Exodo 14
14
Tiyundug naga it mga taga Egipto i mga Israelita ngayti
5Pagkasugid duꞌun it adiꞌ ngaytit Egipto nga miyalagyu na nga matuud i mga Israelita, nagbaꞌgu siꞌ i pikir ya, atnagay kat mga katimbang ya. Maamaatan sira, “Unu bay nabuwa-buwat ta ngaytu nga atkaytu nga ipiyasugu-sugut tat magliꞌid i mga Israelita? Ta yan siyu paꞌ sadaw i mga uripen ta?” 6Aypaꞌ ipiyadali-daliꞌ it adiꞌ ngayti it paꞌasikasu i sarakayan yat magpakibunuꞌ, pati kat mga sundaluꞌ ya. 7Taban yay muꞌsang natiꞌmes ya nga sarakayan it mga taga Egipto in magpakibunuꞌ, pati enem nga gatus nga piyakamagayen. Kada sang kasarakayanan, may magsasakay nga duwang kasundaluꞌan baw sang kataawan nga pagbayaꞌen nira.#14:7 Kat Hinebreo maat, “Kada sang kasarakayanan may magsasakay nga ikatlung taw.” Kat pasepsep it beken nga mapipikir, mga ikatlu ngaytu, pagbayaꞌen it kaꞌibaan ya nga duwa. 8Piyaꞌuliꞌnan siꞌ it AMPUꞌANG DIYUS i pagmategas it adiꞌ ngayti. Egay beken, inusig ya nagay mga Israelita ngayti nga duꞌun nat pagpanawan nira, nga mamagsasagyay magpanaw. 9Miyusig nagang matuud i mga taga Egipto ngayti, yanayti mga sundaluꞌ it adiꞌ nga mamagsasakay it sarakayan baw iyan mga mangangabayuꞌ. Naꞌbutan i mga Israelita ngayti nga mamagbabalay-balay duꞌut tambing it dagat, adeꞌdeng it Pi-hahirot, nga patuꞌ it Baal-zefon.
10Naꞌubu-ubus i iꞌlam it mga Israelita ngayti, pagkalawag nira it mamagꞌaꞌabut ngayti nga mga taga Egipto. Nakapangabang sira duꞌun it AMPUꞌANG DIYUS. 11Baw ta, si Moises na ngayti, tiyemek-temek nira nga magꞌaat, “Salaꞌ muytu! Unu, ega nay malbengan it amen duꞌut Egipto, aypaꞌ ka tiyaban mu na kami situt kapupuyangtan ngaytung rugar, nga sikaytu nay patayan nameng muꞌsa? Ta letganan mu kaytu! In daꞌkami paꞌ riniwak-riwak mu duꞌun it Egipto, ega atkaytuy mabetangan namen. 12Daꞌga basaꞌan inaat namen ngayan it imu duꞌut Egipto nga daꞌkami na riwak-riwaken mu? Pataꞌnan mu na lamang kaming uripen-manguripen it mga taga Egipto. Sabap magayen pay maneꞌteꞌ kami nga uripen, ega gat matay sikaytung rugar!”
13Katubag si Moises it kadakel ngayti, maat ya, “Ayaw kamu bat iꞌlam. Gayen-gayenen mi i nakem mi. Elaten mi na lamang in magꞌuꞌunu i panribri it AMPUꞌANG DIYUS it imyu kayti. Yay matuud, ega nayan maltegan mi it sumaꞌup i mga taga Egipto ngayan. 14Iyan AMPUꞌANG DIYUS i pakilaban it kanira nga batuꞌan ya kamu. Ega yay imyu nga buwaten nga maski unu.”
