Luka 8
8
Á̱nyiuk ba̱ ku Beang Yesu a̱ni
1Á̱ si̱ labeang bah, Yesu si̱ nwuo chong a̱ nwuai a̱cha̱chet ma̱ng a̱chyuang a̱ka̱keang na̱ shya̱ kpa̱mkpaan a̱ja a̱ni. A̱ si̱ shei A̱sham Nkhang ka tazwa Tyok A̱gwaza hu. Mman ta̱m swak ma̱ a̱feang nggu na si̱ shya̱ ndung ma̱ng a̱nggu; 2ma̱ng á̱nyiuk á̱ghyang nang á̱ ku choot mba zwán, á̱ si̱ kam á̱ka̱tuk ntswá ji̱ si̱ ghwut ma̱ a̱mba a̱ni.
Mami mba, a̱byii̱k a̱ghyang ku nshya̱ nang á̱ ngyei Ma̱ryamu Ma̱ga̱daliya a̱ni. Nggu wa nang á̱ ku kam á̱ka̱tuk ntswá a̱natat ba, ba̱ si̱ ghwut ma̱ a̱nggu. 3Yowana, a̱byii̱k Kuza, ku mun a̱ nshya̱. A̱tyok nggu wu wa ku yet byia̱k a̱gwam Hiridut ji; mbeang Suzana ma̱ng á̱nyiuk á̱ghyang ma̱ a̱di̱di̱t; ba̱ ku nwuak kurum nang ba̱ byia̱ a̱ni ba̱ si̱ mbeang Yesu ma̱ng mman ta̱m nggu na.
Kidee tazwa A̱tyu Khap a̱ Nai Zwá Yak a̱ni
(Mat 13:1-9; Ma̱r 4:1-9)
4Á̱ghyang á̱tuk, nang á̱kpa á̱niet ntung neet ma̱ a̱ka̱keang ma̱ a̱di̱di̱t á̱ bai ba̱ fa̱k tyiet Yesu hu a̱ni; a̱wot a̱ si̱ tyiet baa di̱ kidee nyia̱,
5“A̱tyu khap wa ghwut a̱ nat nai zwá yak. Nang gu nshya̱ di̱ nai hu a̱ni, zwá jhyáng si̱ kwa̱i di̱n gak. Á̱niet si̱ shai, a̱ka̱man si̱ chyok, na̱ si̱ tang.
6“Zwá yak jhyang si̱ kwa̱i mi̱ kukwak. Nang ji̱ ba̱ nta a̱ ghwut a̱ni, ji̱ si̱ shyuk, mat a̱byin ka byia̱ ghwok bah.
7“Zwá jhyáng si̱ kwa̱i mi̱ sa̱kan. Nang sa̱kan ji ndaai ndung ma̱ng yak hu a̱ni, sa̱kan ji si̱ feap jii, ji̱ si̱ ta̱fa̱k yak hu.
8“A̱wot zwá jhyáng si̱ kwa̱i da̱ a̱vwuo ka̱ byia̱ bwum a̱ni. Ji̱ si̱ ta, ji̱ si̱ laai. Ji̱ si̱ tyia̱ a̱cha̱chet dudung. A̱tyu khap wu si̱ shya̱ kpangti̱n chyi tazwa zwá nang gu nai a̱ni!” Nang Yesu ntyak tyiet di̱ kidee jini a̱ni, a̱ si̱ ta̱ngam a̱nwuat ka mi̱ chet nyia̱, “Konyan wa chat a̱ lyen a̱ni, gu myiai a̱fufwuo gu fa̱a̱k!”
9Mman ta̱m Yesu na si̱ lyip gu kyang nang kidee jini fa a̱ni. 10Yesu si̱ nwuak ba shim nyia̱, “Á̱ shim nyin ndyo nyi fi̱k kyang ku shya̱ di̱ niat tazwa Tyok A̱gwaza hu a̱ni. A̱wot, n tyiet á̱kum á̱niet ka di̱ kidee ja, da̱nian:
‘Ka̱ ba̱ nwuan,
ba̱ na li shansham bah.
Ka̱ ba̱ fa̱k,
da̱ mba ba̱ na fi̱k bah.’#8:10 Ish 6:9.
