Mak 8

Jiszs Apuleng Ncblo Siu-pwx (4,000)

Matiu 15:32-39

1Mzli trboiu mz nibr nzyzlu-krmlr Dxbu Gzlili, kzdq zbo ngr leplz kxetu nzvz-mopqng mrkc tqmncngr Jiszs. X mz nibr kzdung zbq dakxnzng nadr kc tqyrkrpe. Jiszs kc tqkqlepele ncblo nedeng x tqrpipebzle badr kx, 2“Yctxpe mz drtwrnge leplz lcng. Murde nzmnctipemlr bagu mrka zbq tqpe x dakxnzng nadr yrkrtxpe. 3Trmrlzu nzatwzlrtxngr nidr mz nelzdr kxbrtale, ma mztr tqtclvrne mz lrpzki, murde kzdung nidr nzvzkimlr rlru.” 4Ncblo nedeng nzrpibzlr bade kx, “Trpnzngr me nzxpe-ngrgr dakxnzng kx natakitrde leplz lcng mrka.” 5A' Jiszs veabz badr kx, “?Bret tqlvr kx ycbz bamu?” Nzrpibzlr kx, “Rlimz.” 6Zbz Jiszs rpibzle mz leplz kcng amrlx nawxbuong. Zbz otitxde dapu bret kcng rlimz, awitx-ngrbzle mz Gct, lopxititxdeng, x sc tqkatipebzle mz ncblo nedeng tzakipebzlr mz leplz kcng amrlx. 7X yc-kzpz badr kcng nc kxtopwzting. Zbz awi-kz-ngrbzle nc kcng x rpibzle badr kx na-aki-kzpzlr mz zbo ngr leplz kcng. 8Leplz kcng amrlx nzmung x nelzdr krlc. X nzatakqtilr mulide kcng tqyctxo x nznulvzo-ngrdrle topla kxetu rlimz. 9Zbz sc tqatwzlrpengr Jiszs leplz kcng mz mztea nyzdrng mz nibr nzmupe-krdr amrlx ngrdr. Ycpwz pipz nzkrlz-krbzle siu-pwx (4,000) mz ncblo txpwz kcng tzmung mz zbq lcma. 10Mzli lcde, sc tzprtzpeng mz bot badr ncblo nedeng x sc tzalilvckiopelr mz nrlarde kc Dalmanuta. #8:10 Trpnzngr kx rkrlz me ycngr mrkc tzrpibz Dalmanuta, murde Mak esz'-krde kx yrle drtq mrlc. A' mc kz Matiu 15:39.

Nzrkrlzngr Rkx Ngr Nzwzkr Gct

Matiu 16:1-12; Luk 12:54-56

11Zbz kzdung Farzsi nzvzmqng x sc tztalwzpeng badr Jiszs. Nzrlxtibzlr bade nzale-krde kzdq da kxmatq mz nzaelwapx-krde kx vzpx-angidrm mz Gct. 12A' Jiszs nabzde talvzotx murde nzpxtxpx-ngrdr nike aelwapxpe-ngrbz Gct badr. X rpibzle badr kx, “Trpengr nzaelwapx-krbo rkx kc tqrlxtiamu.”

