Exodo 12
12
Imiyunaꞌaw it Ampuꞌang Diyus i pabetang-betang baw pamwat it pagkaraꞌnen it pangaranat Tiyaꞌliban
1Inaat it AMPUꞌANG DIYUS it ki Moises baw si Aaron duꞌun it Egipto, 2“Itu ngaytu nga bulan i ipabetang mi nat uꞌnang bulan it sang taꞌun. 3Isugid mi duꞌut kadakel it mga Israelita, nga itu na ngaytu i buwaten nira kat ikasang puluꞌ na nga aldaw it uꞌna ngaytung bulan. Kada lalaki, misiꞌ kanya it esang uꞌuybun nga tupa, nga sang siraan na magꞌaꞌanak i pagꞌargan kaytu. Kada sang kabalayan, sangbat nga uꞌuybun it tupa. 4Temed iyan mga pamalay-balay nga kurang i mga taw duꞌun ka ega maꞌubus niray sangbat nga tupa, kaꞌilangan magsagpu-sagpunun na lamang sira duꞌut in aring balay i kurang gasiꞌ isaꞌun sangbat ngayti, maꞌubus. Kidar-kidaren mi it magayen isaꞌun tamaꞌ i kadakel it kumaꞌen it kada uꞌuybun nga tupa. 5Mga piliꞌen mi nga ramu-ramu, kaꞌilangan mga lalaki lamang, magꞌidad it sang taꞌun, baw talagang egay maski unu nga mintiraꞌ it bilug. Mapakay nay maski tupa u kambing. 6Arigraen mi nat magayen seked it ikasang puluꞌ may epat nga aldaw it bulan ngaytu. Bawnga in magsedep nay aldaw it iti nga aldaw, imatayen na sira it kadakel it mga Israelita. 7Pagkaꞌimatay nira, buwaten it kada esa, manu it duguꞌ ka paꞌidan i ayun kat dibwat nga papasꞌanan it talaꞌep baw tukdug nga duwa nga piyakpetan it talaꞌep baw kat aꞌabriyan ya, in ari-aring balay i pagkaraꞌnenan kaytu. 8Iti naga nga delem, kaꞌilangan iyawun niray karniꞌ it uꞌuybun ngayti bawnga kaꞌnen. Beken gasiꞌ nga kaꞌnen nira, mapaꞌit nga inglay baw tinapay nga egay ipagpaꞌalsa. 9Ayaw it may kaꞌen it egenen nga karniꞌ it uꞌuybun ngaytu. Baw pangilutuꞌ, ega lepaꞌen. Kaꞌilangan uyubun mi i pangiyaw, baw egay ginisen nga bilug ya, uyut naga i kumpur seled. 10Egay ipaꞌped mi nga paꞌaldawan. In may ega maꞌubus mi it kakaꞌen, kaꞌilangan antengen mi. 11Ta, atkaytu na i kabetangan mi it magkaraꞌnen. Magpapakay kamu na nga lagi it pamamanaw nga pakayan. Magtatalumpaꞌ na baw pagseskelen nay sungkud. Dali-daliꞌen mi it kumaꞌen. Pangaran it itu nga pagkaraꞌnen, Tiyaꞌliban it AMPUꞌANG DIYUS.
12Kat iti naga nga delem, lekpen ku na i banwa nga Egipto. Imatayen ku nay kada panganay nira, taw, ramu-ramu, baw betanganan ku na it ukuman i muꞌsang mga pagbete-beteꞌen nga diyus duꞌun it Egipto. Aku ngaytu i AMPUꞌANG DIYUS. 13Duguꞌ ngayan nga duꞌun it mga salakwatan it balay mi, iyan i buwaten nga imandaꞌan it duꞌun kamu. Sabap in maltegan ku i duguꞌ ngayan, taꞌliban kuy taw ya sikayan it iyan nga balay. Daꞌkamu kaꞌuyut it buwaten ku ngaytu nga panriga ku it taga Egipto.
14Baw iti nagang aldaw i ipagpistaꞌ mi magtungtung-magꞌinapuꞌ. Ka pistaꞌ mi ngaytu situt aken nga AMPUꞌANG DIYUS i ipagpademdem it imyu it binwat ku ngaytu. Kaꞌilangan atkaytu i buwaten mi it seked maꞌlay nga banar.”
