Exodo 9
9
Mga ayep siꞌ i piyasakpan it panalakep
1Inaat siꞌ it AMPUꞌANG DIYUS it ki Moises, “Paꞌaduꞌun ka siꞌ it adiꞌ. Isugid mu siꞌ i ampang ku ngaytu nga, ‘Ituy ipiyagꞌaat it imu it AMPUꞌANG DIYUS it mga Hebreo. Ipalugut mu nat mapanaw i mga taawan ku ka sumamba sira it aken. 2Temed in ega paꞌ ipalugut mu, ka iꞌimet mu paꞌ, 3aypaꞌ ipabetang-betang ku nga abutun it maꞌget nga sarut i mga ayep mi nga duꞌut pagpasturan, maski kabayuꞌ, asno, kamelyo, bakaꞌ, tupa baw kambing, uyut sira nga muꞌsa. 4Temed bidaꞌen ku naga i mga ayep mi baw ayep it mga Israelita. Egay matay nga maski sangbat it kanira nga mga ayep, in daꞌga imyu lamang. 5Aku nga AMPUꞌANG DIYUS i nagpabetang-betang nga dedelem i ibwat ku it itu ngaytu.’”
6Ta pagsunud nga aldaw, tiyuman nga matuud it AMPUꞌANG DIYUS. Simnari nat patay i muꞌsang mga ayep it mga taga Egipto nga duꞌut pagpasturan. Temed egay miyatay nga maski sangbat nga mga ayep it mga Israelita. 7Ipiyabaꞌnaw it adiꞌ i duꞌut mga Israelita ngayti. Ta atkayti nga matuud nga maski sangbat, egay magpatay nga kanirang mga ayep duꞌun. Temed maski atkayti nang kaꞌulugan, sigi gang pategas ya. Ega ga lamang ipagpalugut ya it mapanaw i mga Israelita ngayti.
Pamageꞌ siꞌ i nagꞌabut
8Aypaꞌ inaat siꞌ it AMPUꞌANG DIYUS it ki Moises baw ki Aaron, “Maup kamu it abu duꞌut dakulang pugun. Bawnga Moises, isaꞌbug mu nga pagleltegan it adiꞌ. 9Magbaraꞌ tu nga maꞌiꞌinek nga kapu-kapu duꞌut muꞌsang Egipto, nga papuꞌnan it bageꞌan nay muꞌsang mga taw, pati mga ayep nira.”
10Aypaꞌ minsiꞌ sira nga matuud it abu, bawnga nagpakikita siꞌ sira it adiꞌ ngayti. Pagꞌabut duꞌun, isiyaꞌbug na ni Moises i abu ngayti. Ta, biyageꞌan nga matuud i muꞌsang taw baw muꞌsang ayep. 11Mga may kepetan ngayti, ega na kaya niray ginawa nira it pakikita it ki Moises sabap pati sira, piyamagbageꞌan nang tanan, atnagay muꞌsang mga beken nga taga Egipto. 12Temed ta, yanayti, subung nat inaat ngayti it AMPUꞌANG DIYUS nga buwaten ya nga magmategas i adiꞌ ngayti, aypaꞌ pasigi nga pagpasngelan yay pagꞌaaten na Moises, duwa ni Aaron.
Pagtedagan nat yilu i Egipto
13Inaat siꞌ it AMPUꞌANG DIYUS it ki Moises, “Dedelem nga kadedelman, maꞌadle-adlem ka nga pakikita it adiꞌ. Isugid mu siꞌ duꞌut kanya i ampang ku ngaytu. Aaten mu nga, ‘Itu siꞌ i inaat it AMPUꞌANG DIYUS it mga Hebreo. Ipalugut mu na nga mapanaw i mga taawan ku ka sumamba sira it aken. 14Temed in ega paꞌ ipalugut mu, magꞌindadangep nayan it talagang mabeꞌgat i ibetangan ku it imu, pati mga taawan mu baw kapuꞌsaan it mga sinakepan mu nga mga taga Egipto. Atkaytu i buwaten ku isaꞌun maꞌrutan mu nga egay maski siyu nga kasbung it aken. 15Ka in beteꞌ piyaꞌabutan ku kamu it panarut nga ipagpamatay, mapuuꞌ kamu nayan nga muꞌsa. 16Temed ega naga binwat kuy atkayti, in daꞌga ipiyatindeg ku ikaw isaꞌun lamang kat mga buwaten ku it imu, ipatantu ku i keseg it guna ku baw isaꞌun gasiꞌ lemkep it muꞌsang banwa i katanug it ngaran ku. 17Temed ipagpasigi mu pay pakikuntraꞌ mu it mga taawan ku, ka ega ipagpalugut mu nga mapanaw sira. 18Aypaꞌ dedelem nga kadedelman, paꞌuranan kuy situt Egipto, nga iyan i temdag, yilu nga subuk kadsen it batu. Talagang garing paꞌ it katagnaꞌ-tagnaꞌan, ega pay namasaan situt Egipto nga atkaytung kasesleg. 19Aypaꞌ iꞌurdin mu nga lagi nga ipaꞌlung i muꞌsang mga ayep mi. Baw mga taw, ega nay sumarit liꞌwan-liꞌwan, asan na lamang sira it seled it balay, ka egay maꞌgen basta tindagan it itung yilu.’”