Nagpabalantang nga napraan i piyanawan it mga Israelita temed nalmes i mga taga Egipto ngayti nga mamagꞌusig
19Ta, binwat it anghil nga riyumraan it Ampuꞌang Diyus nga manguꞌna it panaw it mga Israelita ngayti, nagpaꞌugad na duꞌun it talikudan nira. Pati magtitindeg ngayti nga subuk kunum, nagpaꞌugad gasiꞌ duꞌun. 20Yanayti i bilang miyarbeng duꞌut piyagtengaꞌan it mga taga Egipto baw mga Israelita. Ayun duꞌut mga taga Egipto ngayti, nagpintut it pandele-delem, beken it delem na. Temed ayun duꞌut mga Israelita ngayti, atnang pangeya-eyag ka sugu naga it kunum ngayti. Ta it atkayti, ega nakapatpad i mga taga Egipto ngayti duꞌun it mga Israelita.
21Binwat ni Moises, ipiyapatuꞌ ya i sungkud duꞌut sagpaw it dagat ngayti. Naglinag nga piyaꞌyep it AMPUꞌANG DIYUS i masbeg nga deres nga garing duꞌut lebatan. Egay beken, nabagiꞌ i danum. May magbabalantang na nga napraan duꞌut tenga-tengaꞌ. 22Aypaꞌ, binwat it mga Israelita ngayti, namagpandipag na. Yanayti, pagpepraan i piyanawan nira. Pabali-bali it pagpepraan ngayti, nagpadingding nay dagat.
23Desang kukuꞌ-aldaw, tiyaraꞌusig siꞌ sira it mga taga Egipto. Muꞌsang mga mangangabayuꞌ it adiꞌ ngayti baw mga sundaluꞌ ya nga magsasakay it sarakayan, simnunsun na sira it pagpepraan ngayti. 24Temed ta, maglelteg nagay AMPUꞌANG DIYUS nga duꞌun it kunum ngayti nga magsugu. Aypaꞌ talagang siyasaw ya nay mga taga Egipto ngayti nga sundaluꞌ. 25Mamagkatelnek nay mga gulung it mga pagsasakayan nira ngayti, aypaꞌ daꞌsira na magkapakseg it magꞌusig ngayti, beken it magkaꞌutlang nay beken nga mga gulung. “Bilaꞌ, paꞌuliꞌ tami na baꞌ!” maat nira. “Paꞌalaid tami situt mga Israelita ngaytu. Ka iyan bay kalaban ta ngaytu, AMPUꞌANG DIYUS ngayan nga magbatuꞌ it kanira!”
26Inaat siꞌ it AMPUꞌANG DIYUS si Moises, “Ipapatuꞌ mu siꞌ i sungkud mu asat sagpaw it dagat ngayan isaꞌun taburan it dagat i mga taga Egipto, pati mga sarakayan nira.” 27Ipiyapatuꞌ siꞌ nga matuud ni Moises. Magpangyag, magꞌuliꞌnan i dagat ngayti. Magpaꞌere-eres nagay mga taga Egipto ngaytit malagyu, temed it piyaklat it AMPUꞌANG DIYUS i darugpat danum ngayti nga nagpadingding, ta biyaraꞌan nira, namagkalmes sira nga muꞌsa. 28Pagꞌuliꞌnan it dagat ngayti, nataburan nay sarakayan baw mga kabayuꞌ ngayti it adiꞌ, pati mga sundaluꞌ ya. Egay naꞌped nga maski sang kataawan.
29Temed ta, mga Israelita ngayti, duꞌun na sira it sang dipag, ka yanayti i piyanawan nira, napraan duꞌut piyagtengaꞌan it nagpadingding ngayti nga dagat. 30Kat iting aldaw, ipiyagribri it AMPUꞌANG DIYUS i mga Israelita kat alima it mga taga Egipto. Ipaꞌari-ari it mga Israelita i seyek nira, miyatay na nga mga taga Egipto ngayti nga simnarit dagsaꞌ. 31Ta, sabap it namuyaan it mga Israelita ngayti nga keseg it guna it AMPUꞌANG DIYUS kat pandaꞌeg ya ngayti it mga taga Egipto, paggalangen na niray AMPUꞌANG DIYUS it may iꞌlam. Baw may pamayaꞌ baw pagsarig nira nat kanya, pati manigsirbi ya ngayti nga si Moises.
Currently Selected:
Exodo 14: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