11“Kyang hu nang kidee jini fa a̱ni, huhwa yet; zwá yak jija yet a̱lyiat A̱gwaza na. 12Gak hu nang zwá yak ji nkwa̱i a̱ni,#8:12 Lyuut cha̱chaat: “Zwá yak ji̱ kwa̱i di̱n gak hu a̱ni.” huhwa yet kidee nfwuo á̱niet ba̱ fa̱k a̱lyiat A̱gwaza na a̱ni. A̱wot A̱ta̱nyeang ka si̱ bai, ka̱ si̱ ta̱wap A̱lyiat A̱gwaza na nang á̱ nai mi̱ nfwuo mba na a̱ni. Kalak ba̱ du nwuak a̱chuchuk ba̱ shya̱ san.
13“Kukwak hu nang zwá yak ji nkwa̱i a̱ni#8:13 Lyuut cha̱chaat: “Zwá yak ji̱ kwa̱i mi̱ kukwak hu a̱ni.”, huhwa yet kidee nfwuo á̱niet ba̱ fa̱k A̱lyiat A̱gwaza na a̱ni; ba̱ si̱ kin san naa ma̱ng a̱gwai. A̱wot nang A̱lyiat A̱gwaza na mbyia̱ á̱ni̱nan ba̱ nwuo á̱ nat gbang mi̱ nfwuo mba na a̱ni bah; huhwa ki̱ swuo a̱bung ba̱ bai, ku á̱ ya̱shuk baa, ba̱ na bwuok lilyim ma a̱nggang.
14“A̱wot tyan sa̱kan ji nang zwá yak ji nkwa̱i a̱ni#8:14 Lyuut cha̱chaat: “Zwá yak ji̱ kwa̱i mi̱ tyan sa̱kan ji a̱ni.”, jija yet kidee nfwuo á̱niet ba̱ san A̱lyiat A̱gwaza na; a̱wot a̱fi̱fa swanta wuni, shyuo kurum, ma̱ng nyinyang swanta, si̱ feap baa. A̱wot ba̱ yok laai, ba̱ tyia̱ a̱tan tswá.
15“A̱wot a̱tsatsak a̱byin wu a̱ byia̱ bwum hu nang á̱ nnai zwá yak ji a̱ni#8:15 Lyuut cha̱chaat: “Zwá yak ji̱ kwa̱i da̱ a̱vwuo ka byia̱ bwum a̱ni.”, kikya yet kidee nfwuo á̱niet ba̱ fa̱k A̱lyiat A̱gwaza na ma̱ng fwuo nyiung. A̱wot ba̱ si̱ sak na mi̱ nfwuo mba na. Ba̱ si̱ bu neap nfwuo mba na. Ba̱ si̱ nnyia̱ nta̱m. Ba̱ si̱ tyia̱ tswá gba̱mgbam.”
Kidee tazwa Fi̱tila
(Ma̱r 4:21-25)
16“Á̱ mbyia̱ a̱tyu a̱ na tyia̱ long mi̱ fi̱tila, a̱wot gu kup ji ma̱ng kham, ku a̱ sak ji a̱tafa a̱gbaat a̱ni bah. Da̱ a̱kwonu a̱kya, á̱ ni̱ sak ji tazwa a̱tyii kya, da̱nian á̱niet ba̱ nwuai mali ka a̱ni, ba̱ ka li sai fi̱tila hu.
17A̱mgba̱m kyang ku shya̱ di̱ niat a̱ni;
á̱ na ghwut ma̱ng a̱nhu kpa̱sai,
konyan a̱ lii.
A̱wot kuzang kyang nang á̱ kup a̱ni;
á̱ na khwuk hu kpa̱sai,
konyan a̱ lyen.
18“Mat a̱nia, nyi ta̱bam ma̱ng si̱sak nang nyi nfwuong a̱lyiat a̱ni. A̱mgba̱m á̱niet ba̱ fwuong tyiet nung hu a̱ni, á̱ na mbeang ba fi̱k hu. A̱wot á̱niet ba̱ nwai fwuong a̱lyiat na a̱ni, a̱mgba̱m kyang ba̱ dam ba̱ fi̱k a̱ni; á̱ na ta̱wap hu á̱ ghwon baa.”
