Exodo 33
33
Nasmek i mga Israelita ngayti
1Inaat siꞌ it AMPUꞌANG DIYUS si Moises. Maat ya, “Tananan mi nay itung rugar, ikaw baw mga taw ngayan nga ipiyaliꞌwan mu duꞌut Egipto. Paꞌaduꞌun kamu na it banwa nga isiyanggup ku it ki Abraham, ki Isaac baw ki Jacob. Isiyanggup kut kanira nga ibgay ku it mga tungtung-inapuꞌ nira. 2Papanguꞌnaan ku kamu it esang anghil, nga kanya i mimugaw it mga taw duꞌut abutun mi ngayti, mga Cananeo, mga Amorreo, mga Heteo, mga Perezeo, mga Heveo baw mga Jebuseo, nga taga duꞌun. 3Paꞌaduꞌun kamu na it banwa ngayti nga sakyan i muꞌsa. Takaꞌ daꞌku nayan mangiba it imyu, ka mga lamwat kamu. Barang simikrab pay iseg ku it imyu, mapuuꞌ ku paꞌ kamu duꞌun it pagpanawan mi!”
4Pagkagneg it mga Israelita it iti nga inaat, namagkapanrurunggukan sira ka nasmek sirang banar. Daꞌsira na magpanrurug it bilug nira. 5Atkayti i binwat nira sabap it inaat it AMPUꞌANG DIYUS it ki Moises, nga magꞌaat, “Isugid mu it mga Israelita ngayan nga in mangiba aku pat imyu, barang puuꞌun ku kamu nga lagi sabap it masyadung madedsen i ulu mi. Aypaꞌ iriꞌen mi nay mga rurug it bilug mi bawnga ukumanan ku kamu.” 6Aypaꞌ egay beken, duꞌut Bukid ngaytit Sinai,#33:6 Sang kagtaꞌ it iting bukid, Bukid it Horeb. iniriꞌ nat mga Israelita i muꞌsang mga rurug it bilug nira ka magpababaꞌ duꞌun it AMPUꞌANG DIYUS.
Raraparan i pakisugi-sugid it AMPUꞌANG DIYUS duꞌut Balay nga Papagsugi-sugidan
7Naꞌugaliꞌ na ni Moises nga kada magbalay-balay sirat maꞌla-maꞌlay, pagpakabratan yat esang bala-balay nga magkapuru-purun, nga pagpangaranan yat Balay nga Papagsugi-sugidan. Pagpakabratan ya, duꞌun it ala-alaid nira. Duꞌun na kayti i papaꞌaduꞌunan it maski siyu nga may kuꞌaaten u kuꞌingkutun duꞌun it AMPUꞌANG DIYUS. 8Ta, kada paꞌaduꞌun si Moises ka semled duꞌun, muꞌsang mga Israelita ngayti, mamagtindeg sira duꞌut salakwatan it mga bala-balay nira, paglalawagen nira si Moises seked it makasled. 9Basta yan duꞌun nat seled si Moises, magpasalu yan duꞌun manggid it salakwatan it Balay ngayti nga Papagsugi-sugidan i kunum ngayti nga subung it panindeg it arigi. Sikayti nay pagpakisugi-sugidan it AMPUꞌANG DIYUS it ki Moises. 10Basta maltegan nat mga Israelita nga duꞌun nat salakwatan it Balay ngayting Papagsugi-sugidan i kunum ngayti, timindeg sira duꞌut salakwatan it mga bala-balay nira ngayti, ka sumamba it AMPUꞌANG DIYUS. 11Baw yay matuud, pakisugi-sugid ngaytit AMPUꞌANG DIYUS it ki Moises, subung na sirat nagꞌadap, nga atnat susugid it nagꞌiba-iba. Pagkatupus it muꞌsang pagsugiden, ki Moises, muliꞌ nayan duꞌut pagbabalay-balayan nira ngayti. Temed ki Josue nga mangaꞌwaꞌen paꞌ nga katabang ya, matuduꞌ duꞌut bala-balay ngayti. Ega magliꞌid kanya duꞌun.
Ega naga tananan it Ampuꞌang Diyus i mga Israelita ngayti
12Pagpakisugi-sugid siꞌ ni Moises duꞌun it AMPUꞌANG DIYUS, maat ya, “Ipiyagꞌaat mu it aken nga panguꞌnaan kuy Israelita ngaytu it paꞌaduꞌun it banwa nga isiyanggup mu. Temed egay gintaꞌ mu nga in siyuy taꞌgen mu nga katimbang ku. Iyan lamang i inaat mu it aken, nga pagkilalaen mu aku baw pagsagyaan mu naga aku. 13Kayti, in matuud nga pagsagyaan mu aku, sana ipatantu mu it aken i mga pabetang-betang mu, isaꞌun maꞌrutan ku, isaꞌun magsisigi nga pagsagyaan mu aku. Dedemdemen mu gasiꞌ nga mga Israelita ngaytu, piniliꞌ mu nga taawan mu.”
14Maat i tubag it AMPUꞌANG DIYUS, “Aku mismu i mangiba. Talagang ibaan ta kamu seked duꞌun it banwa nga abutun mi, baw ipasakep ku yan it imyu.”
15“Magayen yan,” maat ni Moises, “ka in daꞌkami naga bayaꞌen mu, ta magayen daꞌkami na lamang palꞌiden mu sikaytu. 16Sabap in tananan mu na kami, magꞌuꞌunu maꞌrutan it beken nga mga bangsa nga pagsagyaan mu aku baw mga taawan mu ngaytu? Takaꞌ in pagbaya-bayaꞌen mu naga kami, talagang maꞌyag nga ipiyapinpin mu na kami nga mga taawan mu.”
17“Ta, buwaten ku nayan i kaꞌirgan mu ngayan,” maat it AMPUꞌANG DIYUS, “sabap matuud nga pagsagyaan ku ikaw baw kilala ku nay adat mu.”
18Maat siꞌ ni Moises, “Unu yan, mapakay ku nga maltegan i kabantugan mu?”
19“Ta in atkayan,” maat it AMPUꞌANG DIYUS, “ipalteg kut imu i kabantugan ku. Ipasarimbay ku lamang asan it imu, dengan it getaꞌen ku i ega basta-bastang ngaran ku kat adapan mu. Ka aku, AMPUꞌANG DIYUS. Magsanguꞌ aku it in siyuy ireg ku nga sanguꞌan. Magꞌildaw aku gasiꞌ it in siyuy ireg ku nga ildawan. 20Temed ega mapakay nga maltegan mu i rupa ku, sabap siguradung egay maꞌgen nga makalteg kayan.
21Ta sinit tepad ku ngayni, may matindegan mu nga batu. 22Pagsarimbay it kabantugan ku ngaytu, pasleden ku ikaw kat esang kinleꞌed ya. Bawnga tagnepan ku ikaw it pala-palad ku seked it kataꞌlib aku. 23Pagkataꞌlib ku, awaꞌen ku nay pala-palad ku, isaꞌun maltegan mu i ayun it buktut ku, temed in rupa ku, ta ega.” Iti na i tubag it AMPUꞌANG DIYUS it ki Moises.
Currently Selected:
Exodo 33: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
