Genesis 20
20
In unuy biyaraꞌan pagpaꞌugad na Abraham duꞌun it Gerar
1Ega naꞌlay, nagpaꞌugad siꞌ si Abraham ngayti. Naꞌaduꞌun siꞌ kanya it Negeb. Tiyaꞌidan yang rugar, duꞌun it piyagtengaꞌan it Cades baw Shur. Bawnga ministar kanya duꞌun it Gerar. 2Iyan duꞌun na kanyat Gerar ngayti, panugid ya it mga taga duꞌun, sulsug ya si Sara ngayti. Aypaꞌ it atkayti i panugid ya, ipiyapisiꞌ it adiꞌ ngaytit Gerar si Sara ka idungag ya it mga pagꞌasa-asawaen yang kabababayan.
3Temed pagdelem piyatagaynep it Ampuꞌang Diyus i adiꞌ ngayting si Abimelec. Magpaꞌa-paꞌaat, “Sabap it binwat mu ngaytu, siguradung matay ka, ka magꞌaꞌasawa yan i babay ngayan nga ipiyapisiꞌ mu.”
4Magayen, ega paꞌ nariꞌe-riꞌeng ni Abimelec si Sara ngayti. Magpaꞌa-paꞌaat i tubag ni Abimelec ngayti, “Ta unu bayan, Agalen ku? Betanganan mu na kami it ukuman maski egay nabwat ku nga kasalaꞌan? 5Sabap nabwat ku ga bay atkaytu ka panugid ni Abraham, sulsug ya i babay ngaytu. Atkaytu nagay kat babay ngaytu nga panugid. Aypaꞌ nabwat ku i atkaytu ka tanud ku, matuud. Nakapamayaꞌ akut sugid nira ngaytu.”
6Maat sit Ampuꞌang Diyus it kanya, “Talagang magkaꞌrutan ku nga daꞌka kukasalaꞌan. Aypaꞌ subuk piyuꞌgunan ta ikaw isaꞌun ega mariꞌe-riꞌeng mu kanya. Aku ngaytu i nagsabar it imu isaꞌun daꞌka magkasalaꞌan kat panleteg ku. 7Kayti nga lagi, iꞌuliꞌ mu kanya duꞌun it asawa ya. Prupitaꞌ yan i asawa ya ngayan, aypaꞌ kapanalangin kanya isaꞌun daꞌka naga matay. Takaꞌ in ega iꞌuliꞌ mu, yay matuud, ega lamang ikaw i matay, in daꞌga pati kadakel situt seled it pamalay-balay mu.”
8Pagꞌeyag it aldaw it kade-kadedelman paꞌ, tiningped ni Abimelec i muꞌsang taawan ya ka itiyuturan ya duꞌun it kanira i iting bagay. Pagkagneg nira, miniꞌlam sira nga banar. 9Egay beken, ipiyapisiꞌ ni Abimelec si Abraham. Pagꞌabut ni Abraham, maat ni Abimelec, “Unuka binwat mut amen i atkaytu ngaytu? Unu nay nasalaꞌan mut aken ka tiyaban mu aku pati kaꞌadiꞌan ku duꞌun it kasalaꞌan nga kat ikaꞌilang namen? Talagang ega tamaꞌ i binwat mu ngaytut aken. 10Unuka nangbit it nakem mu i atkaytung buwat?”
11“Binwat ku bay atkaytu,” tubag ni Abraham, “ka tanud ku, mga taw situ, daꞌgay iꞌlam nga paggalang nirat Ampuꞌang Diyus. Aypaꞌ ka magregen akut barang imatayen aku isaꞌun lamang maꞌagaw i asawa ku ngaytu. 12Temed iyan talagay kamatuudan, daꞌkami nagaytu nagꞌugaling nga mga taw, ka sulsug kuytu kat amaꞌ. Inaꞌ lamang i piyagbelagan namen ka daꞌkami nagsagpun it inaꞌ. Baw ta nakapagꞌasawa kami. 13Iyan tagnaꞌ ngayting inaat akut Ampuꞌang Diyus nga limꞌid aku na duꞌun it pamalay-balay ni Amaꞌ, inupakat ku naytung lagi i asawa ku ngaytu, nga maat ku, ‘In mapakay it imu, ari-ari abutan ta nga banwa, panugid mu, nagsulsug ta. Magayeng pagkilala it aken i tabang mu ngaytu.’”
14Bawnga binggayan ni Abimelec si Abraham it mga tupa, mga bakaꞌ baw mga uripeng babay, lalaki, dengan it ipiyaꞌuliꞌ ya na si Sara duꞌun it asawa ya ngayti. 15Inaat ya paꞌ si Abraham, “Magkalawag muy pabeyeng-beyeng it rugar ku ngaytu. Piliꞌen mu in ari ireg mu nga taꞌidan.”
16Maat ya gasiꞌ it ki Sara, “Kayti binggayan kuy sulsug mu it pirak nga sang puluꞌ may duwa nga kilu, nga ituy tagnep ku it kaꞌeyaꞌan ngaytu nga nabetangan mu. Sikaytu ipagpakilala ku it muꞌsang mga kaꞌibaan mu nga, maski atkaytuy nabetangan mu, ega talagay imung kasalaꞌan kaytu.”
17-18Ta, it ipiyapisiꞌ ngayti ni Abimelec si Sara, sakaling inabut kanya, pati asawa ya baw mga pagꞌasa-asawaen ya nga kababayang uripen ya, it panarakiten nga siyang, ka ega mapakay i ipiyagbanwa. Iti ngayti, pabetang-betang it AMPUꞌANG DIYUS, nga sabat yat binwat ni Abimelec ngayti. Aypaꞌ ka egay nagbeteng nga mga babay kat pamalay-balay ya ngayti. Ta, it ipiyaꞌuliꞌ na ngayti si Sara, ipiyanalangin sira ni Abraham duꞌut Ampuꞌang Diyus. Pagkapanalangin ni Abraham, gimnayen na sira. Yamana siꞌ i pagbeteng it mga babay ngayti.
Nanganak nagang matuud si Sara
[Mga 1860 B.C.]
Currently Selected:
Genesis 20: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