Á̱niet ba̱ yet Á̱tsatsak Á̱na̱nyiuk Yesu a̱ni
(Mat 12:46-50; Ma̱r 3:31-35)
19A̱wot a̱yang byin ma̱ng á̱na̱nyiuk Yesu si̱ bai á̱ chat ba̱ li ngguu. A̱wot da̱ mba, ba̱ shya̱ tat da̱ a̱vwuo nggu bah, mat á̱kpa á̱niet ka. 20A̱yin si̱ hyia̱ ma̱ng Yesu nyia̱, “Di a̱yang byin ang wu ma̱ng á̱na̱nyiuk ang ba yong a̱ta̱usa. Ba̱ chat ba̱ li ang!”
21Huhwa Yesu si̱ nwuak gu shim nyia̱, “A̱yang nung wu ma̱ng á̱na̱nyiuk nung ba; bibya bu yet a̱mgba̱m á̱niet ba̱ fwuong A̱lyiat A̱gwaza na, ba̱ si̱ nyia̱ nta̱m ma̱ng á̱na a̱ni.”
Yesu Kam A̱ka̱tuk Ngwun Nza ma̱ng Ywan A̱sa̱khwot
(Mat 8:23-27; Ma̱r 4:35-41)
22Á̱ghyang á̱tuk, Yesu si̱ nyia̱ ma̱ng mman ta̱m nggu na, “Nyi bai zi̱ wak byia̱k a̱gba̱ndang jok wu. Zi̱ nat a̱ma̱nyi keniaau.” Mat a̱nia, ba̱ si̱ nwuo kukwon a̱wak, ba̱ si̱ wak á̱ nkat. 23Nang ba̱ ngwak á̱ naat byia̱k a̱ni, Yesu si̱ kai nda. A̱ka̱tuk ngwun si̱ nwuo hyap. Kukwon a̱wak hu si̱ nwuo nhyaai ma̱ng a̱sa̱khwot, ku si̱ shim ta̱lyip. Ba̱ si̱ shya̱ da̱ a̱kwonu a̱khwu ma̱ng swuan.
24Mman ta̱m Yesu na si̱ shyei á̱ nat, ba̱ si̱ shyip gu nyia̱, “A̱tyoli, a̱tyoli! Zi̱ na kwi!” Yesu si̱ shyip, a̱ si̱ kam a̱ka̱tuk ngwun wu ma̱ng ywan a̱sa̱khwot hu, ba̱ tyia̱ nywang. Mi̱ di̱ yong a̱hwa, a̱ka̱tuk ngwun wu si̱ kin ngyong! Kuzang kyang si̱ tyia̱ lyot! 25Yesu si̱ lyip mman ta̱m nggu na nyia̱, “Yihwa mbyia̱ nang nyi nnwai nwuak fwuo da̱ nung?”
Ba̱ si̱ fa̱k a̱wun ma̱ng a̱ga̱de. Ba̱ si̱ lyip á̱ghyang mba, “Zang tangka̱i a̱yin hwa hu? Ka̱ a̱ kam a̱ka̱tuk ngwun ma̱ng ywan a̱sa̱khwot, ba̱ fa̱k guu!”
Yesu Kam Á̱ka̱tuk Ntswá ba̱ si̱ Ghwut ma̱ A̱tyok A̱ghyang
(Mat 8:28-34; Ma̱r 5:1-20)
26Yesu ma̱ng mman ta̱m nggu na si̱ ya a̱son mi̱ kukwon a̱wak, á̱ neet mi̱ fam a̱byin Ga̱lili. Ba̱ si̱ byia̱k a̱gba̱ndang jok wu, á̱ tat a̱ma̱nyi fam a̱byin Ga̱ra̱sinawa#8:26 Lyuut ghyang mbyia̱: Ga̱da̱ri̱na̱t, ku Ga̱rga̱si̱ni̱t..
