Luke 13
13
Mpi’ keruum ko denen rom ara mum’
1Re ngiyal’ i n’em e immoy boch e girdi’ ko gin’em nrogned ngak Jesus murung’agen fapi girdi’ nu Galile ni thang Pilate e pogofan rorad ko ngiyal’ ni yad be pi’ e maligach riy ngak Got. 2Me fulweg Jesus ngorad ni ga’ar, “Bochan e nthang e fan rok e pi girdi’ nem nu Galile ni aram rogon me ere gimed be finey ni ir e ke micheg ni kab gel farad tadenen ngak urngin e tin ni kabay e girdi’ nu Galile fa? 3Danga’! Nggog ngomed ni fa’anra dab mu pi’ed keru’med ko kireb ni gimed be rin’, ma gimed gubin ni bay mm’ad ni bod yad. 4Ma bu uw rogon fa ragag nge meruk i girdi’ nu Siloam nra m’ad ni fa’ani m’ing fare wulyang ntafen e damit nga dakenrad? Gimed be finey ma ren’ey e ke micheg ni kab gel farad kireb ngak urngin e tin ni kabay e girdi’ ni yad be par u Jerusalem? 5Danga’! Nggog ngomed ni fa’anra dab mu pi’ed keru’med ko kireb ni gimed be rin’, ma gimed gubin ni bay mm’ad ni bod yad.”
Fanathin ni murung’agen fare ke gek’iy ni fig nder yib wom’ngin
6Me ere yog Jesus ngorad e re fanathin ni ba’aray ni ga’ar, “Be’ nib mo’on e immoy ba ke gek’iy ni fig nike tugul u milay’ rok ni milay’ ko grape. Me yan ngi i changarnag wom’ngin u l’ugun ma de pir’eg ta’reb. 7Ma aram me ga’ar ngak e cha’ nma maruwel u milay’ rok, Mu sap, nga dalip e duw ni yug gu be sul ngaray gu be changarnag wom’ngin e re ke gek’iy ney ma dawor gu pir’eg ta’reb riy. Ere mu th’ab! Ya susun e mangfan ni nge par ngi i fek yong’olen e but’? 8Machane me fulweg fa’anem nma maruwel u milay’ ni ga’ar, Nga yugu ni pag e ta’ab ney e duw; ya bay gu fu’og wol’ e ran u to’oben nge liyeg, nge mu’ mu gu suguy ko n’en nma yong’olnag e but’. 9Ma fa’anra yib wom’ngin e binem e duw, ma aram e ke manigil; ma fa’anra danga’, me ere mog ngan th’ab.”
Jesus ni golnag be’ ni bpin nib marwoth ko rofen ni Sabbath
10Reb e rran ni Sabbath ni be machib Jesus u lan reb e tafen e mu’ulung, 11ma immoy be’ ni bpin u rom nike ying ba mo’onyan’ ngak, ke tay nib m’ar ni nga ragag nge meruk e duw; ni kan buguy ngam’on ndabiyag ni nge k’iyag ir ngalang. 12Ma fa’ani guy Jesus e re pin nem me non ngak ni ga’ar, “Ppin, kam dargow e m’ar rom!” 13Me tay pa’ nga daken fare pin ma ka chingiyal’ nem me k’iyag ir ngalang me yog e sorok ngak Got.
14Ma cha’ nib tolang ni ir e ma tay murung’agen tafen e mu’ulung e damumuw ni fan e ke golnag Jesus e m’ar ko chirofen nem ni Sabbath; ma aram me non ngak e girdi’ ni ga’ar, “Nel’ e rran ni bay ni ir e ngad maruwelgad riy; ere mired e girdi’ u lan e pi rran ney ngan gol nagmed ko m’ar, machane gathi rofen ni Sabbath.”
15Me fulweg Somol ngak ni ga’ar, “Gimed e pi tadake moding nir! Demturug be’ u fithik’med mrayag ni nge pithig e garbaw ara dongki rok u tafen e gamanman nge fek i yan nge pi’ e ran ngak ko chirofen ni Sabbath. 16Me ere chiney e ba’aray be’ aray ni ir be’ ni owchen Abraham ni nga ragag nge meruk e duw nike m’ag Satan ke tay; ere yira pithig e m’ag rok ko chirofen ni Sabbath fa danga’?” 17Fulweg rok ngorad e ngongliy e pi to’ogor rok ngar tamra’gad ngorad, ma aram rogon ma urngin e girdi’ ni kar felfelan’gad nga urngin e tin ni bfel’ ban’en nike ngongliy.
