Jenesis 35

God i blesem Jekob long Betel

1 # Jen 28.11-17 Nao God i talem long Jekob* se, “Jekob. Bifo, long taem ya we yu stap ronwe long brata blong yu Esao, mi mi kamtru long yu long Betel. Naoia, yu yu mas gobak long ples ya, blong mekem ples blong yu long hem. Mo long ples ya, yu mas wokem wan olta blong mekem wosip long mi.”

2Nao Jekob i talem long tufala woman blong hem wetem ol pikinini blong hem mo olgeta we oli stap wetem hem se, “Yufala i mas sakemaot ol god ya blong ol narafala kantri, we yufala i gat long ol haos blong yufala. Yufala i mas mekem yufala i klin long fes blong God, mo yufala i mas putum ol klin klos. 3Bambae yumi aot long ples ya, yumi go stap long ples ya Betel, mo long ples ya, bambae mi mi wokem wan olta blong mekem wosip long hem. Oltaem, taem mi gat trabol, hem i stap givhan long mi, mo i stap kampani wetem mi long evri ples we mi mi pas long hem.”

4Nao oli go tekem olgeta god ya blong ol narafala kantri, mo oli tekemaot ol iaring blong olgeta tu we oli putum, nao oli tekem olgeta samting ya i kam, oli givim long hem. Nao hem i go berem olgeta long stamba blong oktri* ya long Sekem.

5Nao olgeta oli aot long ples ya, mo taem oli wokbaot, i no gat man i biaen long olgeta blong ronem olgeta, from we God i mekem olgeta man blong ol taon raonabaot oli fraet tumas long olgeta. 6Nao oli kamtru long taon ya Lus, we hemia i olfala nem blong Betel, long kantri ya Kenan* yet. 7Nao hem i wokem wan olta long ples ya, mo i putum nem blong ples ya se El Betel, we i min se “God blong Betel,” from we bifo, long taem ya we hem i stap ronwe long brata blong hem, God i bin kamtru long hem long ples ya.

8Nao long ples ya, olfala woman ya Debora i ded, mo olgeta oli berem hem long stamba blong wan oktri klosap long Betel saed i go long saot. From samting ya, oli putum nem blong oktri ya se Alonbakut, we i min se “Oktri ya long ples blong krae.” Olfala ya i bin lukaot long Rebeka, woman ya blong Aesak long taem ya we Rebeka i pikinini yet.

9Long taem ya we Jekob i aot long Mesopotemia, i stap kambak long ples blong hem, God i kamtru long hem bakegen, i blesem hem, 10#Jen 32.28mo i talem long hem se, “Naoia nem blong yu Jekob, be i stat naoia, bambae nem blong yu Isrel.*” Nao long fasin ya, God i putum nem blong hem se Isrel, 11#Jen 17.4-8mo i talem long hem se, “Mi mi God mo mi gat olgeta paoa. Yu yu mas gat plante pikinini we bambae oli kamaot biaen long yu. Yu bambae yu stamba blong ol man blong plante ples, mo bambae i gat ol king tu oli kamaot biaen long yu. 12Graon ya we bifo mi mi promes long Ebraham mo long Aesak, se bambae mi givim long olgeta we bambae oli kamaot biaen long tufala, naoia mi promes long yu bakegen, se bambae mi givim long olgeta we bambae oli kamaot biaen long yu.”

13Nao God i aot long hem bakegen. 14#Jen 28.18,19Mo hem i stanemap wan ston bakegen long ples ya, mo i kafsaedem waen mo olifoel* i go long hem blong makemaot se i tabu, i memori blong taem ya we God i toktok wetem hem. 15Mo hem i putum nem blong ples ya bakegen se Betel.

Rejel i ded

16Nao Jekob* wetem ol pikinini blong hem oli aot long Betel, oli wokbaot blong go long ples ya Efrat. Be taem oli stap longwe long hem yet, Rejel i harem se bambae i bonem pikinini blong hem. Be hem i gat trabol, we pikinini i no save bon kwik. 17Nao long taem ya we hem i stap harem nogud tumas, woman we i stap givhan long hem i luk pikinini ya, nao i talem se, “!Rejel! !Wan boe bakegen ya! !Yu no harem nogud!” 18Be taem pikinini ya i bon, Rejel klosap i ded, nao i putum nem blong pikinini ya se Benoni, we i min se “Pikinini we mi trabol long hem”. Nao taem hem i putum nem blong pikinini ya finis, hem i ded. Be biaen, papa blong pikinini ya i putum narafala nem blong hem se Benjamin.#35.18: Benjamin. Long lanwis ya Hibru, nem ya i save min se “Pikinini we bambae i kasem gudfala laef”, mo i save min tu se “Pikinini we i man blong saot”.

19Hemia nao fasin we Rejel i ded. Mo olgeta oli berem hem long saed blong rod we i go long ples ya Efrat, we naoia oli kolem Betlehem. 20Nao man blong hem i stanemap wan ston long ples ya blong mekem memori blong hem, mo ston ya i stap makem gref ya, kam kasem tede.

21Nao Jekob olgeta oli aot long ples ya, oli wokbaot i go long saot, gogo oli bitim wajhaos* ya long ples ya Eda. Nao oli mekem ples blong olgeta long ples ya. 22#Jen 49.4Mo taem oli stap long ples ya, Ruben* i go slip wetem woman slef ya Bilhaha, we i narafala woman blong papa blong hem. Mo taem papa blong hem i harem nius blong samting ya, hem i kros we i kros.#35.22: Tok ya i folem olfala translesen blong Oltesteman long lanwis blong ol man Gris bifo, we i kamaot long olfala Oltesteman long lanwis ya Hibru, be long Oltesteman long Hibru we i stap tede, tok ya long seken haf blong ves ya i olsem. Mo papa blong hem i harem nius blong samting ya.

Ol pikinini blong Jekob

Nao Jekob* ya i gat twelef pikinini boe blong hem. 23Ol pikinini blong Lea, i gat Ruben,* we i fasbon blong Jekob, mo Simeon,* mo Livae,* mo Juda,* mo Isakara,* mo Sebulun.* 24Mo ol pikinini blong Rejel, i gat Josef, mo Benjamin.* 25Mo ol pikinini blong Bilhaha we i woman slef blong Rejel, i gat Dan,* mo Naftali.* 26Mo ol pikinini blong Silpa we i woman slef blong Lea, i gat Gad,* mo Asere.* Ol pikinini ya oli bon#35.26: Benjamin nomo i no bon long Mesopotemia. Mama blong hem i gat bel long hem long ples ya, be i bonem hem long Kenan. long kantri ya Mesopotemia.

Aesak i ded

27 # Jen 13.18 Nao Jekob* i go kasem ples ya Kiriataba, we naoia nem blong hem Hebron, we i klosap long Mamre. Hemia ples ya we bifo, Ebraham, bubu blong hem i stap long hem, mo biaen, Aesak, papa blong hem i stap long hem. Nao long taem ya, hem i go stap wetem papa blong hem.

28-29Nao Aesak i stap gogo i olfala we i olfala, nao hem i ded, i go stap wetem ol olfala bubu blong hem bifo, we oli ded finis. Mo taem hem i ded, hem i gat wan handred eiti yia blong hem. Nao tufala pikinini blong hem, Esao mo Jekob, tufala i berem hem.

Currently Selected:

Jenesis 35: BBR

Highlight

Copy