Karikani B'aai 46
46
M'anangan Iakob'a ma Ana Utu nako Aikubita
1Ao e katauraoi b'aai ni kabane Iakob'a, ao e nako Beerateb'a, ao e anga taiani karea nakon Atuan Itaaka, are tamana. 2Ao E taetae te Atua nakoina n te mii ngke e a bong, ao e weteia, “Iakob'a! Iakob'a!”
Ao e taku Iakob'a, “Oo! aio ngai.”
3Ao e taku te Atua, “Bon Atuan tamam Ngai. Ko na tai maaku ni m'ananga nako Aikubita; N na karikiia ami botannaomata b'a te botannaomata ae korakora ikekei. 4N na iriingkami nako Aikubita, ao N na manga kaokiia ami kariki nakon te aba aei. E na mena i rarikim Ioteb'a ngkana ko mate.” 5Ao e a m'ananga nako Iakob'a mai Beerateb'a. Ao e a katokaaki irouia natina mm'aane i aon ana ka te uea are e kanakoa mai Aikubita, are e katikitikaki irouia maan, n ikotaki naba ma ataei, ao buuia. 6Ao a uoti aia nanai ni man ma aia b'ai nako ake a reke ni boni korakoraia i aoni Kanaan, ao a nako Aikubita. Ao e kairiia kanoana ni kabane Iakob'a: 7natina mm'aane, tibuna mm'aane, natina aine, ao tibuna aine.
8Ao ana utu Iakob'a ake a iria nako Aikubita bon: te karimoa are Reuben, 9ao natin Reuben mm'aane ake Anoka, Baru, Etiron, ao Karemi; 10Timeon ma natina mm'aane: Iemuera, Iamin, Oata, Iakin, Toara, ao Tiaura are natina ma ainen Kanaan; 11Rewi ma natina mm'aane: Kerition, Koata, ao Merari. 12Iuta ma natina mm'aane ake: Tiera, Bereti, ao Teera, (Natin Iuta riki mm'aane ake tabeman, Era ao Onan, ake a mate i Kanaan.) Natin Bereti mm'aane ake Etiron, ao Amura, 13Itaakara ma natina mm'aane ake: Tora, Buwa, Iatiuta, Iobe ao Timron; 14Teburun ma natina mm'aane ake: Tereta, Eron, ao Iareera. 15Ao aikai natin Rea mm'aane ake natina ma Iakob'a i Metobotamia, i rarikin natina te aine are Nei Rina. Bootani kanoana ma Nei Reea bon teningaun ma teniman.
16Kaata ma natina mm'aane ake: Tibion, Aki, Tuni, Etibon, Eri, Arota, ao Areri; 17Atera ma natina mm'aane ake: Imna, Itiwa, Itiwi, Beria, ao m'aneia are Nei Tera. Natin Beria mm'aane bon Ebera ao Marekiera. 18Koraki aika tengaun ma onoman aikai, boni kanoan Iakob'a ma Nei Tireba, are te toro te aine are e anga Raab'an nakon natina te aine ae Nei Reea.
19Ao e karikiia uoman naati mm'aane Nei Rakera are buun Iakob'a, aika Ioteb'a ao Beniamin. 20A riki natin Ioteb'a uoman mm'aane i Aikubita, aika Manate, ao Eberaim irouni buuna are Nei Atenata, are natin Botibera te aine, are te ibonga ae rietaata i Erioboriti. 21Natin Beniamin mm'aane bon Bera, Bekera, Atibera, Kera, Naaman, Ei, Roti, Mubim, Ubim, ao Areta. 22Boni kanoan Iakob'a ma Nei Rakera koraki aika tengaun ma aman aikai.
23Taan ma natina te mm'aane are Utim. 24Nabetari ma natina mm'aane ake: Iatiera, Kuni, Ietera, ao Tirem. 25Boni kanoan Iakob'a ma Nei Birea are te toro te aine, are e anga ngkoa Raab'an nakon natina te aine are Nei Rakera, koraki aika itiman aikai. 26Bootan raoi kanoan Iakob'a ake a m'ananga nako Aikubita bon onongaun ma onoman, ngkana a aki warekaki buuia natina mm'aane. 27A riki natin Ioteb'a uoman mm'aane i Aikubita, are e karokoa ana utu Iakob'a n te m'aiti ae itingaun ake a mena ikekei.
Iakob'a ma ana utu i Aikubita
28Ao e kanakoa Iuta Iakob'a n rimoa n tuanga Ioteb'a b'a e na butim'aia i Koten. Ao ngke a roko 29ao e a tokara ana ka ni buaka Ioteb'a, ao e a nako ni kaitibo ma tamana i Koten. Ao ngke a kaitibo, ao e a rab'ata roroan tamana Ioteb'a, ao e tang n te tai ae maan. 30Ao e taku Iakob'a nakon Ioteb'a, “I a tauraoi nakon te mate b'a I a tia n nooriko, ao I a ataia b'a ngaia ko boni maiu.”
31Ao e taku Ioteb'a nako ia tarina ma ana utu ni kabane, “N nangi nako n tuanga te uea b'a a roko tariu ma au utu ni kabane ake a maeka ngkoa i Kanaan ni kawarai. 32N na tuangnga b'a bon taani kaawakin tiibu ngkami, ao kam na tararuaia ami nanai ni man ake kam kairiia ma ami nanai n tiibu, ma ami b'ai ni kabane. 33Ngkana e weteingkami te uea n titirakiningkami b'a tera ami m'akuri, 34ao kam na ururingnga n tuangnga b'a bon taan tararuaia maan ngkami mairouia ami bakatibu. B'a ngkana kam karaoa anne, ao ane e na kamaekaingkami n te aba are Koten.” E taekina aei Ioteb'a b'a a aonga n aki manga kaawakiniia maan kaain Aikubita.
Currently Selected:
Karikani B'aai 46: KNVB
Highlight
Share
Copy
Want to have your highlights saved across all your devices? Sign up or sign in
