Matyu 24

Yesu Shei Á̱zanson di̱ Nkyang na̱ na Bai di̱ Ngaan Jen wu a̱ni

(Ma̱r 13:1-2; Luk 21:5-6)

1Nang Yesu nshya̱ di̱ ghwon fam A̱li Nwuat Za̱nang A̱gwaza hu a̱ni, mman ta̱m nggu na si̱ bai á̱ shei nggu a̱sham a̱ka̱nok á̱ghyang A̱mali Nwuat Za̱nang A̱gwaza ka. 2Huhwa Yesu si̱ nyia̱, “Nyi li a̱mgba̱m a̱ka̱nok nani a? N tak nyin a̱tsak a̱lyiat, á̱ mbyia̱ a̱fang a̱nyiung nang á̱ na ghwon tazwa a̱ghyang a̱ni bah! A̱mgba̱m na, á̱ na bi̱ri̱m naa!”

3Nang si̱ a̱hwa nswak a̱ni, Yesu shya̱ di̱ swan di̱ Tsok Za̱itun ma̱nyin gu. Mman ta̱m nggu na si̱ bai á̱ ba̱ shya̱ nggu. Ba̱ si̱ lyip gu da̱ a̱beam nyia̱, “A̱tyoli, tak ma̱ng a̱nzi̱t, zang jen ja á̱ na mbi̱ri̱m nkyang nani? A̱wot yihwa á̱ na li ku na tak jen bwuok ang ji ma̱ng ngaan jen swanta wu?”

4Yesu si̱ nwuak ba shim nyia̱, “Nyi ta̱bam, kalak a̱yin a̱ du laai nyin! 5Mat á̱niet ma̱ a̱di̱di̱t na bai da̱ a̱lyoot nung, di̱ bwoi a̱ka̱laa, ba̱ kyiak nyia̱ bibya yet ‘Kristi,’ a̱ yet A̱tyu nang A̱gwaza kup gu tyok a̱ni. A̱wot ba̱ na laai á̱niet ma̱ a̱di̱di̱t.

6“A̱wot nyi na fa̱k nkhang zwáng ma̱ng a̱gugwong zwáng. A̱wot nyi yok fa̱k a̱wun bah. Mat, ku yet ta hwa ntangka̱i nkyang a̱nia na̱ bai. A̱wot ngaan njen wu na kin bai a̱nfaan bah. 7Nwap na kwan zwang ma̱ng nwap, a̱wot tyok ku kwan zwang ma̱ng tyok. Á̱ na nyia̱ a̱cha̱chet nzong ma̱ng tyi̱ri̱m a̱byin ma̱ a̱ka̱vwuo ma̱ a̱di̱di̱t mi̱ swanta hu. 8A̱wot a̱mgba̱m nkyang nani nia na yet a̱son swuo a̱bung ka ka̱ na bai, ma̱nang a̱fa mbyin ni̱ ntsa bwan a̱byii̱k di̱n jen twei ma̱ng byin a̱ni.

9“A̱jawa á̱ na ya̱baat nyin, á̱ ya̱shuk nyin, á̱ bu hyaai nyin. Á̱ na lak li nyin mi̱ swanta hu, mat nyi yet á̱niet khwi nung bya. 10Mi̱ njen a̱ja, á̱niet ma̱ a̱di̱di̱t na bwuok lilyim di̱ khwi nung hu. Ba̱ bu la̱p á̱shuk bwuk ma̱ng á̱ghyang, a̱wot ba̱ lak li á̱ghyang. 11A̱wot a̱yaata̱m ba̱ kyiak pyipyia̱ mba ba̱ yet á̱tsak a̱yaata̱m a̱kwonu A̱gwaza a̱ni, na ghwut mi̱ swanta hu. A̱wot ba̱ na laai á̱niet ma̱ a̱di̱di̱t. 12Á̱niet swanta ba mi̱ kuzang a̱vwuo na mbeang a̱ka̱tuk nyia̱ wu. Mat a̱nia, á̱niet ba na ghyuai chat á̱ghyang hu. 13A̱wot a̱tyu a̱ gbang a̱lyia̱ a̱ si̱ yong mi̱ chet si̱ nat sangba̱p a̱ni, nggu wa na shya̱ swuan sang sangba̱p. 14A̱wot á̱ na shei A̱sham Nkhang Tyok tswazwa kani mi̱ swanta hu, mat a̱mgba̱m nnwap mi̱ bibyin swanta hu na̱ fa̱k, a̱wot ngaan jen wu a̱ sii bai.