27Nang Yesu nghwut mi̱ kukwon a̱wak hu a̱ni, a̱tyok a̱ghyang a̱ byia̱ á̱ka̱tuk ntswá a̱ni si̱ kin ghwut a̱ neet mami a̱keang ka a̱ ba̱ myim ma̱ng Yesu! A̱tyok a̱wa ka̱n dabeang nang gu chong ka̱gbang. A̱ si̱ ghwon a̱li, a̱ swuat mami nkuu bibi nang a̱ nniat á̱niet a̱ni.
28Nang gu ndi Yesu a̱ni, a̱ si̱ kin khak kun, a̱ si̱ kpaat a̱khwukhwut a̱zaghyi Yesu! A̱wot a̱ si̱ yorong mi̱ chet nyia̱, “Yesu, nwan Nggwon A̱gwaza a̱ Swak ma̱ng Shi a̱ni; yihwa nang a chat da̱ a̱vwuo nung? N naai ang, yok tyia̱ nung swuo a̱bung bah!” 29(A̱tyu byia̱ a̱ka̱tuk ntswa wu ku hyia̱ a̱nia, mat Yesu ku mi̱ nkam a̱ka̱tuk ntswa wu gu ghwut da̱ nggu.)
A̱ka̱tuk ntswa wuni ku swuo chet a̱tyok wu kuzang jen. Ku jen nang á̱ nda̱p gu ma̱ng a̱nyanyang á̱ si̱ cham nggu a̱ni; a̱ ni̱ chak ywan hu a̱ tyong a̱ nat mi̱ tswa a̱yit nang a̱ka̱tuk ntswa wu wa ku nyia̱ tyok da̱ nggu a̱ni.
30Yesu si̱ lyip gu nyia̱, “Á̱ ngyei ang a̱nyan?”
A̱ si̱ nwuak Yesu shim, nyia̱, “Á̱ ngyei nung, ‘A̱di̱di̱t.’ ” Á̱ ku ngyei gu a̱nia, mat a̱ ku byia̱ á̱ka̱tuk ntswá ba̱ si̱ shi á̱kpa ma̱ a̱di̱di̱t mi̱ vam nggu hu. 31Á̱ka̱tuk ntswá ba si̱ ya a̱son mi̱ naai Yesu, nyia̱ gu yok ta mba mami a̱tsuung bwong sang sangba̱p bah.
32Di̱n jen a̱ja nang a̱gba̱ndang a̱sorong a̱yaakusuru ya a̱beam tsok kpa̱mkpaan a̱ja; á̱ka̱tuk ntswá ba si̱ naai Yesu gu ghwon mba ba̱ nwuo mi̱ nvam a̱yaakusuru na. Yesu si̱ shim mba ndyo.
33Huhwa á̱ka̱tuk ntswá ba si̱ ghwut ma̱ a̱tyok a̱wa, ba̱ si̱si̱ nwuo ma̱ a̱sorong a̱yaakusuru ka. A̱wot a̱mgba̱m a̱sorong a̱yaakusuru ka si̱ kin kpa̱k á̱ neet da̱ a̱gut wu, á̱ ba̱ kwa̱i ma̱ a̱gba̱ndang jok wu, ba̱ si̱ kwi!
34Nang á̱niet chok a̱yaakusuru ba ndi a̱nia a̱ni, ba̱ si̱ kan doot ba̱ si̱ tyong á̱ nat ma̱ a̱ka̱keang kpa̱mkpaan na ma̱ng bibyin khap hu. Ba̱ si̱ tyong á̱ shei nkhang kyang hu ku bai a̱ni. 35Á̱niet si̱ ghwut á̱ nat ba̱ li kyang hu ku bai a̱ni. Á̱kpa á̱niet si̱ tung á̱ tyong Yesu á̱ keang. A̱wot ba̱ si̱ li a̱tyok wu nang á̱ kam á̱ka̱tuk ntswá ba ba̱ si̱ ghwut ma̱ a̱nggu a̱ni; nang gu swan a̱zaghyi Yesu, a̱ kup a̱yaatoot; a̱wot nang gu shya̱ ma̱ng a̱tsatsak a̱di̱dam. A̱mgba̱m á̱niet ba si̱ fa̱k a̱wun ba̱t.