20Ta, yan beken nga katimbang it adiꞌ ngayti nga may pamayaꞌ baw iꞌlam it ampang ngayti it AMPUꞌANG DIYUS, ipiyadali-daliꞌ nirat pasarusud i kanirang mga taawan ka piyapaꞌlung na, pati mga ayep nira. 21Temed iyan mga beken nga egay banu-banu nira it ampang ngaytit AMPUꞌANG DIYUS, ega ipiyapisiꞌ niray mga taawan baw ayep nira nga duꞌut pagpasturan.
22Bawnga pagꞌabut it uras, inaat it AMPUꞌANG DIYUS it ki Moises, “Ipatindeg mu nay alima mu isaꞌun temdag nay yilu nga subuk deset batu duꞌun it muꞌsang Egipto. Tedagan nay mga taw, mga ramu-ramu, pati mga luwak duꞌun it uma.” 23Aypaꞌ ipiyatindeg na ni Moises i alima ya nga magseskel it sungkud ya. Duldug i tubag it AMPUꞌANG DIYUS baw kilat nga magpanaytay nat lugtaꞌ. Bawnga inuranan nay banwa nga Egipto nga yanayti i magtedag, yilu ngayti nga subuk kadsen it batu. 24Talagang masleg i tedag it yilu, baw kilat ngayti, ega na magdelem. Yay matuud, garing paꞌ it puꞌun-puꞌun it bangsa nga Egipto, ega pay miyabut duꞌun nga atnakayting panele-seleg it yilu, yapayti. 25Talagang kat paꞌari-aring rugar nga sakep it Egipto, muꞌsang taw baw ramu-ramu nga duꞌut liꞌwan, namagpatay ka naꞌiguꞌ nat yilu ngayti nga magtedag. Talagang dakulaꞌ nga karanggaꞌan, ka yabasay maꞌiguꞌ it magtedag ngayti nga yilu, luwak, kayu, egay magpanagkaꞌ, magpatay nga muꞌsa. 26Yamanay ega pinsag it yilu, duꞌut Gosen ngayti nga pagtataꞌidan it mga Israelita.
27Aypaꞌ ipiyapisiꞌ it adiꞌ ngayti si Moises baw si Aaron. “Kayti nagkasalaꞌan aku,” maat ya it kanira. “AMPUꞌANG DIYUS i mataldeng. Aku baw mga taawan ku, nagkamaliꞌ kami na. 28Manalangin kamu na duꞌun it AMPUꞌANG DIYUS, ka sukuꞌ kami na. Sukuꞌ kami nat panduldug na ngaytung atnakaytu baw magtedag ngaytu nga yilu nga atnakaytung kadadakulaꞌ. Ipalugut ku nayan kamu nga mapanaw. Ega na iꞌimet ku kamu.”
29Tiyubag ni Moises, “Pagkaliꞌwan ku situt siyudad ngaytu, iptat ku nay mga alima ku ka manalangin na duꞌut AMPUꞌANG DIYUS. Medek nay panduldug baw timiꞌdaw nay uran ngaytu nga yilu. Sikayan maꞌrutan mu nga AMPUꞌANG DIYUS i magbebegbeg it muꞌsang banwa. 30Temed magkaꞌrutan ku na nga ikaw baw mga katimbang mu, ega pay galang nga may iꞌlam mi it AMPUꞌANG DIYUS.”
31Naranggaꞌ talaga i muꞌsang luwak nira nga lino baw sebada, sabap magbuwaꞌ na i sebada baw magburak na i lino. 32Temed iyan mga luwak nga tirigu baw espelta nga ega paꞌ nakabwaꞌ, ega naranggaꞌ i itiꞌen.
33Ta, limniꞌwan na na Moises duꞌut adapan it adiꞌ ngayti. Pagkaliꞌwan nira duꞌut siyudad, ipintat na ni Moises i alima ya ka nanalangin duꞌut AMPUꞌANG DIYUS. Mindek na nga matuud i panduldug baw tedag it yilu, baw timniꞌdaw nay uran. 34Pagkamuya it adiꞌ ngayti nga mindek nay muꞌsa ngayti, nagkasalaꞌan siꞌ kanya. Nagpategas siꞌ, pati mga katimbang ya. 35Aypaꞌ sabap it magpategas siꞌ i adiꞌ ngayti, ega naga piyaliꞌwan ya i mga Israelita, subung naga it ampang it AMPUꞌANG DIYUS nga itiyuturan ni Moises.
Currently Selected:
Exodo 9: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