Fanathin ni murung’agen awochngin e mustard
(Matthew 13:31–32; Mark 4:30–32)
18Me ga’ar Jesus, “Uw rogon e gagiyeg rok Got? Gur mang e rayag ni nggu susunnag ngay? 19Bod rogon ba awochngin e mustard ni fek be’ nge yung nga milay’ rok; me tugul nge ga’ kaen me toy e arche’ tafen nga fithik’ i papa’ngin.”
Fanathin ni murung’agen e n’en nma thownag e flowa
(Matthew 13:33)
20Miki fith Jesus bayay ni ga’ar, “Mang e gu ra susunnag e gagiyeg rok Got ngay? 21Bod rogon e n’en nma thownag e flowa ni fek be’ ni bpin nge athkuy nga ba dabiy i flowa me munmun me thow fa gi flowa ni ga’ngin.”
Fare mab nib wen’in
(Matthew 7:13–14, 21–23)
22Me yan Jesus ni be machib i yan u lan e tin ni ba ga’ e binaw nge tin ni ba’achig, ni be yan nga Jerusalem.” 23Me fith be’ ngak ni ga’ar, “Gur in e girdi’ e ra thap ngak Got?”
Me fulweg Jesus ngorad ni ga’ar, 24“Mu athamgilgad ngam marod ko fare mab nib wen’in; ya nggog ngomed ni bo’or e girdi’ ni bay ra guyed rogon ni ngranod ngalan machane dabiyag rorad.
25“Ya cha’ ni ir e masta ko fare naun e ra sak’iy nge ning e mab; ma fa’an mu sak’iygad u wuru’ e mab mi gimed tabab i tugtuguy e mab me lungumed, Mbing e mab ngomad! ma bayi fulweg ni ga’ar, Da gu nang e gin kambad riy. 26Ma bay mu fulweged ngak ni lungumed, Nggu uned ngom ko abich nge garbod; ya um machib u lan binaw romad! 27Ma bay ki yog bayay ni ga’ar, Da gu nang e gin kambad riy. Ere mmarod ngam chuwgad rog, ya gimed urngin ni gimed ma rin’ e kireb! 28Ri bay um yorgad ma be chachafin nguwelmed ko ngiyal’ ni bay mu guyed Abraham, nge Isak, nge Jakob, nge urngin e pi profet ni yad bay ko gin nsuwon Got, ma kan taymed u wuru’! 29Ya bay yib e girdi’ u lan e ngek ngu lan e ngal, ngu lan e lel’och ngu lan e yimuch ngarbad ra pired nga tebel ko gin nsuwon Got. 30Ma aram e pi’in yad ba tomur e chiney e bay ra m’onod, ma pi’in yad m’on e chiney e bay ra tomurgad.”
Jesus nib t’uf yu Jerusalem rok
(Matthew 23:37–39)
31Ka re ngiyal’ i n’em me yib boch e Farise ngak Jesus me lungurad ngak, “Thingar mu chuw u roy ngam man ngabang, ya ke finey Herod ni nge thang e pogofan rom.”
32Me fulweg Jesus ngorad ni ga’ar, “Mmarod mogned ngak e re fox nir ni gu be tuluf e pi mo’onyan’ rok e girdi’ ma bay ug golnag e girdi’ ko liliy e daba’ nge gabul, ma bin ra gaman e dalip e rran ngay e ra gu mu’nag e maruwel rog. 33Machane thingar gu wan ni gu be milekag i yan e daba’ nge gabul, nge langilath; ya de mat’aw ni ngan thang e pogofan rok ba profet u yugu bang, ya kemus nu Jerusalem e yira rin’ riy.
34“Jerusalem, Jerusalem! Kam thang e pogofan rok e pi profet, ma kam malangnag e pi’in ni l’oegrad Got ngar feked e thin rok i yib ngom! Nge gaman e in yay ni kug guy rogon ni nggu kunuy urngin e girdi’ rom, ni bod ba alabal ni chugumiy pifak nga tan pon, machane da mpageg nggu rin’! 35Ere chiney e bay nn’ag e tabinaw rom. Ma nggog ngom ni bay dab kum guyeg nge yan i mada’ ko ngiyal’ ni bay mog ni lungum, I Got e nge ayuweg e en nike yib ni owchen Somol.”
Currently Selected:
Luke 13: YAP
Highlight
Share
Copy
Want to have your highlights saved across all your devices? Sign up or sign in
© 2007 Bible Society of Micronesia. Released under the Creative Commons CC-BY-SA license 4.0.