36A̱wot á̱niet ba ba̱ ku nshya̱, ba̱ si̱ li kyang ku bai a̱ni, ba̱ si̱ shei ma̱ng á̱kum á̱niet ka si̱sak nang á̱ nchoot a̱tyu byia̱ a̱ka̱tuk ntswa wu a̱ni. 37A̱wot a̱mgba̱m á̱niet mi̱ fam a̱byin Ga̱ra̱sinawa hu si̱ naai Yesu, gu doot a̱ ghwon fam a̱byin mba hu. Mat a̱gba̱ndang a̱wun ku ta̱bat ba ba̱t.
Mat a̱nia, Yesu si̱ bwuok a̱ si̱ nwuo kukwon a̱wak hu. A̱ si̱ byia̱k a̱ nat a̱ma̱nyi njok ka. 38A̱tyu nang á̱ kam á̱ka̱tuk ntswá ba ba̱ si̱ ghwut ma̱ a̱nggu a̱ni; si̱ naai Yesu nyia̱, a̱ chat a̱ khwi ngguu. A̱mgba̱m ma̱ng a̱nia, Yesu si̱ ta̱m nggu a̱mali nyia̱, 39“Kaai, bwuok nat a̱mali. A si̱ hyia̱ ma̱ng kyang bwak ang hu kuzang kyang nang A̱gwaza nyia̱ ang dyo a̱ni.” Huhwa, a̱tyu nang á̱ kam á̱ka̱tuk ntswá ba ba̱ si̱ ghwut ma̱ a̱nggu a̱ni, si̱ chong a̱ kat a̱keang ka, a̱ shei a̱cha̱chet nkyang nang Yesu nyia̱ nggu ndyo a̱ni.
Yesu Choot Á̱niet Nzwan ba̱ Nwuak Fwuo da̱ nggu a̱ni
(Mat 9:18-26; Ma̱r 5:21-43)
40Jen ji nang Yesu mbwuok a̱ nat a̱ma̱nyi a̱gba̱ndang jok Ga̱lili ka a̱ni, á̱kpa á̱niet ka a̱ja si̱ san nggu mbwak nfeang. Mat ba̱ ku swan á̱ fwuong bai nggu hu. 41A̱jawa a̱tyok a̱ghyang nang á̱ ngyei Yayirut, a̱ si̱ yet a̱kwak a̱son tutu a̱tung A̱yahudawa a̱ni; si̱ neet a̱ bai, a̱ ba̱ ta̱bwak a̱zaghyi Yesu. A̱ si̱ naai nggu a̱ fat a̱sa̱kut nyia̱, Yesu gu bai a̱gbang nggu; 42nyia̱, nggwon a̱nap nang gu byia̱ ma̱nyin ka a̱ni, ka̱ yet a̱lyia̱ swak ma̱ a̱feang, nang ka̱ nyia̱ ma̱ng zwan á̱ chak á̱ kwi.
Nang Yesu nnat ndung ma̱ng Yayirut a̱ni, á̱kpa á̱niet ka si̱ tyong Yesu á̱ keang. Ba̱ si̱ feap gu mi̱ kuzang fam. 43A̱byii̱k a̱ghyang ku shya̱ mami á̱kpa á̱niet ka, nang gu ka̱n nyia̱ a̱lyia̱ swak ma̱ a̱feang nang gu tyong a̱sok kuzang jen.#8:43 Lyuut ghyang mbeang a̱ji: “A̱wot a̱byii̱k wu hyat kurum nggu hu a̱ tyak da̱ a̱vwuo á̱niet kan.” A̱wot da̱ nggu, a̱ shya̱ a̱tyu a̱ na choot gu a̱ni bah.
44A̱byii̱k a̱wa si̱ nwuo mami á̱kpa á̱niet ka a̱ma̱nta Yesu, a̱ si̱ byiam a̱ta̱m a̱junjung a̱toot Yesu ka. Mi̱ di̱ yong a̱hwa, tyong a̱sok nggu hu si̱ kin gyong!
45Huhwa Yesu si̱ lyip nyia̱, “A̱nyan wa byiam nung?”