Munaꞌaw pasar it Pistaꞌ it Tinapay nga Egay Ipagpaꞌalsa
15Inaat paꞌ it AMPUꞌANG DIYUS, “Seledat pitung aldaw, yanay pagkaꞌnen mi, tinapay nga egay ipagpaꞌalsa. Aypaꞌ kat uꞌnang aldaw, awaꞌen mi i muꞌsang ipagpaꞌalsa duꞌut mga balay mi. Ka in siyuy kumaꞌen it may ipagpaꞌalsa it seledat pitu ngaytung aldaw, ipabetang kanya nga ega na Israelita. 16Uꞌnang aldaw it pistaꞌ ngaytu, nga yay magsunud it kiyaꞌen nay uꞌuybun it tupa ngayti, magtiꞌmes-tiꞌmes kamu nga muꞌsa nga sumamba it aken. Atkayan nagay buwaten mi kat ikapitung aldaw it pistaꞌ. Baw beken, seledat pitu ngaytung aldaw, egay pagbuwaten mi nga maski unu nga buwat, in daꞌga magsimpan lamang it pagkaꞌnen.
17Pistaꞌ ngaytu it Tinapay nga Egay Ipagpaꞌalsa i pagbuwaten mi magtungtung-magꞌinapuꞌ, sabap itu ngaytu nga aldaw i ipiyaliꞌwan ku it kadakel mi asan it Egipto.”
Basta maltegan it Ampuꞌang Diyus i magpapaꞌid nga duguꞌ it uꞌuybun it tupa, taꞌliban yay iyan nga balay
21Tiniꞌmes na ni Moises i mga ginuꞌu it mga Israelita ka inaat ya na sira. Maat ya, “Buwaten mi, mamiliꞌ kamu it mga uꞌuybun it tupa u kambing. Mapiliꞌ mi ngaytu, imatayen mi ka kaꞌnen mi nga sang anakan. Mga uꞌuybun ngaytu nga ipanalisi, ipagpistaꞌ tami it Tiyaꞌliban ngaytu it AMPUꞌANG DIYUS. 22Baw itu pay beken nga buwaten mi, manu kamu it pungru-pungru it isopo, ka itu ngaytu, itulsuk mi duꞌut duguꞌ it inimatay mi ngaytu nga uꞌuybun nga magbebtang duꞌut karung bawnga paꞌidan mi nay ayun kat dibwat nga papasꞌanan it talaꞌep baw tukdug nga duwa nga piyakpetan it talaꞌep baw kat aꞌabriyan ya. Kaꞌilangan egay maski siyu it imyu nga manliꞌwan basta ega paꞌ maꞌyag. 23Ka in manlekep-lekep nay AMPUꞌANG DIYUS it muꞌsang Egipto, ka pangimatayen ya nay kumpur panganay it mga taga Egipto, basta maltegan ya nga may magpapaꞌid nga duguꞌ duꞌun it salakwatan, taꞌliban yay iyan nga balay. Ega palugtan ya it semled i anghil nga mamumuuꞌ.
24Baw mga munaꞌaw ngaytu, kaꞌilangan pagsunudun mi nga pirmi magtungtung-magꞌinapuꞌ. 25In duꞌun kamu nat banwa ngayti nga isiyanggup it AMPUꞌANG DIYUS it imyu, buwaten mi nagayan i atkaytu. 26Baw in ingkutun kamu it mga anak mi in unuka atkaytu i pagbuwaten mi, 27itubag mi it kanira nga, ‘Pagꞌimatayen ngaytu nga uꞌuybun it tupa, nga ipagpistaꞌ it Pistaꞌ it Tiyaꞌliban, ipagsamba tami it AMPUꞌANG DIYUS. Sabap tiyaꞌliban ya i mga balay it mga Israelita duꞌut Egipto, iyan inimatay yay mga panganay it mga taga Egipto.’”
Pagkatupus it inaat ngayti ni Moises, nanluud nay mga Israelita ngayti ka simnamba na it AMPUꞌANG DIYUS. 28Bawnga siyunud nira it magayen i ipiyagꞌurdin ngayti it AMPUꞌANG DIYUS nga ipiyagꞌusay na Moises it kanira.
Namagpatay nay mga panganay duꞌut Egipto
29Ta desang lubuk it delem, inimatay na nga matuud it AMPUꞌANG DIYUS i mga panganay duꞌut Egipto, garing it anak nga panganay it adiꞌ ngayti seked it panganay it maski pirisu duꞌut pirisuwan, pati panganay it mga ayep, uyut gasiꞌ. 30Unupat iting delem, nasulang-sulang nay igaꞌ it adiꞌ ngayti, igaꞌ it mga katimbang ya baw muꞌsang mga taga Egipto. Talagang paꞌari-ari may maggarwak. Magkasgawan it mga taga Egipto ngayti, daꞌgay-daꞌga balay nga may miyatay.
