Iuta, ao ana b'ai a na b'ainaki iroun Onan. Ma ngkana iai natin Iuta ao e na b'ainaki ana b'ai iroun natina, ma tiaki iroun Onan. 10Ao E aki kukurei te UEA n ana m'akuri are karaoia, ma ngaia are e a manga tiringaki naba iroun te UEA. 11Ao e taku Iuta nakon natina are Nei Tam'aa, “Naako okira tamam ao tiiku ikanne ni karokoa e ikawai raoi Teera.” E atonga aei b'a e maaku b'a mwiina e manga mate Teera n aroia tarina. Ma ngaia are, e a okira ana auti Nei Tam'aa. 12I mwiin tabeua te tai, ao e a mate buun Iuta. Ao ngke a bane ana bong n tanginiwenei, ao e a nako ma raoraona are Ira are kaain Aruram nako Timna, ike a koroburaeaki iai ana tiibu. 13Ao iai ae kaongoa Nei Tam'aa ae e nako tamana nako Timna ni koroburaei ana tiibu. 14Ma ngaia are, e buuta kunnikaina are kunnikaia aine aika mate buuia, ao e rabuna matana n te rabuna ni mata, ao e nako n tekateka i matan mataroan te kawai nako Enaim, te kaawa are e mena n te kawai nako Timna. E a tia n ataia neiei b'a e a bon ikawai Teera are natin Iuta te mm'aane are te bina, ao e tuai mani kaieinaki ma ngaia.
15Ao ngke e nooria Iuta, ao e taku b'a ainen mataawa temanna i bukina ngke e rabuna matana. 16Ao e nako ina i rarikin te kawai, ao e taku, “Neiko iraua boom?” (E aki ataia b'a ngaia bon neiere buun natina.)
Ao e taku neierei, “Tera ae ko na anganai?”
17Ao e taku Iuta, “N na anganiko te kooti te teei man au nanai.” 18Ao e titirakina neierei, “Ao tera te b'ai ae N na anganiko b'a te b'ai ni kakoaua?”
Ao e taku neierei, “M'aem ane mena i aona am kanikina ma kaona, ao te kai ane ko uouotia. Ao e anai n angan neierei.” Ao i mwiina, e a wene ni bure ma neierei, ao e a bikoukou neierei. #38.18 M'aem... ane ko uouotia: E mronron te m'ae ao iai i aona te kanikina i bukin te ara. E kona n taonaki i aon te bae e maraurau ao n turu te kanikina are iai. Ao te kai bon ana kai te tia kawakini man ke tiibu, ao boni kanikinaean te m'aaka ma te nakoa ni kairiiri n te baronga. 19Ao e nako n okira ana auti neierei, e kanakoa rabunan matana, ao e a manga karina kunnikaina n aine, are kunnikaia aine aika mate buuia.
20Ao e kanakoa Ira Iuta b'a e na uota te kooti nakon neierei mani kaoki b'aai ake b'aai ni kakoaua, ma e aki roko n te reke iroun Ira. 21Ao e titirakiniia mm'aane tabeman ake i Enaim, “E nga ainen mataawa are e mena i rarikin te kawai?”
Ao a taku nakekei, “Kai bon akea ainen mataawa ikai.”
22Ao e oki nako Iuta ao e taku, “E aki reke irou neierei.” Ao a taku mm'aane tabeman b'a bon akea ainen mataawa ikekei.”
23Ao e taku Iuta, “E aoria b'a e a kaawakin, b'a ti a kaawa ni ngareakinaki irouia aomata. I iangoia b'a aongkoa N na kabooa, ma ngaia e aki reke iroum.”
24Ao i mwiin tabeua te nam'akaina, ao iai ae roko n tuanga Iuta ni kaangai, “E a tia ni karaoa te m'akuri n aine ni mataawa buun natim are Nei Tam'aa, ao e a bikoukou ngkai.”
Ao e taku Iuta, “Kaotinakoa, ao kabuokia ni karokoa matena.”
25Ao ngke e a uotaki ni kaotinakoaki, ao e kanakoa ana taeka nakon taman buuna are mate, ao e taku, “I bikoukou iroun te mm'aane ae ana b'ai baikai. Noori baikai, ao kinai b'a antai ana b'ai-te m'ae ae iai te kanikina i aona, ao te oko aei.”
26Ao e kinai Iuta, ao e taku, “E bon eti neienne, ao I a tia ni bure n aki kakoroa bukin au taeka nakoina-N na riai ni kaman anaia b'a buun natiu te mm'aane are Teera.” Ao e aki manga oki Iuta ni kawara neierei.
27Ao ngke e a roko ana tai ni bung, ao e a kunea b'a ngaia a bwebwee natina. 28Ao ngke e a bung, ao e kaotinakoa moa baina are temanna, ao e rawea baina te tia tobi, ao e kabaea baina n te karai ae uraura, ao e taku, “E bungiaki moa aei.” 29Ma e a manga katika baina ni kaokia, ao e a manga bungiaki rimoa are tarina. Ao e a manga taku te tia tobi, “Ai toara ngkoe ni katabwena kawaim n otinako.” Ma ngaia are, e aranaki b'a Bereti. #38.29 Bereti: N Ebera nanona kaukia ke katabwena. 30Ao i mwiina, e a manga bungiaki tarina ma te karai ae uraura i aon baina, ao e aranaki b'a Teera. #38.30 Teera: N Ebera nanona “wanawana,” are e bon reitaki ma te karai ae e uraura.
Currently Selected:
Karikani B'aai 38: KNVB
Highlight
Share
Copy
Want to have your highlights saved across all your devices? Sign up or sign in
