Genesis 27
27
Piyatdekan ni Isaac i bilug ni Jacob it ampang nga paꞌildaw
1Ta, yan magurang na si Isaac, nableg na kanya, ega na magkalteg. Kaꞌsa tiyaꞌwagan ya i anak ya ngayting panganay nga si Esau. Maat ya, “Patpad ka sinit aken.”
“Waytu aku na baytu,” maat ni Esau.
2Maat ni Isaac kayti, “Ungaytu, gurang aku na. Ega magkaꞌrutan ku in kaꞌnu nay ipatay ku. 3Dunguꞌ, simpanan muy panaꞌ mu ka ireg ku sana, manlugitem ka siꞌ. 4In may mapisiꞌ mu, ilutuꞌan mu akut kaꞌiꞌirgan ku ngayang pangilutuꞌ. In malutuꞌ mu na, tabanen mu lamang situt aken ka kaꞌnen ku. Pagkakaꞌen ku, iꞌampang ku na kat bilug mu i ampang nga paꞌildaw parabir aku matay.”
5Temed ta, pagpapagnegan ni Rebeca i inaat ngayti ni Isaac it ki Esau nga anak nira. Egay beken, iyan napanaw na si Esau ngayti ka manlugitem na, 6itiyuturan ni Rebeca duꞌut ki Jacob ngayting ariꞌ manggid nga anak ya. Maat ya, “Nagnegan kuy inaat it amaꞌ mu it ki Esau nga akaꞌ mu. 7Maat ya, ‘Manlugitem ka, bawnga ilutuꞌan mu akut kaꞌiꞌirgan ku ngayang pangilutuꞌ ka kaꞌnen ku. Pagkakaꞌen ku, iꞌampang ku na kat bilug mu i ampang nga paꞌildaw, nga pagdedngegen it AMPUꞌANG DIYUS, parabir aku matay.’ 8Kayti anak, pagnegan mut magayen i iꞌaat kut imu bawnga sunudun mu. 9Paꞌaduꞌun ka it mga kambing ta ka misiꞌ ka it duwang batu nga magagaye-gayeng mga uꞌuybun paꞌ. Tabanen mu situt aken ka ilutuꞌan kuy amaꞌ mut kaꞌnen ya, iyan kaꞌiꞌirgan ya ngayang pangilutuꞌ. 10Pagkalutuꞌ ku, tabanen mu na duꞌun it amaꞌ mu, isaꞌun kakaꞌen na. Maꞌampang ya na kat bilug mu i ampang nga paꞌildaw parabir kanya matay.”
11Katubag si Jacob it inaꞌ ya, “Barang, Inaꞌ, ega mapakay ka nagbelag kami ni Esau it pamilug. Mabulbulun it kanya, aken ega. 12Barang ipuꞌun aku ni Amaꞌ, matandaꞌan ya nga pagꞌambutan ku kanya. Daꞌga baꞌ sikayan, ega na ampang nga paꞌildaw i tanggapen ku, in daꞌga sumpa ga nga maraꞌe-raꞌet i mapulus ku?”
13Temed maat it inaꞌ ya ngayti, “Ayaw kat regen, ka in sumpaan ka, ega yan temdek it bilug mu. Paꞌasitu yan it aken. Ta sigi, sunudun mu lamang aku. Mapanaw ka na, ka mamisiꞌ ka na it paꞌaaten ku ngayan.”
14Aypaꞌ napanaw na si Jacob it mamisiꞌ, bawnga tiyaban ya na duꞌun it inaꞌ ya. Nagꞌilutuꞌ nay inaꞌ ya ngaytit kaꞌiꞌirgan ni Isaac nga pangilutuꞌ. 15Pagkalutuꞌ, pinsiꞌ ni Rebeca i magagayeng pakayan ni Esau ngayting anak ya nga panganay, nga duꞌun i pagdadawaꞌan it balay ya ngaytit kanya. Ipiyapakay yat ki Jacob ngayting ariꞌ nga anak ya. 16Bawnga binwat ya, liyulupan yay mga alima ni Jacob it anit it kambing ngayti, pati liꞌeg, piyasalikupan ya. 17Pagkabwat yat atkayti, ipiyakawaꞌ ya nat ki Jacob i inilutuꞌ ya ngayti. May uyut nagang tinapay nga inilutuꞌ ya gasiꞌ.
18Naꞌaduꞌun na si Jacob it amaꞌ ya. Pagꞌabut ya, maat ya, “Amaꞌ.”
“Unu,” maat ni Isaac, “siyu ka bayan?”
19Maat i tubag ni Jacob, “Aku na bayni, Amaꞌ, si Esau aku na nga akaꞌ nga anak mu. Binwat ku nay kumpur ipiyagꞌaat mut aken. Wayni na. Magbangun ka na ka kumaꞌen ka na it ipiyalugitem mu ngaynit aken isaꞌun pagkakaꞌen mu, mapatdekan mu na i bilug ku it ampang nga paꞌildaw.”
