Jenesis 16
16
Hega mo Ismael
1Nao kam kasem taem ya, Sarae ya we i woman blong Ebram, hem i no bonem wan pikinini nating. Be i gat wan woman slef* blong hem i stap, we i woman Ijip, nem blong hem Hega. 2Nao Sarae i talem long Ebram se, “Kam kasem naoia, Hae God i stap blokem mi, blong mi no bonem pikinini. Mi mi ting se i gud yu go stap wetem woman slef ya blong mi. Maet hem i save bonem wan pikinini blong mi.” Mo Ebram i agri long tok ya blong hem. 3Nao Sarae i letem Hega i go stap wetem Ebram, olsem wan narafala woman blong hem. Ol samting ya i kamtru long taem ya we Ebram i stap ten yia finis long kantri ya Kenan.* 4Ale, Hega i stap wetem Ebram gogo, nao hem i gat bel. Mo taem hem i save we hem i gat bel, tingting blong hem i go antap tumas, nao oltaem hem i stap lukluk rabis long Sarae.
5Nao Sarae i talem long Ebram se, “!Ebram! Woman ya i stap mekem i nogud tumas long mi, be i fol blong yu nomo. Mi mi sanem hem i go stap wetem yu, be taem hem i save we hem i gat bel, tingting blong hem i go antap tumas, nao oltaem, hem i stap lukluk rabis nomo long mi. I gud Hae God i jajem yumitufala, i soemaot se hu long yumitufala i rong.”
6Be Ebram i talem long hem se, “Woman slef ya i blong yu, mo hem i stap long han blong yu nomo. Yu save mekem long hem olsem we yu yu wantem.” Nao Sarae i stap mekem i strong tumas long Hega, gogo Hega i girap, i ronwe.
7Hem i go stap long draeples, long wan springwota we i stap long rod blong go long Suru long saot. Nao enjel* blong Hae God i kam faenem hem long ples ya, 8mo i askem long hem se, “!Hega! ?Yu kam wea? ?Mo yu stap go wea? !Yu yu woman slef blong Sarae ya!”
Mo Hega i talem se, “Mi mi stap ronwe long misis blong mi.”
9Be enjel ya i talem long hem se, “Yu mas gobak long hem. Yu mas kam slef blong hem bakegen. 10Ol pikinini we bambae oli kamaot biaen long yu, bambae mi mi mekem we oli kam plante tumas, we man i no save kaontem olgeta. 11Naoia yu yu gat bel, mo bambae yu bonem wan pikinini boe blong yu. Yu mas putum nem blong hem se Ismael we i min se “God i stap harem man we i krae”, from we yu yu harem nogud, nao yu krae i go long Hae God, mo hem i harem yu. 12Be pikinini ya blong yu bambae i olsem wan wael dongki. Hem bambae i agens long evri man, mo evri man bambae oli agens long hem. Bambae hem i stap hem wan, longwe long ol famle blong hem.”
13Nao Hega i stap tingting se, “!Maewad! !Mi mi luk God ya, be mi no ded! !Mi stap yet blong talemaot!” Nao Hega i putum narafala nem blong Hae God se “Eleroe” we i min se “God i stap lukluk mi,” from we God i toktok long hem. 14Taswe, kam kasem tede, ol man oli stap talem springwota ya long medel blong tufala taon ya Kades mo Bered se “Berelahaeroe”, we i min se “God i laef, i stap lukluk mi, mo springwota ya i blong hem.”
15 #
Gal 4.22
Nao biaen, Hega i bonem wan pikinini boe blong Ebram, mo Ebram i putum nem blong hem se Ismael. 16Long taem ya, Ebram i gat eiti sikis yia blong hem.
Currently Selected:
Jenesis 16: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