31Ta, it miyatkayti na, ipiyapisiꞌ it adiꞌ si Moises baw si Aaron it delemen paꞌ. Maat ya, “Sigi, limꞌid kamu nang mga Israelita situt banwa namen. Mapanaw kamu na kayti. Manamba kamu nat AMPUꞌANG DIYUS, subung nat paꞌaaten mi ngayan it kaꞌlay ngaytu. 32Tabanen mi naga i muꞌsang mga ayep mi. Sigi, mapanaw kamu na. Baw ipanalangin mi naga aku duꞌut AMPUꞌANG DIYUS nga ildawan ya naga aku.”
Gimnaring nay mga Israelita duꞌut Egipto
[Mga 1462 B.C.]
33Inereg-ereg nat mga taga Egipto i panaw it mga Israelita isaꞌun makalꞌid sira it madaliꞌ duꞌut Egipto ngayti. “Ka in daꞌkamu paꞌ magliꞌid,” maat nira, “mapuuꞌ kami na talaga!” 34Aypaꞌ naꞌereg-eregan it pagdawa-dawaꞌ i mga Israelita ngayti. Iyan maat buwaten nira nga tinapay, ega paꞌ naragiꞌan it ipagpaꞌalsa, baw ega paꞌ naꞌawaꞌ duꞌun it bubwatan. Biyuꞌtungan na nira it rambay ka pinirisiꞌen nat namagpanaw ngayti. 35Siyunud gasiꞌ it mga Israelita i beken nga inaat ni Moises ka miyangut sira duꞌut mga taga Egipto it mga bagay nga bulawan baw pirak i binwat, baw pakayan gasiꞌ. 36Piyagalang it AMPUꞌANG DIYUS i mga taga Egipto it mga Israelita, aypaꞌ kumpur inangut, ipiyagbegay nira. Subuk riyangpasan i mga taga Egipto.
37Ta, napanaw nay mga Israelita, garing duꞌut Rameses, nakaꞌbut sira duꞌut Sucot. Talagang ega magbugtuꞌ i bulyug it mamagpanaw ngayti, ka in mga lalaki lamang i bilangen, may mga enem nga gatus nga ribu, puyray mga babay baw mangaꞌwaꞌ.
Mga ipiyagꞌurdin pasar it in siyu i kapakiragiꞌ it Pistaꞌ ngaytit Tiyaꞌliban
43Inaat it AMPUꞌANG DIYUS si Moises baw si Aaron, nga maat ya, “Itu ngaytu i mga urdin ku pasar it pagkaraꞌnen nga pagpangaranan it Pistaꞌ it Tiyaꞌliban. Ayaw it may pakiragiꞌ u pakikaꞌen basta ega Israelita. 44Temed in may inalang mi nga mga uripen, mapakay na nga kumaꞌen sira, basta tiyuriꞌan na, ka seled nat pamalay-balay mi. 45Temed basta dayuꞌan, ega mapakay nga kumaꞌen kaytu, maski urnal mi na.
46Baw kaꞌilangan nga duꞌun gat seled it balay i mapagkaraꞌnenan mi it karniꞌ ngaytu. Baw maski sang isnik, egay tabanen duꞌut liꞌwan. Mga tuꞌlang ya, egay peꞌteken mi nga maski sangbat. 47Kaꞌilangan nga pagkaraꞌnen ngaytu, buwaten it muꞌsang mga Israelita.
48Takaꞌ gasiꞌ in beteꞌ may taw nga ega Israelita nga nagpakibanwa na asat imyu nga kupaꞌuyut kanya it itung pagkaraꞌnen nga Pistaꞌ ngaytu it Tiyaꞌliban, mapakay basta turiꞌ na sira nga muꞌsang mga lalaki kat seled it iyan nga pamalay-balay. Ka in turiꞌ na sira, kabilangan nira subung na it mga Israelita. Temed talagang ega mapakay i kumaꞌen kaytu basta ega turiꞌ. 49Talagang sakep tu i muꞌsa it itung urdin, maski manengteng nga Israelita u dayuꞌan nga nagpakibanwa asan it imyu.”
50Ta, siyunud nga matuud it muꞌsang mga Israelita i kumpur ipiyagꞌurdin ngayti it AMPUꞌANG DIYUS nga inusay ngayti na Moises, duwa ni Aaron. 51Kat iti nagang aldaw, ipiyaliꞌwan it AMPUꞌANG DIYUS i mga Israelita duꞌun it Egipto.
Currently Selected:
Exodo 12: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