A̱ka̱tuk Swuo A̱bung a̱ Chobai a̱ni

(Ma̱r 13:14-23; Luk 21:20-24)

15“Mat a̱nia, jen chobai nang nyi na ndi kyang nang Daniyet, a̱ta̱m a̱kwonu A̱gwaza gbangbang ku shei á̱zanson a̱ni. Nyi na li a̱shi̱shi̱k nkyang nang á̱ sak ma̱ A̱za̱za̱rak A̱vwuo, a̱ tyei A̱li Nwuat Za̱nang A̱gwaza ka a̱na̱ndyung, a̱ si̱ tyia̱ á̱ si̱ kam nka á̱ ghwon a̱ni.” (A̱tyu a̱ fang a̱lyiat nani a̱ni, yok gu fi̱k!)

16Di̱n jen a̱ja ja, á̱niet ba̱ shya̱ mi̱ fam Yahudiya a̱ni, ku yet ta hwa ba̱ tyong á̱ shot á̱ nat da̱ tsutsok. 17A̱tyu a̱ shya̱ tazwa a̱kup nyuo a̱ni, gu yok mak chyok a̱ nwuo a̱ kyiak kyang mi̱ nyuo hu bah. 18Ma a̱nia wa, a̱tyu a̱ shya̱ ma̱ a̱byin khap a̱ni, gu yok bwuok a̱ nat a̱mali, gu ka kyiak a̱toot a̱ sii nkat bah. 19Mi̱ mam a̱nia, ku na swan á̱nyiuk a̱ka̱fa ma̱ng á̱nyiuk ba̱ nyia̱ na̱mbwon mman na̱ nwaai mi̱ njen a̱ja a̱ni! 20Nyi naai A̱gwaza gu beang chung nyin ji, ji̱ yok bai mi̱ jen shyishyim, ku a̱tuk Mam Fwung ka bah.

21“Mat mi̱ njen a̱ja ja, á̱ na nyia̱ a̱gba̱ndang swuo a̱bung tangka̱i hu nang á̱ ka̱n mak swuo a̱ni bah, neet di̱n jen nang á̱ mmat swanta hu a̱ni, ba̱ng ba̱ tat a̱fwun. A̱wot da̱ mba, á̱ bu na swuo tangka̱i a̱bung a̱hwa bah! 22Ka̱ á̱ wa ghyuai á̱ka̱tuk mam a̱nia bah, si̱ á̱ mbyia̱ a̱tyu a̱ na shot a̱ni bah. A̱wot mat á̱niet ba nang A̱gwaza khai a̱ni, bibya mbyia̱ á̱ nghyuai mam a̱nia.

23“Di̱n jen a̱ja, ka̱ a̱yin nyia̱ ma̱ng a̱nyin, ‘Nyi li, di A̱gwam Kristi wa wu!’ Ma a̱nia wa, kee a̱ bu nyia̱, ‘Nyi li, di nggu wa waau!’ Nyi yok nwuak a̱chuchuk bah. 24Mat á̱niet bwoi a̱ka̱laa ba̱ kyiak nyia̱ bibya yet A̱tyoli Kristi, ma̱ng á̱ghyang á̱niet ba̱ kyiak nyia̱ bibya yet á̱tsak a̱yaata̱m a̱kwonu A̱gwaza, na ghwut kpa̱sai. Ba̱ na nyia̱ nkyang a̱ri̱bi̱di ma̱ng nkyang a̱ga̱de. A̱wot ka̱ ba̱ shya̱ a̱wat ka, ba̱ na laai ku á̱niet nang A̱gwaza khai a̱ni. 25Di la! N mi̱ ntak nyin lap nang jen ji ka̱n bai bah. 26Mat a̱nia, ka̱ a̱yin nyia̱ ma̱ng a̱nyin, ‘Di, Kristi wu wa waau mi̱ ntswa a̱yit!’ Ku a̱ nyia̱, ‘Di nggu wa ta̱kup mi̱ ntswa nyuo!’ Nyi yok nwuak a̱chuchuk bah.

Yesu na Bwuok a̱ Bai mi̱ Swanta

27“Ma̱nang á̱ ni̱ ndi a̱mya̱ra̱m za gu neet a̱tyin si̱ nat jenshyung a̱ni, ma a̱nia wa Nggwon A̱tyubishyi bye mbwuok a̱ bai kpa̱sai mi̱ swanta hu. 28Tyan nang á̱ ndi á̱nggulu ba ntung a̱ni, ku tak nang nkwom myian a̱ja.#24:28 Wa̱i a̱lyiat: Ma̱nang á̱nggulu ni̱ ntung ku tak nang nkwom nshya̱ kpa̱mkpaan a̱ni, ma a̱nia wa, nkyang a̱lama nani na ntak nang ngaan jen wu mbai kpa̱mkpaan a̱ni.