13Zbz Jiszs badr ncblo nedeng sc tzalilvckiopelr mztea Betsaeda. 14-16Mz nzalilvcobe-krdr dxbu, Jiszs rpibzle badr kx, “Rngidrtioamu yisti sc Farzsi x King Herot.” Zbz sc tzycmnetrpe-ngrdr, x mz nzxlr-krdr kc yisti, mz drtwrdr Jiszs kc tqycmne-ngrbzle lc murde trnzrtwzne-krdru bret, x bret esz'txu kx ycnebz badr mz bot. 17Kx xlrbz Jiszs nike tzycmnetr-ngrdr, sc tqrpipebzle badr kx, “?Nike tqyc-zlwzngr mz drtwrmu trnztwzne-krmuu bret? ?Myx kxmule, trkrlzkalamu? ?Drtqmu sa nzrtwzngr nikeng aelwapx-ngrbz Gct bamu? 18Opxm kx trpnzngr mzpu x trpnzngr nradrtqmu. Murde mrbrtr mz drtwrmu rkx kcng tqmctipeamu. #Jeremaea 5:21; Esikel 12:2 19?Mzli kc tqlopxiti-ngrne bret kcng nzlvqn, tqapu-ngrne ncblo kcng siu-nzlvqn (5,000), topla tqlvr kx nulvzoamu muli dakxnzng kcng tqyctxo?” Nzrpibzlr kx, “Nzpnu-esz'-nrade-li (12).” 20Rpi-mopwz Jiszs kx, “Dela. ?X mzli kc tqlopxiti-ngrne bret kcng rlimz tqapu-ngrne ncblo kcng siu-pwx (4,000), topla tqlvr kx nulvzoamu muli dakxnzng kcng tqyctxo?” Nzrpibzlr kx, “Topla rlimz.” 21Jiszs rveabz badr kx, “?Myx kxmule, mz drtwrmu alvztr-ngrne nimu bret o nzalvztr-rbrkr Farzsi?” #8:21 Jiszs rpile na-alvztr-ngrde nidr kx yisti kxpipz krlzle nzaetunepxngr dapu bret nzkqlu-krdr, mz nqmq lcpwz nzalvztr-rbrngr kxpipz nzkrlzlr nzatrka-atwrnr-krdr nzmncngr. A' Jiszs nzmu tr-rlxpwzu bret badr, murde krlzle nzrka-krbzle bret mz leplz kxnzkqlung.

Jiszs Amrlzle Ncblo Kx Mzte Kcba

22Mzli kc tzkrlzpe-ngrbzlr mztea Betsaeda, kzdung leplz nzvzmimlr kc ncblo kx mzte kcba mz Jiszs x nzyrnititrpzlr bade nzmaletr-krbzle drtqde. 23Jiszs malebzle mqde, vzmitxpxle rlru mz mztea kc. Zbz byatrpz mz mzte x yrlqtr-kzpzle mqde mz mzte. Jiszs rveabz bade kx, “?Myx kxmule, rmcpeq da?” 24Mrlx kc obqlvxtxde nrlc x sc tqrpipele kx, “Eu, mcpex leplz, a' tropx-angidrka nzmc-krnge nidr. Nzapunebelr nounc kxnzvzneng.” 25Zbz Jiszs yrlqtr-mopwzle mqde mz mzte. X mzli lc mzte kc tqopx ate x tqrmc-angidrpe. 26Jiszs rpibzle bade kx, “Vzpe, a' mz nzvz-krm bzkq tavaunetrq mz mztea mz nzvz-krm ma nyzm.” #8:26 Lr Jiu nzpnzkr drtwrdr le nqbya ngr nao ngi kzdq luekxpiz mz nqmq krdr. Krlc ngi kzdq mzli kx nzyrtxopwz mz Nzryrngrkxtr mzli kx Jiszs trangida-ngrdeu nzamrlz-krde leplz mzli kc ayrnrngr tqale-ngrdele. A' mwx kx prtz-kzpz kzdung kz mzli. X mzli kx krka'-ngrgu leplz mz nzmrlz-krdr, bzkq aoti txpwz drtwrgu nzmrlz-krdr mzli lapwz. A' navz zvz nzkrka'-krgu nidr nakrlz-zpwxbzle mzli kx namrlz-ngrdr.

Pita Glxle Kx Jiszs Nide Kxnzmcpx

Matiu 16:13-20; Luk 9:18-21

27Jiszs badr ncblo nedeng nzrlaszlr Gzlili Provins x sc tzvzdzpeng x nzvztrng mz nrlarnrlc kc tqycngr mztea Sisaria Filipae. Mzli kc tzvzne-ngrbzlr mz lrpzki, Jiszs rveabz badr kx, “?Myx kxmu nzglxkr leplz ninge?” #8:27 Mz nzmnckr Jiszs mz nrlc nzkrlz-krde nikeng tzaoti drtwrdr leplz, vzpxm mz Mqngrkxtr. A' trkrlzleu da amrlx.

