Genesis 16
16
Inasa-asawa ni Abram si Agar
1Si Sarai ngayting asawa ni Abram, talagang ega magꞌanak nga babay. May esang uripen ya nga babay nga taga Egipto, pagpangaranat ki Agar. 2Maat ni Sarai it ki Abram, “Ungaytu, naꞌlay nay pagꞌasawa ta, daꞌku paꞌ nanganak. Subuk pagsabaren it AMPUꞌANG DIYUS nga daꞌku manganak. Kayti ituy ipagpakiꞌupakat kut imu. Magayen siguru, uripen ku ngaytung babay i asa-asawaen mu, ka in manganak kanya, yay ipabetang nga anak ku.”
Napakay ni Abram i inaat ngayti ni Sarai. 3Aypaꞌ ipiyagbegay ni Sarai duꞌun it asawa ya nga si Abram si Agar ngayting taga Egipto nga uripen ya. Egay beken, nagꞌasa-asawa na sira ni Abram. Sang puluꞌ nga taꞌun nay kaꞌlay na Abram duꞌut Canaan ngayti, pagbuwat nira ngaytit atkayti. 4Sabap it nagꞌasa-asawa ngayti sira, ega naꞌlay nagbeteng si Agar.
Iyan magbebteng na ngayti kanya, pagtibabaꞌen ya nay agalen ya ngayting babay nga si Sarai. 5Ta it ega naga magkabaraꞌan si Sarai, maat yat ki Abram, “Salaꞌ mu baytu nga pagtibabaꞌen aku na ni Agar. Unu paꞌ garing it aken i pagꞌasa-asawa mi ngaytu. Ta unuka kayting magbebteng na kanya, atkayan nay buwat yang magpataꞌas-taꞌas nat aken? Magkaꞌrutan bayat AMPUꞌANG DIYUS, in siyu manggid it aten i may kasalaꞌan!”
6“Aaꞌ,” maat ni Abram, “daꞌga babay ngayan, wayan, masunud mu in unuy ireg mu nga kubwaten, ka uripen mu kanya.” Aypaꞌ riniga ni Sarai si Agar. Egay beken miyalagyu na si Agar.
Ildaw it AMPUꞌANG DIYUS it uripen ngayti nga si Agar
7Nagpakikita it ki Agar i Anghil it AMPUꞌANG DIYUS#16:7 Ituy esang pangaran it Ampuꞌang Diyus it sadili ya. Egaytu maat desang anghil-inanghil lamang. duꞌut esang tumbud it danum nga duꞌun it kapupuyangtan nga rugar. Iti i tumbud nga duꞌut dalan nga magpaꞌaduꞌut Shur. 8Inaat yat kanya, “Agar, nga uripen ni Sarai, magpaꞌunu-unu kaytu?”
“Aaꞌ,” maat i tubag ni Agar, “magpalagyu akut agalen ku nga si Sarai.”
9“Ega atkayay buwaten mu,” maat it Anghil ngaytit AMPUꞌANG DIYUS. “Paꞌuliꞌ ka duꞌut agalen mu ka pasakep ka sit kanya nga uripen ya siꞌ.” 10Beken pang inaat ya, “Padaklen ku nga padaklen nga banar i mga tungtung-inapuꞌ mu seked it ega na mabilang i kadakel nira. 11Kayti,” maat ya, “magbebteng ka na. Sumakit yan, lalaki. Si Ismael#16:11 Ireg sugiden it ngaran ngaytu, magpagneg i AMPUꞌANG DIYUS. i ipangaran mut kanya, ka nagnegan yan it AMPUꞌANG DIYUS i pangabang mu sabap it kakuriꞌan mu ngaytu. 12Anak mu ngaytu, kaꞌalimbawaan ya, simarun nga kabayuꞌ ka egay tandang takenaꞌ. Kakuntraꞌ kanyat muꞌsang mga taw baw muꞌsa ngaytu, kanya nagang mga kakuntraꞌ. Pati mga kaduguꞌan ya, kuntraꞌen ya naga.”
13Ta, binwat ni Agar ngayti, piyangaranan yay Ampuꞌang Diyus. Pangaran ya, si El Roy, nga ireg sugiden, Ampuꞌang Diyus nga maglelteg. Ka maat ya, “Nakalteg aku palan it Ampuꞌang Diyus nga maglelteg it aken.” 14Aypaꞌ ka napangaranan it mga taw it iting tabud, Beer-lahai-roi, nga ireg sugiden, tabud it kanya nga egen it egay kaskedan, nga maglelteg it aken. Itiꞌen ngayting tabud, duꞌun nagat piyagtengaꞌan it Cades baw Bered.
15Pagpanganak ni Agar ngayti, sumakit, lalaki nga matuud. Iti na ngayti i anak ni Abram duꞌut ki Agar. Pangaranan ni Abram, si Ismael. 16Walung puluꞌ may enem nang taꞌun i idad ni Abram, pagkaꞌanak ya ngayti duꞌut ki Agar it ki Ismael.
Currently Selected:
Genesis 16: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