Konyan si̱ fwuo nang gu mbyiam Yesu bah. A̱wot Bitut si̱ nyia̱ ma̱ng Yesu, “A̱tyoli, á̱kpa á̱niet kikya fam ang. Huhwa mbyia̱ nang á̱ nghyun ang!”
46A̱wot Yesu si̱ nyia̱, “A̱mgba̱m ma̱ng a̱nia, a̱yin kwan a̱ si̱ byiam nung za̱m. Mat n fa̱k chet choot zwan ku ghwut ma̱ nung!”
47A̱byii̱k wu si̱ fi̱k nang Yesu wa ka̱n dyen kyang hu nang gu nyia̱ a̱ni. Da̱ nggu, a̱ bu si̱ mi̱n niat a̱pyia̱ nggu bah. A̱ si̱ nwuo tyi̱ri̱m vam. A̱wot a̱ si̱ nat, a̱ si̱ kpaat a̱khwukhwut a̱zaghyi Yesu. A̱mgba̱m á̱kpa á̱niet ka si̱ fa̱k si̱sak nang gu nshei kyang hu ku mbyia̱ nang gu mbyiam Yesu a̱ni; ma̱ng si̱sak nang Yesu nchoot gu tyong a̱sok nggu hu si̱ yong da̱ a̱ka̱nyiung a̱ni.
48Yesu si̱ nyia̱ ma̱ng nggu, “A̱yang a̱li, nwuak fwuo ang hu da̱ nung choot ang. Nat a swan swat nyinyang.”
49Nang Yesu nshya̱ di̱ lyiat ma̱ng a̱byii̱k a̱ byiam nggu a̱ni, a̱ta̱m a̱ghyang si̱ kin neet a̱mali Yayirut, a̱tyu a̱ ku yet a̱kwak a̱son tutu a̱tung A̱yahudawa wu a̱ni. A̱ta̱m wu si̱ nyia̱ ma̱ng Yayirut, “Nggwon ang ka wa ka̱n khwu. Ma̱ninika, yok a̱tyu tyiet wu shonshyon.”
50A̱wot nang Yesu nfa̱k a̱nia a̱ni, a̱ si̱ nyia̱ ma̱ng Yayirut, “Yok fa̱k a̱wun bah! Nwuak fwuo da̱ nung. Nggwon a̱nap ang ka na choot!”
51Nang Yesu ntat a̱li Yayirut ka a̱ni, a̱ si̱ shim a̱yin gu nwuo ndung ma̱ng a̱nggu mi̱ tutu nang á̱ mmyiai kwom nggwon hu a̱ni bah; si̱ ma̱ nggu wa ma̱ng Bitut, Yoona, Yakubu, mbeang a̱tyia̱ ma̱ng a̱yang nggwon wu. 52A̱li ka ku nhyat ma̱ng á̱niet ba̱ twei a̱nak á̱ khwot ndang a̱ghyi a̱ni. A̱wot Yesu si̱ nyia̱ ma̱ng a̱mba, “Nyi yok twei bah! Nggwon neam ka khwu wa bah, ka̱ kai mi̱ nda nia!”
53Á̱kpa á̱niet ka si̱ nwuo mai nggu mai lihyat, mat nang ba̱ ndyen nang nggwon neam ka wa ka̱n khwu a̱ni. 54Nang Yesu ma̱ng mman ta̱m nggu na, mbeang a̱tyia̱ ma̱ng a̱yang nggwon wu nnwuo mi̱ tutu hu a̱ni, Yesu si̱ ta̱bat kwom nggwon hu di̱ mbwak, a̱ si̱ yorong mi̱ chet nyia̱, “Nggwon nung, ta̱ngam!”
55A̱wot mi̱ di̱ yong a̱hwa, nggwon ka si̱ kin ta swuan, ka̱ si̱ doot a̱ yong! A̱jawa Yesu si̱ nyia̱ ma̱ng a̱mba, ba̱ nang nka kyayak, ka̱ ya. 56A̱tyia̱ wu ma̱ng a̱yang nggwon wu, si̱ fa̱k a̱ga̱de! A̱wot Yesu si̱ gba mba, ba̱ yok hyia̱ ma̱ng a̱yin kyang hu nang á̱ nyia̱ a̱ni bah.
Currently Selected:
Luka 8: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