28Nzrpibzlr kx, “Kzdung leplz nzrpilr kx nim Jon Kxawrkxtr yzlupe-mop mz nzbz-krde. X kzdung nzrpilr kx nim profet Elaeja yzluope-mop Heven. X kzdu-kzng leplz nzrpilr kx nim dq profet kxmyalz kc bqnc.” #2 King 2:1-12; Malakai 4:5; Matiu 14:1-2; Luk 9:7-8; Nzaelwapxngr 11:3-6 29Zbz rpibzle badr kx, “?A' nimu, myx kxmu nzglx-krnamu ninge?” Rpibz Pita kx, “Nim Kxnzmcpx!” 30A' Jiszs rngidrlvz-ngrbzle badr kx trkrlzkapzle mzli r nzyapwxtine-krbzlr mz leplz nzngini-krde Kxnzmcpx ne Gct.

Jiszs Ycmnetr-ngrde Nzbz-krde X Kxnamu Nzrvz-nqblqngr Nide

Matiu 16:21-28; Luk 9:22-27

31Zbz Jiszs alvztr-ngrde nidr da kx naprtzbz bade mz nzngini-krde Mrlx Leplz. Rpile kx drtqde sa na-aetqbz mz da kxkqluting. X kxnzetung r lr Jiu sa napxtxpx-ngrdr nide, krlcng lrtzlvz ngrdr, kxnzetu rdr pris, x kxnzalvztrng mz Lou sc Mosis. X sa nanibqlr nide. A' mz zbq kratq mz nibr nzbz-krde, sc tqlupe mou. 32Nzpi-krbzle badr da lc opx angidr. A' katxpxm Pita mz kztedeng x vzmitxpxle rlru kxpipz. X rpibzle bade kx, “Bzkq kxmu nzycmne-krm lc.” 33A' Jiszs lxlvrbz x obqtxbz mz ncblo nedeng, sc tqpnanatipele Pita. Rpibzle kx, “Esopx Pita! Bzkq apume bange Setzn. Murde nzrkrlz-krm vz-nqblqle drtwr leplz, a' trngiu me pnz drtwr Gct.”

34Zbz Jiszs kqlele ncblo nedeng badr leplz kcng amrlx, x rpibzle badr kx, “Doa kx navz-nqblq-angidrle ninge, narlrpx-lzbq mz nzaetq-ngrbz drtqde. X naesablqtile me pnz drtwrde esz'-krde, x bzkq axtxbzle nzo-zli-krde lrpzki rnge. #Luk 14:27 #8:34 8:33 Kxmule-esz' Pita pipx-kaile kx Jiszs nide Kxnzmcpx, a' trkrlz-atwrnr-ngrdeu nike drtwr ngrde. Mz nzmu-krde lc, na-aclvetio-kzku kxmu nzyokaetipx-krgu natq Gct x da kx aelwapx-ngrmle bagu. 8:34 Jiszs pi-angidrle kx, “Naglqle kros ngrde.” Kros drtwr ngrde nzaetqtingr drtq mz nzbzngr.

35Murde doa kx otr-zvzngr drtwrde nzlu-krde, sa namale-lvile nzlungr kxboi. A' doa kx yrlqtxole nzlu-krde murde lxngitile ninge x Nrpakxmrlz, sa naprtr mz nzlungr kxboi. 36Mane nznginingr bcnyr mz nrlc ka x amrbrtxtrle nzlu-krde mz nrlc kc navzm. 37Murde trpnzngr da mz nrlc ka kx takitrde nzxpepx-krde nzlungr kxboi. #Sam 49:7-9 38Leplz ngr nrlc ka nidr kxdrka'-ngrng kcng trnzangiolru Gct. Krkcng tzpxtxpx-ngrdr ninge x natqngeng mz nzngini-krnge Mrlx Leplz, sa napxtxpx-kz-ngrne nidr mzli kc nayzlu-ngr-mopwc' mz nzvzmi-krmc enjrl kxnztrng mz zmatq ngr Trtenge.”

Currently Selected:

Mak 8: ntu

Highlight

Copy