29“Mi̱ di̱ yong a̱hwa, nang a̱gba̱ndang swuo a̱bung wu nswak a̱ni, ku na bai da̱ a̱nu ka ma̱ cha̱chaat nang á̱ ku ndyuut a̱ni nyia̱,

‘A̱nu mam ka na kin nyiip a̱ tyia̱ lyin.

Ma a̱nia wa zwat ji na sai bah.

Á̱ta̱ngwat na na shyot á̱ kwa̱i neet mi̱ kyai tswazwa.

A̱wot a̱mgba̱m a̱cha̱chet nkyang na̱ shya̱ mi̱ kyai tswazwa hu a̱ni,

á̱ na zwun naa.’#24:29 Ish 13:10; 34:4; Jos 2:10.

30“Di̱ ngaan jen a̱wa wa nang kyang a̱ga̱de a̱ yet a̱lama bwuok bai Nggwon A̱tyubishyi na nghwut kpa̱sai mi̱ kyai tswazwa hu. A̱wot a̱mgba̱m nnwap bibyin swanta na, na kpa̱t bwak á̱pyia̱ mat a̱gba̱ndang byian fwuo. A̱wot ba̱ na li Nggwon A̱tyubishyi ka̱ bwuot a̱ neet a̱ chobai ma̱ á̱ni̱nian ma̱ng a̱gba̱ndang chet ma̱ng shi.#24:30 Dan 7:13. 31A̱wot a̱ na ta̱m ma̱ng a̱yaata̱m tswá nggu ba ma̱ng tyiap a̱gwa ka̱ byia̱ a̱gba̱ndang a̱nwuat a̱ni. A̱wot ba̱ na tung á̱niet nang gu khai a̱ni dundung mi̱ swanta hu, neet di̱ nggak nfam naai swanta nani, si̱ nat si̱ hu niau.#24:31 Lyuut cha̱chaat: “Neet mi̱ ngwun naai na̱ shya̱ kyai tswazwa hu a̱ni si̱ nat di̱ nggak huniaau.”

Kidee tazwa A̱kwon A̱bwabwap

(Ma̱r 13:28-31; Luk 21:29-33)

32“Nyi myiam kyang di̱ kidee a̱kwon a̱bwabwap ji: Jen ji nang nyi ndi mbwak a̱kwon na ta̱kut. A̱wot a̱kyikyo ba si̱ nwuo fuut a̱ni, nyi fi̱k nang a̱kwa̱i ka mbai kpa̱mkpaan. 33Ma a̱nia wa, ka̱ nyi li a̱mgba̱m nkyang a̱ga̱de nani bai, nyi lyen nang jen bwuok Nggwon A̱tyubishyi ji mbai kpa̱mkpaan. Ji̱ shya̱ gba̱gba̱k. 34N tak nyin a̱tsak a̱lyiat, che huni na swak bah, si̱ nang nkyang a̱ga̱de nani bai da̱ a̱nu ka. 35Kyai tswazwa ma̱ng a̱byin na kuut. A̱wot a̱lyiat nung na si̱ mi̱n mak kwa a̱byin bah.

Ku Myim Á̱niet Khwi ba̱ Swan á̱ Fwuong Bwuok Yesu hu

(Ma̱r 13:32-37; Luk 17:26-30,34-36)

36“A̱wot tazwa mam a̱hwa ku jen ji gu na mbwuok a̱ni, á̱ mbyia̱ a̱tyu a̱ lyen jen ji a̱ni bah, ku a̱yaata̱m tswá A̱gwaza ba, ba̱ shya̱ Ma A̱gwaza tswazwa ka a̱ni, mbeang Nggwon A̱gwaza ka#24:36 Lyuut ghyang mbyia̱: “Mbeang Nggwon A̱gwaza ka” bah., ba̱ lyen bah. Si̱ ma̱ A̱tyia̱ wu ma̱nyin gu, nggu wa lyen.