20Temed maat ni Isaac, “Unuka atnang dali-daliꞌ mut kaparag, Dunguꞌ?”
“Aaꞌ, nakaparag akut dumaliꞌ ka siguru ildaw nat aken it pagsirbiyan mu nga AMPUꞌANG DIYUS.”
21“Aaꞌ, daꞌga,” maat ni Isaac, “patpad ka daꞌan sinit aken ka ipuꞌun ku ikaw, matandaꞌan ku yan in si Esau ka nga matuud.” 22Nagpatpad si Jacob duꞌun it amaꞌ ya ngayti. Inipuꞌ-ipuꞌ it amaꞌ ya i bilug ya, bawnga miyampang. Maat ya, “Sabagay gaꞌmaran, gaꞌmaran ni Jacob, temed mga alima, alima na ni Esau ka mabulbulun.” 23Ega kanya nakilalaan it amaꞌ ya ngayti ka ega na ngayti magkalteg. Baw ta, in ipuꞌ-ipuꞌun yay mga alima, subung it alima ni Esau nga mabulbulun. Aypaꞌ ka si Jacob ngayti i napatdekan ya it ampang nga paꞌildaw. 24“Unu baꞌ,” maat ya, “si Esau ka nga matuud?”
“Abaa, eeꞌ baꞌ,” maat ni Jacob, “siyuy beken?”
25“Ta, in atkayan,” maat ni Isaac, “ipatpad mu na sinit aken i pangaꞌen ngayan ka kumaꞌen aku nat liyugitem mu ngayan. Pagkakaꞌen ku, iꞌampang ku na kat bilug mu i ampang nga paꞌildaw.”
Egay beken, ipiyatpad na ni Jacob i pangaꞌen ngayti, pati uyut nga pagꞌimnun, ipiyatpad ya na gasiꞌ. Kimnaꞌen na si Isaac. 26Pagkakaꞌen, maat ya, “Patpad ka siꞌ sinit aken, Dunguꞌ, ka mangarek kat aken.”
27Aypaꞌ nagpatpad si Jacob baw miyarek. Maꞌarek it amaꞌ ya ngayti nga bauꞌ, bauꞌ ni Esau, sabap it pakayan ngayti ni Esau nga pagpapakayen ni Jacob. Egay beken, inampang ya na i ampang nga paꞌildaw, nga magꞌaat, “In yayning matuud, tinggem nay anak ku ngaynit bauꞌ it matabaꞌ nga lugtaꞌ nga piyatabaꞌ it AMPUꞌANG DIYUS. 28Kayti sana, ibgay nagat Ampuꞌang Diyus i kagayen it lugtaꞌ nga pagꞌemgen it namug nga garing duꞌut langit, isaꞌun bastanti i magkapatbasan mu nga pagkaꞌnen baw pagbuwateng pagꞌimnun. 29Sana iyan beken nga mga bangsa, magsirbi baw manluud sira it imu. Timindeg ka nga agalen it sulsug mu. Eeꞌ baꞌ, talagang manluud it imu i kaꞌanakan it sulsug mu. Makabetang it ega magayen i kumpur magpabetang it imu it ega magayen. Temed iyan mildaw it imu, sira gasiꞌ i ildawan.”
Binwat ngayti ni Jacob, riyaꞌe-raꞌetan it nakem ni Esau nga ikiyasgaw ya na
30Pagkatupus it ampang ngayti ni Isaac, nanliꞌwan na si Jacob. Magkagaring, magꞌabut si Esau ngayting nanlugitem. 31Unupat pagꞌabut ya, nangilu-ilutuꞌ na kanya it kukaꞌnen ngaytit amaꞌ ya. Pagkalutuꞌ ya, tiyaban ya na duꞌut amaꞌ ya. “Amaꞌ,” maat ya, “wayni nay ipiyagꞌaat mu ngayan it aken. Magbangun ka na, ka kumaꞌen ka na it ipiyalugitem mu ngaynit aken isaꞌun mapatdekan mu na i bilug ku it ampang nga paꞌildaw.”
32“Aaꞌ,” maat ni Isaac, “ay, siyu ka siꞌ?”
“Ta si Esau aku na nga anak mu nga panganay.”
33Pagkagneg ni Isaac, talagang nabiglaꞌ kanya, baw egay kasubraꞌ it yegyeg it bilug ya. Maat ya, “Ta, ay siyu ga bay kagaynang timnaban nat nalugitem ya situt aken? Ega paytu naꞌlay i pagkakaꞌen ku baw pagkatupus kut mampang it ampang nga paꞌildaw. Eeꞌ baꞌ, ega na mabaiꞌ i ampang ngayan. Talagang matuman duꞌut kanya i kagayenang inaat ku.”
34Pagkagneg ni Esau, kimnurisang kanya baw siminggaw it pagdadakulaꞌen ya na. Baw rimnaꞌe-raꞌet nga banar i nakem ya. Maat ya, “Ega atkayan, Amaꞌ. Ampangen mu naga kat bilug kuy ampang nga paꞌildaw. Sigi na, Amaꞌ, iꞌampang mu nagat aken!”