37“A̱wot ma̱nang hu ku ndi mi̱ njen Nuhu ji gbangbang a̱ni, ma a̱nia wa bwuok Nggwon A̱tyubishyi hu na ndi. 38Mi̱ njen a̱ja gbangbang, nang a̱gba̱ndang a̱sa̱khwot nza wu ka̱m bai bah, á̱niet swanta ba si̱ ya a̱son ma̱ng ya á̱ tsa nswuo ma̱ng song. Ba̱ si̱ bwoi á̱nyiuk, á̱ tsa tyei á̱nyiuk nyeang ma̱nang ba̱ mmeang a̱ni, ba̱ng si̱ tat a̱tuk nang Nuhu nnwuo a̱gba̱ndang kukwon a̱wak wu nang A̱gwaza ku tyia̱ nggu a̱ si̱ shap a̱ni. 39A̱wot á̱niet ba ku lyen kyang ku na bai a̱ni bah, si̱ nang a̱gba̱ndang a̱sa̱khwot nza wu mbai mba di̱ mi̱ lyen. Na̱ si̱ kyuak mba a̱mgba̱m, ba̱ si̱ ta̱lyip. Ma a̱nia wa bwuok Nggwon A̱tyubishyi hu na ndi.

40“Á̱tyok a̱feang na shya̱ di̱ khap dundung ma̱ a̱byin. Á̱ na kyiak a̱tyo nyiung, á̱ ghwon a̱tyo nyiung wu. 41Ma a̱nia wa, á̱nyiuk a̱feang na̱ shya̱ di̱ kwang yak mi̱ naan. Á̱ na kyiak a̱tyo nyiung, á̱ ghwon a̱tyo nyiung.

42“Mat a̱nia, nyin meang, si̱ nyi swan fwuong ma̱ng la̱p vam. Mat, nyi lyen jen ji nang A̱tyoli nyin wu na mbwuok a̱ bai a̱ni bah. 43A̱wot ku myim nyi fi̱k kidee jini: Ka̱ a̱tyoli wa si̱ mi̱ ndyen a̱cha̱chaat jen nang a̱tang nchobai tsang a̱gbang nggu a̱tyetuk a̱ni, si̱ a̱tyoli wu na swan ka̱tsak a̱ cham. Kalak a̱ shim a̱tang wu a̱ du ngam nggu nyuo a̱mali di̱ mi̱ lyen. 44Ma a̱nia wa, nyin meang ku yet ta hwa, nyi swan cham ma̱ng la̱p vam ku zang jen. Mat Nggwon A̱tyubishyi ka na bwuok a̱ bai di̱n jen nang nyi ndyen a̱ni bah.

Kidee A̱tsotswat A̱khwo ma̱ng A̱ka̱tuk A̱khwo

(Luk 12:41-48)

45“A̱tsotswat a̱khwo a̱ byia̱ mumwang a̱ni, nggu wa nang a̱tyoli nggu wu ni̱ tyei gu yet a̱kwak a̱son á̱kum á̱khwo ka. A̱wot a̱ bu ka̱u mba nkyayak ma̱ cha̱chaat njen wu. 46Ka̱ a̱tyoli wu bwuok a̱ bai, a̱wot a̱ si̱ shya̱ nang a̱khwo nggu wu swan a̱ cham a̱ nyia̱ a̱tan nta̱m, a̱tyoli wu na fa̱k nyinyang a̱khwo wu. A̱wot a̱ tan nggu zang. 47N tak nyin a̱tsak a̱lyiat, a̱tyoli wu na tyia̱ a̱mgba̱m nkyang nang gu byia̱ a̱ni mbwak a̱khwo a̱wa.

48“Da̱ a̱kwonu a̱kya, ka̱ a̱khwo wu yet a̱ka̱tuk a̱yin wa, a̱ na nyia̱ mami fwuo nggu, ‘A̱tyoli nung wu na bwuok a̱nggang bah, a̱ na labeang!’ 49A̱wot a̱ si̱ ta̱bat tsot á̱kpa̱ndang ta̱m nggu ba. A̱ si̱ byian njen di̱ ya a̱ tsa nswuo ma̱ng á̱niet hyeng a̱kan á̱ghyang. 50A̱tyoli a̱khwo a̱wa na bwuok a̱ bai ma a̱nggang, di̱n jen nang a̱khwo wu ntyia̱ fwuo a̱tyoli wu na bwuok a̱ni bah. 51A̱wot a̱tyoli wu na kpi̱ri̱p a̱khwo a̱wa di̱ chunchong. A̱ bu tyia̱ gu swuo a̱bung ndung ma̱ng a̱yaabang a̱byin. A̱ja wa ba̱ na ntwei á̱ tsa nywai a̱nyunyung mat fa̱k a̱khwu.”

Currently Selected:

Matyu 24: TyapNT

Highlight

Copy