35Temed maat siꞌ ni Isaac, “Ta in atkayan palan, iyan kagayna ngayang naꞌasitu, ega ikaw, in daꞌga si Jacob nga ariꞌ mu. Inambutan ya lamang aku. Inagaw yay ampang nga paꞌildaw nga magꞌaꞌareg kut imu.”
36“Daꞌga in atkayan,” maat ni Esau, “bagay it kanya i ngaran ya nga si Jacob,#27:36 Ireg sugiden it ngaran ngaytu, magseskel it biyutu-butuꞌ. Kat kanirang ampang, may puntuꞌ gasiꞌ kayan nga makupasaꞌli. ka ungaytu, inagawan ya siꞌ akut ikadwa ngaytu. Uꞌna, inagaw yay pudir ku kat panunubliyen, kayti inagaw ya pay magꞌaꞌareg ngaytut aken nga ampang nga paꞌildaw. Ta, unu,” maat ya, “Amaꞌ, unu, ega nay beken nga areg mu it aken nga ampang nga paꞌildaw?”
37“Unu pay mabwat ku?” maat ni Isaac. “Nakabgay ku nat kanya nga magbaraꞌ kanya nga agalen mu baw mabwat nga manigsirbi ya i muꞌsang kaꞌanak-anakan mu. Magbastanti i magkapatbasan ya nga pagkaꞌnen baw pagbuwateng pagꞌimnun. Ta, ega nay naꞌped, duꞌun nat kanya nga muꞌsa i ampang nga paꞌildaw. Unu pay makabgay ku it imu, Dunguꞌ?”
38“Aaꞌ ega atkayan Amaꞌ,” maat ni Esau. “Unu yanayti i seked it magꞌaꞌareg mu? Ega atkayan! Iꞌampang mu naga kat bilug ku, sigi na baꞌ, Amaꞌ!” Siminggaw siꞌ si Esau it pagdadakulaꞌen ya nang garwak.
39Miyampang siꞌ si Isaac, maat ya, “Imu nga maꞌistaran, alaid i pamalay-balay mu duꞌut matabaꞌ nga lugtaꞌ nga pagꞌemgen it namug nga garing duꞌut langit. 40Kat basiꞌ mu, iyan i imu nga ikaꞌgen. Manigsirbi ka nga matuud it sulsug mu, temed mabut naga nga sumang kaꞌanu, in pakikuntraꞌ i mga tungtung-inapuꞌ mu, makapulintas naga sira kat magsasakep ngaytut kanira.”
41Ta it atkayti, ereꞌeret talagay iseg ni Esau it ki Jacob sabap it nakaꞌaduꞌun it bilug ni Jacob i ampang ngayting paꞌildaw nga magꞌaꞌareg it amaꞌ yat kanya. Kat nake-nakem ya, “Eeꞌ na. Ega na bayan paꞌlayen si Amaꞌ, ka gurang na. Bawnga in ega nay kanya, imatayen ku nayan si Jacob nga sulsug ku!”
42Temed nasugid duꞌut ki Rebeca ngayting inaꞌ nira i pagꞌampa-ampangen ngayti ni Esau. Aypaꞌ ipiyapisiꞌ nga lagi ni Rebeca si Jacob. Pagꞌabut duꞌut kanya, maat ya, “Naꞌrutan ku nga pagdidimaten ka ni Esau nga imatayen in ega nay amaꞌ mi. 43Kayti, Anak, magayen mamayaꞌ ka it aken. Mapanaw ka na kayti, malagyu ka na duꞌut Haran, duꞌut sulsug ku nga si Laban. 44Duꞌun ka na daꞌan it kanya seked it ega paꞌ miyulibas i iseg it akaꞌ mu. 45Ta in ega na magꞌiseg kanya, ka nalipatan ya nay binwat mu ngaytu, bawnga ipapisiꞌ ku ikaw. Yamanay iꞌuliꞌ mu situ. Ka in ega malagyu ka, ega masagkaꞌan kuy kasusa kut imyu nga duwa, ka barang subuk mabegran kamu nat maꞌilang.”
May piyaribaran ni Rebeca isaꞌun makapapalagyu ya si Jacob
46Egay beken, naꞌaduꞌun si Rebeca it ki Isaac. Maat ya, “Talagang maraꞌway ku i mga miyagad ta ngaytu nga mga Heteo. Ta kayti in si Jacob ngaytu, kapangasawa gasit mga Heteo ngaytu, nga subung nagat duwa ngaytung mga asawa ni Esau, subuk daꞌku na magkabaraꞌan.#27:46 Mga Heteo ngaytu, egay banu-banu nirat Ampuꞌang Diyus. Ega nay kapulusan it aken, maski egen aku paꞌ.”
Currently Selected:
Genesis 27: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
